Genesis

44 Lwanima, Josef okwa lombwela omulumenhu, oo a li ta pashukile eumbo laye, a ti: “Ovalumenhu ovo va tulila oilya ihapu meeshako, oyo tava dulu okuhumbata, nakeshe umwe mu tulila mo oimaliwa yaye. 2 Ashike eholo lange loshisilveri li tula moshako yaau munini pamwe noimaliwa oyo a li e uya okulanda nayo oilya.” Omulumenhu oo okwa ninga ngaashi Josef e mu lombwela.

3 Ongula eshi etango la pita, ovalumenhu ovo ova li va lekelwa va shune pamwe neendongi davo. 4 Ofimbo inava ya kokule noshilando, Josef okwa lombwela omulumenhu, oo a li ta pashukile eumbo laye, a ti: “Fikama u shikule ovalumenhu venya. Ngeenge owe va hange, va pula kutya, ‘Omolwashike mwa ningila omwene wange owii, ngeenge ye okwe mu ningila ouwa? 5 Hamba eholo olo halo hali nwine omwene wange, noha tale momukonda? Omwa ninga oshinima shii.’”

6 Omulumenhu oo okwe va hanga, nokwe va lombwela eendjovo odo. 7 Ndele tava ti kuye: “Omolwashike omwene wetu ta popi oshinima sha tya ngaho? Ovapiya voye itava dulu nandenande okuninga oshinima sha tya ngaho. 8 Otwa dja kedu laKaanan, twe ku alulila oimaliwa oyo twa li twa hanga meeshako detu. Ohatu ka vaka ngahelipi oshisilveri, ile oshingoli meumbo lomwene woye? 9 Ngeenge ola hangika kuumwe womovapiya voye, na dipawe, navakwao aveshe nava ninge ovapika vomwene wetu.” 10 Omulumenhu oo okwa ti: “Nashi kale ngaashi mwa popya: Ashike ou ta hangwa nalo, ota ningi omupika wange, ndele nye amushe otamu kala muhe na ondjo.” 11 Opo nee keshe umwe okwa tulula ko diva oshako yaye noku i mangulula. 12 Omulumenhu oo okwa hada mo nawanawa meeshako davo, a hovela kwaai yomukulunhu, ndele ta xuuninwa naayo yaau munini. Xuuninwa, eholo ola ka hangwa moshako yaBenjamin.

13 Ova pombaula oikutu yavo, nakeshe umwe okwa londeka oshako kondongi yaye, ndele tava shuna koshilando. 14 Eshi Juda novamwaxe va ya meumbo laJosef, omo ve mu hanga. Opo nee ova wila eombe koshipala shaye. 15 Josef okwa tya kuvo: “Omolwashike mwa ningila nge owii wa tya ngaho? Hamba kamu shi shii kutya ame ohandi dulu okutala momukonda?” 16 Juda okwa nyamukula, a ti: “Oshike vali hatu dulu okutya komwene wetu? Osho ohatu dulu oku shi yelifa ngahelipi? Nongahelipi hatu dulu okuulika kutya fye ohatu longo ouyuki? Kalunga kashili okwa mona epuko lovapiya voye. Paife otwa ninga ovapika vomwene wetu, atushe naao a hangwa neholo.” 17 Ashike Josef okwa tya: “Itashi shiiva nande ndi ninge ngaho. Omulumenhu oo a hangwa neholo oye ta ningi omupika wange. Ndele nye amushe indeni kuxo nombili.”

18 Juda okwa ehena puye, ndele ta ti: “Omwene wange, ohandi ku indile, alikana pitika omupiya woye a popye naave, noino mu handukila, osheshi ove ou li ngaashi Farao. 19 Omwene wetu okwa pula ovapiya vaye, a ti, ‘Xo oku na natango omwenyo? Omu na vali omumwaxo umwe?’ 20 Onghee otwa tya komwene wetu, ‘Heeno, oku na omwenyo nokwa kulupa; oku na omonamati waye womoukulupe oo munini. Ashike mumwaina, oo va dalwa naye kuina umwe, okwa fya, oye ashike a xupa po, na xe oku mu hole.’ 21 Opo nee owa tya kovapiya voye, ‘Mu etelei nge, opo ndi dule oku mu mona.’ 22 Ashike otwa tya komwene wetu, ‘Okaana itaka dulu okudja po puxe. Ngeenge oka di po puye, ota fi shili.’ 23 Onghee owa tya kovapiya voye, ‘Inamu uya ko kwaame, shapo ongeenge ashike mu li nomumwaxo.’

24 “Okudja opo, otwa ya kutate, ndele hatu mu lombwele osho sha popiwa komwene wetu. 25 Konima yefimbo, tate okwa tya, ‘Shuneni mu ka lande oikulya yetweni.’ 26 Ashike otwa ti, ‘Itatu dulu okuya ko. Ndele ngeenge otu li nomumwameme oo munini, ohatu dulu okuya, osheshi omulumenhu winya itatu ke mu mona, shapo ongeenge ashike tu li nomumwameme oo munini.’ 27 Tate okwa tya kufye, ‘Omu shi shii nawa kutya omukulukadi wange okwa dalela nge ovanamati vavali. 28 Ndele umwe okwa fiya nge po, nonda ti: “Oku na okukala a nyanyaulwa po filufilu,” noinandi mu mona vali fiyo opaife. 29 Ngeenge omwa kufa nge vali ou, ndele ta mono oshiponga nokufya, otamu etele nge ouyahame, fiyo osheshi nda ya mOmbila* moukulupe wange.’

30 “Molwaashi tate oku hole okaana oko tau pu mo, shimha twa shuna kuye tuhe li nako, 31 ndele ta mono diva kutya katu li nako, ota fi, novapiya voye otave ke mu nyikifa oluhodi, fiyo osheshi a ya mOmbila* moukulupe waye. 32 Omupiya woye okwa udanekela tate shi na sha nokaana, a ti, ‘Ngeenge inandi ka alulila kwoove, ohandi ka kala ndi na etimba kutate fiyo alushe.’ 33 Alikana, pitika okaana ka shune novamwameme, ame ndi fyaale po ndi li omupika womwene wange. 34 Ohandi dulu ngahelipi okushuna kutate ndihe li nokaana? Inandi hala nande okumona tate a nyika oluhodi.”