Hesekiel
3 Opo nee okwa tya kwaame: “Omona womunhu, lya osho shi li komesho yoye.* Lya omushangwatonywa ou, ndele to i; popya neumbo laIsrael.”
2 Onghee onda ekameka okanya kange, nokwa ningifa nge ndi lye omushangwatonywa ou. 3 Okwa twikila okulombwela nge ta ti: “Omona womunhu, lya omushangwatonywa ou handi ku pe, ndele to kutifa edimo loye nao.” Onghee onda hovela oku u lya, nowa li u nyenye wa fa omaadi eenyiki mokanya kange.
4 Okwa tya kwaame: “Omona womunhu, inda mokati keumbo laIsrael, noku va lombwela eendjovo dange. 5 Osheshi ove ito tumwa u ye kovanhu ovo hava popi elaka lidjuu okuuda ko, ile elaka lihe shiivike, ndele okeumbo laIsrael. 6 Ito tumwa u ye kovanhu vahapu, ovo hava popi elaka ihali dulu okuudiwa ko, ile elaka lihe shiivike, ovo ito dulu okuuda ko eendjovo davo. Ngeno ondi ku tume kuvo, otava ka pwilikina kwoove. 7 Ashike eumbo laIsrael otali ka anya okupwilikina kwoove, osheshi inali hala okupwilikina kwaame. Aveshe vomeumbo laIsrael ove na omitwe dikukutu nomitima dikukutu. 8 Tala! Onda kukutika naanaa oshipala shoye ngaashi oipala yavo, nonda kukutika naanaa ombaba yoshipala shoye ngaashi eembaba doipala yavo. 9 Onda kukutika ombaba yoshipala shoye ngaashi okawe, i kukutu neenghono i dule emanya likukutu. Ino va tila, ile u mbadapalifwe koipala yavo, osheshi ovo eumbo linashibofa.”
10 Okwa twikila okulombwela nge ta ti: “Omona womunhu, pwilikina, ndele to tuvikile momutima eendjovo dange adishe, odo handi ku lombwele. 11 Inda mokati kovanhu voye,* ovo ve li moukwatwa, nokupopya navo. Va lombwela kutya, ‘Eshi osho Omwene Omunamapangelo aeshe, Jehova, ta ti,’ kutya nee otava pwilikine, ile otava anye okupwilikina.”
12 Opo nee omhepo oya tumba nge po, nonda uda konima yange ewi linene tali ndunduma tali ti: “Oshinge shaJehova nashi hambelelwe okudja monhele yaye.” 13 Opa li elinyengo lomavava oishitwa, eshi tai papama tae lidenge kumwe nosho yo ewi lomalola e li popepi nao, nelinyengo lendundumo linene. 14 Nomhepo oya li ya tumba nge po, ndele tai i naame, nonda ya nda nyika oluhodi nosho yo mehandu lomhepo yange, neke laJehova ola li la kwata nge la diinina.* 15 Onghee onda ya keenghwate kuTel-abib, odo hadi kala pomulonga Kebar, nonda kala opo da li hadi di; nonda kala mokati kado omafiku aheyali nda ngwangwana.
16 Pexulilo lomafiku aheyali, ondjovo yaJehova oye uya kwaame tai ti:
17 “Omona womunhu, onde ku nangeka po u kale ngaashi omunangeli weumbo laIsrael; nongeenge owa udu ondjovo ya dja mokanya kange, ou na oku va londwela ponhele yange. 18 Ngeenge onda lombwele omukolokoshi handi ti, ‘Oto ka fya shili,’ ndele ino mu londwela, nowa dopa okupopya, u londwele omukolokoshi e lialuluke kondjila yaye youkolokoshi, opo a kale nomwenyo, ota ka fya omolwenyono laye, molwaashi omukolokoshi, ashike ohandi ke ku pula ohonde yaye.* 19 Ashike ngeenge owa londwele omukolokoshi, noine lialuluka koukolokoshi waye nokondjila yaye youkolokoshi, ota ka fya omolwenyono laye, ndele ove oto ka xupifa omwenyo woye shili. 20 Ashike ngeenge omuyuki okwa efa po ouyuki waye nokulonga osho sha puka,* ohandi ka tula oshipundukifo komesho yaye, nota ka fya. Ngeenge ino mu londwela, ota ka fya omolwenyono laye, noilonga yaye youyuki itai ka dimbulukiwa, ndele ohandi ke ku pula ohonde yaye.* 21 Ashike ngeenge owa londwele omuyuki aha nyone, ndele ina nyona, ota ka kala nomwenyo shili, molwaashi okwa londwelwa, naave oto ka xupifa omwenyo woye.”
22 Eke laJehova ole uya kwaame, ofimbo ndi li oko, nokwa tya kwaame: “Fikama, inda kefilu, nohandi ka popya naave oko.” 23 Onghee onda fikama, nonda ya kefilu, ndele tala! oshinge shaJehova oko sha li oko, ngaashi oshinge osho nda mona pomulonga Kebar, nonde linyongamena pedu. 24 Opo nee omhepo oye uya mwaame, ndele tai kaleke nge ofika,* nokwa popya naame a ti:
“Inda, liidilila meni leumbo loye. 25 Ashike ove, omona womunhu, otave ke ku tula eengodi noku ku manga nado, opo uha dule okudja mo mokati kavo. 26 Nohandi ka ningifa elaka loye li kanyatele moshihokohoko shokanya koye, noito ka dula okupopya u va hanyene, molwaashi ove li eumbo linashibofa. 27 Ashike ngeenge handi popi naave, ohandi ka makula okanya koye, nou na oku va lombwela kutya, ‘Eshi osho Omwene Omunamapangelo aeshe, Jehova, ta ti.’ Ou ta pwilikine na pwilikine, naau ta anye okupwilikina na anye okupwilikina, molwaashi ove li eumbo linashibofa.