Hesekiel
17 Ondjovo yaJehova oye uya vali kwaame tai ti: 2 “Omona womunhu, tonga otumbutumbu nokupopya eyeletumbulo kombinga yeumbo laIsrael. 3 Ou na okutya, ‘Eshi osho Omwene Omunamapangelo aeshe, Jehova, ta ti: “Onhwa ya kula, i na omavava makula, omalwenya male nomahapu, i na omalwenya e na omaluvala a twa, oye uya kuLibanon, noya kufa ko oxulo yomusederi. 4 Oya teya ko oshitai shokoxulonyono yao, ndele tai shi twala kedu lovashingifi,* noku shi tula pedu moshilando shovashingifi. 5 Opo nee oya kufa eembuto dimwe domedu noye di kuna mepya la lyata nawa. Oye di kuna ngaashi omiti odo hadi kulile opo hapa kala omeva mahapu. 6 Onghee oda mena noda ninga omundjebele muxupi, wa tandavela, nomafo ao a taalela meni, nomidi dao oda mena koshi yao. Onghee owa ninga omundjebele, ndele tau twiyuka, nomwa dja oitai.
7 “‘“Nope uya vali onhwa imwe inene i na omavava makula nomalwenya makula. Opo nee omundjebele ou owa tandaveleka omidi dao meendelelo da yuka kuyo tadi di moimhungu yoshikunino, omo wa li wa kunwa, nowa tuma omafo ao kuyo, opo i u tekele. 8 Owa kunwa nale medu liwa popepi nomeva mahapu, opo u yandje oitai i ime oiimati nokuninga omundjebele munene.”’
9 “Tya, ‘Eshi osho Omwene Omunamapangelo aeshe, Jehova, ta ti: “Otau ka kula ngoo? Mbela umwe ita ka duda mo omidi dao nokuningifa oiimati yao i ole nosho yo okuningifa oitai yao i lembe? Otau ka kukuta neenghono, ndele kape na okwooko ku na eenghono, ile ovanhu vahapu tava ka pumbiwa, ve u dude mo nomidi dao. 10 Nonande owa twikwa, mbela otau ka kula ngoo? Mbela itau ka kukuta filufilu, ngeenge owa pepwa komhepo yokoushilo? Otau ka kukutila moshimhungu shoshikunino, omo wa li wa twikwa.”’”
11 Nondjovo yaJehova oye uya vali kwaame tai ti: 12 “Alikana, lombwela eumbo linashibofa to ti, ‘Mbela inamu didilika kutya oinima ei otai ti ngahelipi?’ Tya, ‘Tala! Ohamba yaBabilon oye uya kuJerusalem, noya kufa ko ohamba yayo nosho yo omalenga ayo nokuya pamwe nayo kuBabilon. 13 Shikwao vali, oya kufa umwe womepata leehamba, noya ninga ehangano naye, ndele ta i mu anifa. Opo nee oya kufa mo ovanenenhu vomedu, 14 opo ouhamba u kufwe eenghono, uha dule okuyambuka po, opo ngeenge okwa diinine ehangano laye, ouhamba otau dulu okutwikila okukala po. 15 Ashike xuuninwa, ohamba oye mu tukululila oshibofa mokutuma ovatumwa vayo kuEgipiti, va ka konge eenghambe nosho yo etangakwaita la kula. Mbela otai ka pondola ngoo? Mbela oo ta longo oinima ei ota ka ya tuu onhapo ehandukilo? Mbela ota dulu ngoo okuteya ehangano, ndele natango ta i onhapo?’
16 Omwene Omunamapangelo aeshe, Jehova, ota ti, “‘“Oshili, ofimbo ame ndi na omwenyo,” “ota ka fila muBabilon, monhele omo hamu di ohamba,* oyo ye mu* ninga ohamba, oo a dina eano nokwa teya ehangano. 17 Netangakwaita la kula nosho yo eengudu dovakwaita daFarao, odo itadi dulu okuvalulwa, itadi ka kala di na ekwafo lasha moita, eshi ekondeka leenduba domadu tali ka yeluka, naashi omakuma eameno a tungwa a hanaune po eemwenyo dihapu. 18 Okwa dina eano nokwa teya ehangano. Nokuli nonande okwa udaneka,* okwa longa oinima aishe oyo, noita ka ya onhapo.”’
19 “‘Onghee hano, eshi osho Omwene Omunamapangelo aeshe, Jehova, ta ti: “Oshili, ofimbo ame ndi na omwenyo, ohandi ka eta komutwe waye oilanduliko yokudina eano lange nosho yo okuteya ehangano lange. 20 Ohandi ke mu umbila onete yange, nota ka yulwa konete yange yomoukongo. Ohandi ke mu twala kuBabilon, nohandi ke mu tokolela oko, molwaashi ina kala omudiinini kwaame. 21 Eenhauki adishe domatangakwaita aye otadi ka fya keongamukonda, naavo tava ka xupa po otave ke lihanifilwa keembinga adishe.* Opo nee omu na oku ka shiiva kutya ame mwene, Jehova, onde shi popya.”’
22 “‘Eshi osho Omwene Omunamapangelo aeshe, Jehova, ta ti: “Ohandi ka kufa oshitai koxulo yomusederi munene noku shi twika, nokoxulo yasho, ohandi ka teya ko okatai kapu, nohandi ke ka twika ko ame mwene komhunda ile noya yeluka. 23 Ohandi ke ka twika komhunda ileile yaIsrael noitai yako otai ka kula, notai ka imika oiimati, ndele tai ningi omusederi munenenene. Noudila vomaludi aeshe otava ka omba koshi yao notava ka kala momudile womafo ao. 24 Nomiti adishe domoixwa otadi ka shiiva nokutya ame mwene, Jehova, onda ninipika omuti oo mule, nonda tumbaleka omuti oo munini; onda kukutika omuti oo wa hapa nawa, nonda hapifa omuti oo wa kukuta. Ame mwene, Jehova, onde shi popya nonde shi ninga.”’”