Hesekiel

16 Ondjovo yaJehova oye uya vali kwaame tai ti: 2 “Omona womunhu, shiivifila Jerusalem shi na sha noilonga yaye itondifa. 3 Ou na okutya, ‘Eshi osho Omwene Omunamapangelo aeshe, Jehova, ta ti kuJerusalem: “Okudalwa kwoye noudilo woye owa li medu lOvakaanan. Xo okwa li Omuamori, nanyoko okwa li Omuheti. 4 Shi na sha nokudalwa kwoye, mefiku olo wa dalwa, okanghowa koye kaka li ka tetwa, kwa li wa koshwa nomeva, opo e ku koshole, ino fefengwa nomongwa, nokwa li wa tonyenwa momalapi. 5 Kape na oo e ku fila onghenda sha wana a ninge shimwe shomoinima oyo. Kape na oo e ku udila olukeno. Ponhele yaasho, owa li wa ekelwa mehalandjadja, molwaashi owa li* wa tondika mefiku omo wa dalwa.

6 “‘“Eshi nda li handi ende po, onde ku mona to fangaula mohonde yoye, naashi wa li wa nangala mohonde yoye omo, onda ti: ‘Kala nomwenyo!’ Heeno, onda ti kwoove, ofimbo wa nangala mohonde yoye omo: ‘Kala nomwenyo!’ 7 Onde ku hapupalifa neenghono, ngaashi oimeno tai twiyuka mepya, nowa kula nowa kulilila nowa djala oulyenge vawa elela. Owa tumba omavele, neexwiki doye oda kula; ashike owa li natango hamunghele, nepenge loye ola li kombada.”’

8 “‘Eshi nda li handi ende po, ndele handi ku mono, onda didilika kutya owa kula wa wana okuulikilwa ohole. Onghee onde ku uvika oshikutu* shange, ndele handi uvike epenge loye, nonda ninga eano nosho yo ehangano naave, nowa ninga wange,’ Omwene Omunamapangelo aeshe, Jehova, osho ta ti. 9 ‘Natango, onde ku kosha nomeva, nonda kosha po ohonde yoye, ndele handi ku vaeke omaadi. 10 Opo nee onde ku dika oshikutu sha hondjelwa oinima yokufeweka, nonde ku pa eenghaku da longwa moshipa sho vene vene,* noku ku dingila moshiyata shiwa, nonde ku dika oikutu yondilo. 11 Onde ku feweka noulyenge noku ku dika oivela komake oye, ndele handi ku dike okalyenge mofingo yoye. 12 Onda tula yo okalinga meyulu loye, noutenda momatwi oye nosho yo oshikoroni shiwa komutwe woye. 13 Owa kala nokulifeweka noshingoli nosho yo noshisilveri, noikutu yoye oya li ya longwa moshiyata shiwa sholiina, oshiyata shondilo nosho yo oshikutu sha hondjelwa oinima yokufeweka. Owa li ho li oufila wa nakwa nawa, omaadi eenyiki nosho yo omaadi, nowa ninga umuwa neenghono, eshi wa kula nowa wana okuninga ohambakainhu.’”*

14 “‘Efimano* loye ola hovela okushiivika mokati koiwana omolwewapalo loye, osheshi ola li la wapala omolwetumbalo lange mwene olo nda tula kombada yoye,’ Omwene Omunamapangelo aeshe, Jehova, osho ta ti.”

15 “‘Ashike owa hovela okulineekela mewapalo loye nowa ninga ombwada, molwaashi owa li wa shiivika nawa. Owa kala to hololele keshe umwe ta ende po oilonga yoye youmbwada, newapalo loye ole mu fuula. 16 Owa kufa oikutu yoye imwe nowa wapekifa nomaluvala eenhele dokoikulundudu, oko ho ningile oumbwada woye — oinima ya tya ngaho kai na okuholoka, nokai na okuningwa nandenande. 17 Owa kufa yo elyenge liwa* la longwa moshingoli nomoshisilveri osho nde ku pa, nowe liningila oihongwafano yovalumenhu, ndele to haele nayo. 18 Nowa kufa oikutu yoye ya hondjelwa oinima yokufeweka, ndele to va uvike,* nowe va pa omaadi ange noitwimino yange. 19 Nomungome, oo nde ku pa, wa ningwa moufila wa nakwa nawa, omaadi nosho yo omaadi eenyiki, oo nde ku pa u lye, owe i va yambela yo i li edimba liwa.* Osho osho naanaa sha ningwa,’ Omwene Omunamapangelo aeshe, Jehova, osho ta ti.”

