Exodus
EXODUS
1 Apa otapa shikula omadina ovanamati vaIsrael ovo a ya navo kuEgipiti, nakeshe umwe okwa ya pamwe noukwaneumbo waye: 2 Ruben, Simeon, Levi naJuda; 3 Isaskar, Sebulon naBenjamin; 4 Dan, Naftali, Gad naAsser. 5 Ovanhu aveshe* vomoludalo laJakob* ova li* 70, na Josef okwa hangika nale e li muEgipiti. 6 Lwanima, Josef okwa ka fya nosho yo ovamwaina vaye nepupi lavo alishe. 7 Ovaisrael* ova dalafana nova li va hovela okuhapupala neenghono. Ova ninga ovanaenghono nova kala nokuhapupala meendelelo. Onghee ova li ve yadi mo moshilongo osho.
8 Mokweendela ko kwefimbo, opa ka nangekwa ohamba imwe muEgipiti, oyo inai shiiva Josef. 9 Ohamba oya tya koshiwana shayo: “Taleni, Ovaisrael ova hapupala unene nove na eenghono ve tu dule. 10 Natu ningeni po sha, opo vaha hapupale vali. Ngeenge hasho, otava twikile okuhapupala, nongeenge opa holoka oita, otava ka waimina ovatondi vetu, noku tu lwifa, ndele tava di mo moshilongo.”
11 Opo nee ova nangeka po omalenga,* opo a longife Ovaisrael oilonga idjuu, nova tungila Farao oilando yokutuvikila oinima, Pitom naRamses. 12 Shi fike ngoo pwaasho tave va hepeke, osho ngoo tava ende tava hapupala nokulihanena moshilongo. Onghee Ovaegipiti ova li va kwatwa koumbada neenghono omolwOvaisrael. 13 Osho osha ningifa Ovaegipiti va hepeke Ovaisrael nonyanya. 14 Ova li va djuupaleka onghalamwenyo yOvaisrael moku va longifa oilonga idjuu, eshi va li tave va lungifa omunoko, tave va folomifa eedopi noku va hepeka noilonga aishe yomomapya. Ove va hepeka nove va longifa oilonga aishe idjuu youpika nomeenghalo didjuu.
15 Lwanima, ohamba yaEgipiti oya ka lombwela ovakainhu ovadalifi Ovaheberi, Sifra naPua, 16 ya ti: “Ngeenge tamu dalifa omukainhu Omuheberi, ndele tamu mono kutya okaana okamati, omu na oku ka dipaa. Ndele ngeenge okakadona, ka efeni ka kale nomwenyo.” 17 Ashike ovadalifi ovo ova li hava tila Kalunga kashili, nokava li va ninga osho va lombwelwa kohamba yaEgipiti. Ponhele yaasho, ova efa ounona voumati va kale nomwenyo. 18 Mokweendela ko kwefimbo, ohamba yaEgipiti oya ifana ovakainhu ovo ovadalifi, ndele tai va pula kutya: “Omolwashike mwa efa ounona voumati va kale nomwenyo?” 19 Opo nee ovadalifi ova tya kuFarao: “Ovakainhu Ovaheberi inava fa ovakainhu Ovaegipiti. Ove litumba, nohava mono ounona ofimbo omudalifi ina fika.”
20 Kalunga okwa nangeka noupuna ovadalifi ovo, nOvaisrael ova kala nokuhapupala nova ninga ovanaenghono elela. 21 Molwaashi ovadalifi ovo ova li hava tila Kalunga kashili, okwe ke va pa oludalo lwanima. 22 Xuuninwa, Farao okwa li a lombwela oshiwana shaye ashishe, a ti: “Ounona voumati Ovaheberi aveshe ovo tava dalwa, omu na oku va umbila momulonga waNil, ashike oukadona aveshe va efeni va kale nomwenyo.”