Eehamba eenhivali

5 Naeman, ondjai yetangakwaita lohamba yaSiria, okwa li omulumenhu a tumbala, oo a li a fimanekwa komwene waye, molwaashi okwa li a kwafelwa kuJehova a findanife* Siria. Okwa li omukwaita omunaenghono, nonande okwa li omunashilundu.* 2 Pomhito imwe, eshi Ovasiria va li va ka ponokela oilando, ova li va kwata ko okakadona kokuIsrael, ndele taka ningi omupiya womukulukadi waNaeman. 3 Oka li ka lombwela omwene wako ka ti: “Ngeenge omwene wange okwa i komuprofeti kuSamaria, ote mu velula koudu waye woshilundu.” 4 Onghee okwa* ya, ndele ta lombwele omwene waye osho sha popiwa kokakadona Okaisrael.

5 Opo nee ohamba yaSiria oya ti: “Inda paife, nohandi tumine ohamba yaIsrael onhumwafo.” Onghee okwa ya a twaalela oitalenti yoshisilveri* omulongo neesekeli doshingoli 6 000 nosho yo oikutu omulongo. 6 Okwa twaalela ohamba yaIsrael onhumwafo, oyo tai ti: “Onda tuma omupiya wange Naeman pamwe nonhumwafo ei nde ku tumina, opo u mu velule koudu waye woshilundu.” 7 Diva eshi ohamba yaIsrael ya lesha onhumwafo oyo, oya pombaula oikutu yayo pokati, ndele tai ti: “Mbela aame Kalunga, oo e na eenghono dokudipaa nokukaleka omunhu nomwenyo? Osheshi okwa tumina nge omulumenhu ou e uye kwaame, ta lombwele nge kutya nandi mu velule koudu waye woshilundu. Osho osha yela kutya okwa hala okweeta eenhamanana pokati ketu naye.”

8 Eshi Elisa, omupiya waKalunga kashili, a uda kutya ohamba yaIsrael oya pombaula oikutu yayo pokati, okwe i tumina diva etumwalaka, a ti: “Omolwashike wa pombaula oikutu yoye? Alikana, ne uye kwaame, opo a shiive kutya muIsrael omu na omuprofeti.” 9 Opo nee Naeman okwa ya nonghambe yaye nomatemba aye oita, ndele ta ka kala ofika poshivelo sheumbo laElisa. 10 Ashike Elisa okwa tuma omutumwa e mu lombwele ta ti: “Inda, ndele to likosho luheyali momulonga waJordan, nolutu loye otali ka kala nawa, noto ka kala wa koshoka.” 11 Osho osha li sha handukifa unene Naeman, nokwa dja po ta ti: “Onde lipopila nda ti, ‘Ote uya kwaame, nota ka kala ofika apa, ndele ta ifana edina laJehova, Kalunga kaye, ta pepele oshilundu nomake aye, opo shi veluke.’ 12 Hano Abana naParpar, omilonga domuDamaskus, hado di dule omeva aeshe omuIsrael? Itandi dulu okuya ndi ke likoshe mudo, ndele handi yela?” Opo nee okwa piluka nokwa ya a handuka.

13 Ovapiya vaye ova ya kuye, ndele tava ti: “Tate, ngeenge omuprofeti okwe ku lombwele u ninge oshinima shonhumba shidjuu, mbela ito shi ningi? Ndele ongahelipi unene tuu eshi e ku lombwela ashike a ti, ‘Likosha, ndele to yela’?” 14 Onghee okwa ya pomulonga waJordan, ndele ta ningine mo luheyali, ngaashi naanaa a lombwelwa komupiya waKalunga kashili. Opo nee okwa veluka, nolutu laye ola kala ngaashi lokamatyona, nokwa yela.

15 Konima yaasho, okwa shuna komupiya waKalunga kashili, ye novakwaita vaye aveshe,* nokwa kala ofika moipafi yaye, ndele ta ti: “Paife ondi shi shii kutya kape na vali Kalunga umwe kombada yedu alishe; Kalunga oku li ashike muIsrael. Alikana, tambula ko oshali* ya dja komupiya woye.” 16 Ashike Elisa okwa ti: “Ohandi ane kuJehova, Kalunga omunamwenyo, oo handi longele,* kutya, itandi i tambula.” Okwa kala te mu kondjifa e i tambule, ashike Elisa okwa kala te i anye. 17 Xuuninwa, Naeman okwa ti: “Ngeenge hasho, alikana, pitika omupiya woye a pewe edu lomoshilongo eshi, tali dulu okuhumbatwa komamwili avali, osheshi omupiya woye ita ka yamba vali omaxwikiloyambo, ile omayambo amwe e lili kookalunga vamwe ve lili, ndele okuJehova ashike. 18 Ndele Jehova na dimine po omupiya woye omolwoshinima shimwe eshi: Ngeenge omwene wange ta i meumbo* laRimmon e ke linyongamene omo, oha kwatelele nge kokwooko, onghee naame ohandi linyongamene meumbo laRimmon. Alikana, Jehova na dimine po omupiya woye, eshi e linyongamena meumbo laRimmon.” 19 Elisa okwa tya kuye: “Inda nombili.” Konima eshi a dja po puye, nokwa ya oshinano shonhumba, 20 Gehasi, omuyakuli waElisa, omupiya waKalunga kashili, okwe lipopila ta ti: ‘Omwene wange okwa xupifa Naeman, Omusiria, eshi ina tambula ko osho a li e mu etela. Onghee ohandi ane medina laJehova, Kalunga omunamwenyo, kutya ohandi tondoka ndi mu shikule, opo a pe nge sha.’ 21 Opo nee Gehasi okwa shikula Naeman. Eshi Naeman a mona omunhu ta di konima yaye, okwa londoloka mo metemba, e ke mu shakeneke, ndele ta ti: “Onawa tuu?” 22 Okwe mu nyamukula, a ti: “Onawa lela. Omwene wange okwa tuma nge, a ti: ‘Tala, paife kwaame okwe uya ovalumenhu vavali ovanyasha, va dja kovanamati vovaprofeti, koshitukulwa shokeemhunda shaEfraim. Alikana, va pa oshitalenti shoshisilveri noikutu ivali.’” 23 Naeman okwa ti: “Kufa oitalenti ivali.” Okwa kala te mu kondjifa, nokwa tonyena oitalenti ivali yoshisilveri nosho yo oikutu ivali momakutu avali, ndele te i pe ovayakuli vaye vavali, ovo ve mu pita komesho ve i humbata.

24 Eshi va fika puOfel,* okwe i va kufa, ndele te i tula meumbo, novalumenhu okwe va lekela va ye. Eshi va ya, 25 okwa ya meni, ndele ta kala ofika pomwene waye. Opo nee Elisa okwa tya kuye: “Gehasi, oto di peni?” Okwa nyamukula a ti: “Omupiya woye ke na apa a ile.” 26 Elisa okwa tya kuye: “Mbela oto ti nghi shi shii eshi omulumenhu a dja mo metemba laye, ndele te uya e ku shakeneke? Mbela eli olo ngoo efimbo lokutambula oshisilveri, ile okutambula oshikutu, ile omashila eemono, ile oikunino yomandjebele, ile eedi, ile eengobe, ile ovapiya ovalumenhu, ile ovakainhu? 27 Paife oshilundu shaNaeman otashi uya kwoove nokoludalo loye fiyo alushe.” Diva, okwa dja mo moipafi yaye e na oshilundu, a toka ngaashi o-snow.