20 “‘Owa kufa ovanamati voye novanakadona voye, ovo wa dalela nge, nowe va yambela oikalunga i va xwake po; mbela inashi wana eshi wa longa oilonga youmbwada i fike opo? 21 Owa dipaa ovanamati vange, nowe va yamba po ve li omaxwikiloyambo moku va ningifa va ende momundilo. 22 Ofimbo to kufa ombinga moilonga yoye aishe itondifa nomoilonga youmbwada, ino dimbuluka efimbo lounyasha woye, eshi wa li hamunghele, naashi epenge loye la li kombada, to fangaula u li mohonde yoye. 23 Konima yowii woye aushe, woo, woo kwoove,’ Omwene Omunamapangelo aeshe, Jehova, osho ta ti. 24 ‘Owe litungila oshitunhu nowe liningila onhele yokoikulundudu momahalandjadja aeshe. 25 Owa tunga onhele yoye yokoikulundudu monhele oyo ya fimana yepandavanda keshe, nowa lundululila ewapalo loye moshinima shitondifa mokuliyandja* kukeshe oo ta ende po, nowa hapupalifa oilonga yoye youmbwada. 26 Owa haela novanamati vaEgipiti, ovashiinda shoye ovo ve na omahalo a pitilila,* nowa udifa nge nai noilonga yoye youmbwada itai dulu okuvalulwa. 27 Ohandi ke ku katukila onghatu neke lange nokuninipika oikulya yoye, nohandi ke ku efela momahalo* ovakainhu ovo ve ku tonde, ovanakadona vOvafilisti, ovo va li va kumwa omolwelihumbato loye lififa ohoni.

28 “‘Molwaashi kwa li wa wanenwa, opo nee owa haela novanamati vaAssiria, ashike konima eshi wa haela navo, natango kwa li wa wanenwa. 29 Onghee owa hapupalifila oumbwada woye medu lovalandifi* nolOvakaldea, ashike nande ongaho, ino wanenwa. 30 Omutima woye kawa li* tuu tau vele,’* Omwene Omunamapangelo aeshe, Jehova, osho ta ti, ‘eshi wa ninga oinima aishe oyo, we lihumbata ngaashi ombwada ihai yavala! 31 Ashike eshi we litungila oshitunhu monhele, oyo ya fimana yepandavanda keshe, naashi we liningila onhele yokoikulundudu momahalandjadja aeshe, kwa li ngaashi ombwada, molwaashi owa anya ofuto keshe. 32 Ove omukulukadi omunyoni wohombo, oo ha i novanhu vokondje ponhele yomushamane waye! 33 Ovanhu ohava yandje keembwada adishe oshali, ashike ove, oove wa yandja eeshali kwaaveshe ovo ve ku hala, noho va pe ombubo ve uye kwoove okudja keembinga adishe, va haele. 34 Ove owa yooloka ko kovakainhu vamwe, ovo hava kufa ombinga moumbwada. Kape na ou ha longo oumbwada ngaashi ove! Oho futu vamwe, ndele vo ihave ku futu. Osho ho ningi osha yooloka ko.’

35 “Onghee hano, ombwada ove, uda ondjovo yaJehova. 36 Eshi osho Omwene Omunamapangelo aeshe, Jehova, ta ti: ‘Molwaashi omahalo oye okwa tilwashi, nepenge loye ola nyanekwa pomutenya, eshi wa kala to haele novaholike voye nosho yo noikalunga aishe inyanyalifa noitondifa,* oyo nokuli wa yambela ohonde yovanamati voye, 37 onghee hano, ohandi ongele pamwe ovaholike voye aveshe ovo wa kala to hafifa, aveshe ovo ve ku hole pamwe naaveshe ovo ve ku tonde. Ohandi ke va ongela pamwe, ve li omhinge naave okudja keembinga adishe noku va nyanekela pomutenya epenge loye, notave ke ku mona u li hamunghele filufilu.

38 “‘Nohandi ke ku handukila nomatokolo, oo ovanyoni vohombo novakainhu ovo hava tileshi ohonde, va wana okupewa, nohonde yoye otai ka tilwashi mehandu nomondubo. 39 Ohandi ke ku yandja momake avo, notava ka ngumauna po oitunhu yoye, neenhele doye dokoikulundudu otadi ka ngumaunwa po; notave ke ku dula oikutu yoye noku ku kufa oulyenge* voye vawa, ndele tave ku fiye hamunghele, nepenge loye otali ka hololwa. 40 Otave ke ku etela eemhunga dovanhu di ku lwife, notave ke ku denga nomamanya, noku ku dipaa nomaongamukonda avo. 41 Otava ka xwika po omaumbo oye nomundilo, nohandi ke ku tokola moipafi yovakainhu vahapu, nohandi ka xulifa po oumbwada woye, noto ka efa po okuyandja ofuto. 42 Ohandi ke ku fululukila nonya yange, nehandu lange otali ka dja po pwoove; nohandi ka kala nda lotela, noitandi ka kala vali ndi udite nda udifwa nai.’

43 “‘Molwaashi ino dimbuluka omafiku ounyasha woye nowa handukifa nge mokuninga oinima aishe oyo, paife, ohandi eta oilanduliko yeenghatu doye komutwe woye mwene,’ Omwene Omunamapangelo aeshe, Jehova, osho ta ti, ‘noito ka kala vali u na elihumbato litondifa noito ka longa oilonga aishe itondifa.

