Samuel wotete
24 Diva eshi Saul a aluka kokutaataa Ovafilisti, okwa lombwelwa taku ti: “Tala, David oku li mombuwa yaEn-gedi.”
2 Onghee Saul okwa kufa ovalumenhu 3 000, e va hoolola mOvaisrael aveshe, ndele tava i va ka konge David novakwaita vaye koikulundudu yomamanya, oko haku kala oikombo yokeemhunda. 3 Saul okwe uya pemanya li li poyuunda yeedi pondjila, opo pa li ekololo, ndele ta i mo e ke livatele,* ofimbo David novakwaita vaye va li ve li omutumba meni lekololo kofindo. 4 Ovakwaita vaDavid ove mu lombwela tava ti: “Efiku eli olo Jehova te ku lombwele ta ti, ‘Tala, ohandi yandje omutondi woye momake oye, noto dulu oku mu ningila keshe osho she ku wapalela.’” Onghee David okwa fikama ta hondjaunine nokwa teta ko okavando kokandjafa kaSaul, oko kehe na omaoko. 5 Ashike okudja opo, omutima* waDavid owa kala tau mu vele eembedi, molwaashi okwa teta ko okavando kokandjafa kaSaul, oko kehe na omaoko. 6 Okwa lombwela ovakwaita vaye ta ti: “Pataleko laJehova, itashi shiiva ndi ningile omwene wange, omuvaekwa waJehova, oshinima sha tya ngaho. Itandi dulu oku mu ningila owii, osheshi ye omuvaekwa waJehova.” 7 Onghee David okwa pukulula* ovakwaita vaye neendjovo odo, noine va efa va ponokele Saul. Saul okwa dja mo mekololo, ndele ta i nondjila yaye.
8 Opo nee David okwa fikama, ndele ta di mo mekololo, nokwa ifana Saul ta ti: “Omwene wange ohamba!” Eshi Saul a keuka, David okwe linyongamena oshipala shaye sha twa pedu. 9 David okwa pula Saul a ti: “Omolwashike wa pwilikina keendjovo dovalumenhu ovo va ti, ‘Tala, David okwa hala oku ku ningila owii’? 10 Nena eli owa mona ove mwene nomesho oye nghee Jehova e ku yandja momake ange mekololo. Ashike umwe eshi a ti nandi ku dipae, onda li nde ku etela onghenda, ndele handi ti, ‘Itandi ningile owii omwene wange, osheshi ye omuvaekwa waJehova.’ 11 Tate, tala okavando kokandjafa koye, oko kehe na omaoko, aka ndi kwete. Eshi nda teta ko okavando kokandjafa koye, oko kehe na omaoko, inandi ku dipaa. Paife ou wete nou udite ko kutya inandi hala oku ku ningila owii, ile ndi ku tukululile ounashibofa noinandi nyona sha kwoove, ofimbo ove to kongo nge u dipae nge. 12 Jehova na tokole pokati ketu naave, na Jehova ne ku handukile ponhele yange, ashike ame itandi ku ningile owii washa. 13 Ngaashi ashike eyeletumbulo lonale la ti, ‘Momunawii otamu di owii,’ ashike ame itandi ku ningile owii washa. 14 Ohamba yaIsrael otai kongo lyelye? Olyelye tai taataa? Mbela ombwa ya fya, ile ona imwe? 15 Jehova na kale omutokoli, ndele na tokole pokati ketu naave, nota ka konakona oshinima osho nokwaamena nge, ndele ta tokola nge nokuxupifa nge momake oye.”
16 Eshi David a mana okulombwela Saul eendjovo odo, Saul okwa ti: “Mumati wange David, oove ngoo to popi ngaho?” Opo nee Saul okwa hovela okulila mokule. 17 Saul okwa lombwela David a ti: “Ove oumuyuki u dule nge, osheshi owa ungaunga nawa naame, ofimbo ame nde ku ningila owii. 18 Nena owa lombwela nge ouwa oo wa ningila nge, eshi ino dipaa nge, nonande Jehova okwa li a yandja nge momake oye. 19 Mbela omunhu ota kwata tuu omutondi waye, ndele te mu efa a ye ine mu ningila owii? Jehova ne ku pe ondjabi iwa omolwoshinima osho wa ningila nge nena. 20 Tala, paife ondi shi shii kutya oto ka pangela filufilu u li ohamba nosho yo kutya oto ka pangela Ovaisrael efimbo lile. 21 Paife anene nge kuJehova kutya ito ka hanauna po oludalo lange, olo tali shikula nge, nonokutya ito ka dima mo edina lange meumbo latate.” 22 Onghee David okwa anena Saul, nokonima yaasho, Saul okwa ya keumbo. Ashike David novakwaita vaye ova ya koshihondamenolando.