Habakuk
3 Eilikano lomuprofeti Habakuk a nyika oluhodi:*
2 Omwene Jehova, onda uda ehokololo kombinga yoye.
Omwene Jehova, onda kuminwa oilonga yoye.
We i longa oule weedula!*
We i shiivifa oule weedula.*
Alikana tu dimbuluka u tu file onghenda, eshi to ka holola ehandu loye.
3 Kalunga okwe uya a dja kuTeman,
Omuyapuki a dja komhunda yaParan. (Sela)*
Efimano laye ola li la tuvikila eulu;
Edu alishe ola li tali mu tange.
4 Ouyelele waye owa li wa twa wa fa wetango.
Meke laye omwa dja eenhe mbali tadi minikile
Opo eenghono daye da li da holekwa.
5 Oudu wolutapo otau mu tetekele,
Noshidu shidjuu otashi mu shikula.
6 Okwa fikama a yukilila, nota ndjungandjunga edu.
Eshi a tala oiwana, okwe i ningifa i kakame.
Eemhunda odo da kala po okudja nalenale oda hanaunwa po,
Noikulundudu yopefimbo lonale oya teyaulwa po.
Eendjila daye oda kala po okudja nale.
7 Onda mona omatwali omuKushan e li moshiponga.
Nomalapi omatwali omedu laMidian taa kakama.
8 Omwene Jehova, mbela owa handukila omilonga,
Mbela owa handukila omilonga, eshi ehandu loye la xwama?
Ile owa fula onya omolwefuta?
Osheshi ove owa londa eenghambe doye;
Omatemba oye a findana.*
9 Owa kufa outa woye nowe lilongekida okuumba.
Eedibo* oda longekidwa okulonga oilonga yado she likolelela keano. (Sela)
Owa tukula edu nomilonga.
10 Eemhunda oda hovela okudekweta kouyahame, eshi de ku mona.
Odula yepoola oya kunguluka medu olo.
Omeva omoule okwa popoma mokule.
Nokufuluka mo, ngaashi omunhu a yelula omaoko mombada.
11 Etango nomwedi inai pita i minikile.
Oikuti yoye oya dja mo ngaashi ouyelele.
Eonga loye ola li tali vema ngaashi oluvadi tali shela.
12 Owa endaenda kombada yedu u na ehandu.
Nomolwehandu, owa nyanyaula* oiwana.
13 Owa ya u ka xupife ovanhu voye, u xupife omuvaekwa woye.
Owa hanauna po omuwiliki* weumbo lomukolokoshi.
Ola li la hanaunwa po okudja kekanghameno fiyo okoxulo.* (Sela)
14 Omitwe dovakwaita vaye owe di nyanyaula po noilwifo* yaye mwene.
Eshi va li va totela nge ngaashi oshikungulu va hanaune nge po.
Ova li va hafa, eshi va li va pangela omhangela yokudipaa omufininikwa meholeko.
15 Owa taulula neenghambe doye mokati kefuta,
Mokati komakufikufi omeva mahapu.
Omakipa ange okwa li a pwa eenghono;
Omaulu ange okwa li taa kakama.
Ndele ohandi teelele nengungumano efiku loudjuu,
Osheshi otali hange ovanhu ovo have tu ponokele.
17 Nonande omuti womukwiyu itau twiyuka,
Nomiviinyu itadi imi oiimati;
Nonande omuti wolumono itau imi,
Nomapya* itaa menifa oilikolomwa;
Nonande oufita otau lihane mo moshiunda,
Neengobe otashi dulika diha ka kale mo vali moyuunda;
18 Ame ohandi hafe omolwaJehova;
Nohandi ka nyakukwa omolwaKalunga kexupifo lange.
19 Omwene Omunamapangelo aeshe Jehova oye eenghono dange;
Eemhadi dange ote ke di pameka, ngaashi omakondo omenye.
Nota ka endifa nge koikulundudu.
Komuwiliki wovaimbi; eimbilo nali imbwe nouxumbafeta.