44 “‘Tala! Keshe umwe ou ha longifa omayeletumbulo ota ka yukifa kwoove eyeletumbulo eli tali ti: “Ngaashi ina, omonakadona naye osho e li!” 45 Ove omonakadona wanyoko, oo a tonda omushamane waye nosho yo ovana vaye. Naave omumwainakadona wovamwanyoko oukadona, ovo va tonda ovashamane vavo novana vavo. Nyoko okwa li Omuheti, naxo okwa li Omuamori.’”

46 “‘Omukulu woye okakadona oSamaria, oo ha di kolundume loye* pamwe novanakadona vaye,* nosho yo okandenge koye okakadona, oko haka di kolukadi loye,* oSodom novanakadona vaye. 47 Kwa li ashike ho ende meendjila davo nokushikula oilonga yavo itondifa, ndele meni lefimbo lixupi owa li nokuli wa naipala neenghono melihumbato loye alishe u va dule. 48 Oshili, ofimbo ame ndi na omwenyo,’ Omwene Omunamapangelo aeshe, Jehova, osho ta ti, ‘Sodom, omumwanyokokadona, novanakadona vaye inava ninga osho ove nosho yo ovanakadona voye mwa ninga. 49 Tala! Eli olo la li epuko laSodom, omumwanyokokadona: Ye novanakadona vaye ova li ve udite etumba, nova li ve na oikulya ihapu nosho yo ombili inene; ashike kava li va yambidida omufininikwa nosho yo ohepele. 50 Ova kala ve linenepeka, nova twikila okulonga oilonga itondifa momesho ange, onghee onda mona kutya osha fimana oku va kufa mo.

51 “‘Omanyono aSamaria inaa fika nokuli nometata lomanyono mahapu, oo wa ninga. Owa kala to longo oilonga itondifa neenghono, shi dulife osho va ninga, fiyo oposhitwa osho ovamwanyokokadona va li tava monika va fa ovayuki omolwoilonga yoye aishe itondifa. 52 Paife ou na okulididimikila ohoni yoye, molwaashi owa yukipalifa elihumbato* lovamwanyokokadona. Omolwenyono loye, eshi we lihumbata monghedi itondifa neenghono u va dule, vo ovayuki ve ku dule. Onghee paife, kala wa fya ohoni nokulididimikila elengwa, eshi wa ningifa ovamwanyokokadona va kale tava monika va fa ovayuki.’

53 “‘Nohandi ka ongela eenghwate davo, eenghwate daSodom novanakadona vaye neenghwate daSamaria novanakadona vaye; ohandi ka ongela yo eenghwate doye pamwe navo, 54 opo u dule okulididimikila ohoni yoye; noto ka fya ohoni omolwoshinima osho wa ninga, eshi we va hekeleka. 55 Ovamwanyokokadona, Sodom novanakadona vaye, otava ka shuna konghalo yavo yonale, na Samaria novanakadona vaye otava ka shuna konghalo yavo yonale, naave yo pamwe novanakadona voye otamu ka shuna konghalo yeni yonale. 56 Kwa li wa wana okupopya kombinga yomumwanyokokadona, Sodom, mefiku olo wa li u udite etumba, 57 ofimbo oukolokoshi woye inau nyanekwa pomutenya. Paife, ovanakadona vaSiria novashiinda shaye otave ku kembaula, novanakadona vOvafilisti, aveshe ovo ve ku dingilila, otave ku sheke. 58 Oto ka humbata oilanduliko yelihumbato loye litondifa nosho yo loilonga yoye ififa ohoni,’ Jehova osho ta ti.”

59 “Osheshi eshi osho Omwene Omunamapangelo aeshe, Jehova, ta ti: ‘Paife ohandi ke ku ningila naanaa ngaashi wa ninga, osheshi owa dina eano mokuteya ehangano lange. 60 Ashike ame ohandi ka dimbuluka ehangano, olo nda li nda ninga naave pefimbo lounyasha woye, nohandi ka ninga ehangano naave tali kalelele. 61 Oto ka dimbuluka elihumbato loye, noto ka kala u udite wa fifwa ohoni, eshi to ka hambelela ovamwanyokokadona, ovo va kula kwoove nosho yo ovo vanini kwoove, nohandi ke ve ku pa ve li ovanakadona, ndele hamolwehangano loye.’

62 “‘Ndele ame mwene ohandi ka ninga ehangano naave; noto ka shiiva kutya aame Jehova. 63 Opo nee oto ka dimbuluka noto ka kala wa lengwa okumakula okanya koye omolwohoni yoye, eshi handi ke ku kwatakanifa, nonande owa ninga oinima aishe oyo,’ Omwene Omunamapangelo aeshe, Jehova, osho ta ti.”