Levitikus
10 Ovanamati vaAron, Nadab naAbihu, ova kufa keshe umwe oshikwatelwa shaye shomundilo, ndele tava tula mo omundilo nosho yo oitwimifo. Opo nee ova hovela okutwimina Jehova oitwimifo momundilo inau pitikwa, osho ine va lombwela va ninge. 2 Opo nee kuJehova okwa dja omundilo, ndele tau va xwike po, nova fila koshipala shaJehova. 3 Moses okwa tya kuAron: “Jehova okwa ti, ‘Ohandi ka yapulwa mokati kaavo ve li popepi naame, nohandi ka tumbalekwa moipafi yovanhu aveshe.’” Ndele Aron okwa kala a mwena.
4 Onghee Moses okwa ifana Mishael naElisafan, ovanamati vaUsiel, xekulu yaAron, ndele ta ti kuvo: “Ileni oku, tumbei po ovamwaxo poshivelo shonhele iyapuki mu va twale kondje yonhanda.” 5 Opo nee ove uya komesho nova humbata po ovalumenhu ovo ve li moikutu yavo youpristeri, ndele tave va twala kondje yonhanda, ngaashi ashike Moses e va lombwela.
6 Moses okwa tya kuAron nokovanamati vaye vamwe, Eliaser naItamar: “Inamu efa eexwiki deni di kale inadi kamulwa, ile mu pombole oikutu yeni, opo muha fye, na Kalunga, opo aha handukile ongudu aishe yovanhu. Ovamwaxo vomeumbo alishe laIsrael otava ka lila omolwaavo Jehova a dipaa nomundilo. 7 Inamu dja po poshivelo shetwali lokwoongalela, ngeenge omwe shi ningi otamu fi, osheshi Jehova okwe mu nangeka po, eshi mwa vaekwa omaadi.” Onghee ova ninga ngaashi Moses a popya.
8 Jehova okwa tya kuAron: 9 “Ove novanamati voye, ovo u li navo, ngeenge tamu uya metwali lokwoongalela inamu nwa omaviinyu, ile oikolwifa imwe, opo muha fye. Oyo onghedimhango yaalushe komapupi eni. 10 Osho otashi ningwa, opo pa kale eyooloko pokati koshinima osho shiyapuki naasho sha nyata, nopokati koshinima osho inashi koshoka naasho sha koshoka, 11 nokuhonga Ovaisrael eenghedimhango adishe odo Jehova e va lombwela okupitila muMoses.”
12 Opo nee Moses okwa popya naAron, Eliaser naItamar, ovanamati vaye ovo va xupa po, a ti: “Kufeni eendjayambo odo da xupa po da dja momayambo aJehova, oo a yambwa okupitila momundilo, ndele tamu di lile popepi noaltari, di li omungome inau ya efulika, molwaashi odi li oshinima shiyapuki elela. 13 Omu na oku di lila monhele iyapuki, molwaashi odi li oshitukulwa shoye noshitukulwa shovanamati voye sha dja momayambo aJehova, oo a yambwa okupitila momundilo, osheshi eshi osho nda lombwelwa. 14 Ou na yo okulila monhele iyapuki ombadja yedungadungifwayambo, noshilama shoshitukulwa shiyapuki, ove novanamati voye novanakadona voye ovo u li navo, molwaashi oinima ei oya yandjwa i li oshitukulwa shoye noshitukulwa shovanamati voye, ya dja momayambo oukumwe Ovaisrael. 15 Otava ka eta okaulu koshitukulwa shiyapuki nombadja yedungadungifwayambo pamwe nomayambo oinghene oyo ya yambwa okupitila momundilo, opo i dungadungifwe i li omadungadungifwayambo koshipala shaJehova, notai ka ninga oshitukulwa shoye tashi kalelele noshovanamati voye ovo u li navo, ngaashi Jehova a popya.”
16 Opo nee Moses okwa hovela okupula shi na sha noshikombo shetimbayambo, nokwa mona kutya osha xwikwa po. Onghee okwa li a handukila Eliaser naItamar, ovanamati vaAron ovo va xupa po, ndele ta ti: 17 “Omolwashike inamu lila ombelela yetimbayambo monhele iyapuki, osheshi oi li oshinima shiyapuki elela? Kalunga okwe i mu pa, opo mu kalele po omatimba ongudu yovanhu noku va koshola koshipala shaJehova. 18 Taleni, ohonde yasho kaya li ya etwa monhele iyapuki, omwa li mu na oku shi lila monhele iyapuki, ngaashi ashike nda lombwelwa.” 19 Aron okwa nyamukula Moses, a ti: “Tala, nena ova yandja omatimbayambo avo nomaxwikiloyambo avo koshipala shaJehova, ndele natango oinima oyo oya ningilwa nge. Ngeno onda lile ombelela yetimbayambo nena, mbela ngeno osho osha hafifa Jehova?” 20 Eshi Moses e shi uda, okwe shi dimina.