Exodus
5 Konima yaasho, Moses naAron ova ya kuFarao, ndele tava ti kuye: “Jehova, Kalunga kaIsrael, okwa ti, ‘Lekela oshiwana shange, opo shi ka danene nge oshivilo mombuwa.’” 2 Ashike Farao okwa ti: “Jehova olyelye, opo ndi dulike kondaka yaye, ndi lekele Ovaisrael? Jehova kandi mu shii nandenande, navali, itandi ka lekela Ovaisrael.” 3 Opo nee ova nyamukula va ti: “Kalunga kOvaheberi okwa popya nafye. Alikana, natu ye molweendo lomafiku atatu mombuwa, opo tu ka yambele Jehova, Kalunga ketu. Ngeenge hasho, ote ke tu etela omukifi, ile a efe tu dipawe neongamukonda.” 4 Ohamba yaEgipiti oye va nyamukula ya ti: “Moses naAron, omolwashike tamu kufa ovanhu poilonga yavo? Shuneni koilonga yeni.” 5 Farao okwa tya vali: “Taleni kutya ovanhu vangapi tava longo moshilongo eshi, ndele omwa hala oku va efifa po oilonga yavo.”
6 Mefiku olo, Farao okwa lombwela ovayandji voilonga novapashukili voilonga, a ti: 7 “Ovanhu ovo inamu va pa vali oitekaukile yoihati va folome eedopi. Va efeni va ye ve ke i konge vo vene. 8 Ashike natango omu na oku va pula va folome eedopi di fike pwaado hava foloma shito. Inamu ninipika oilonga yavo, molwaashi ovakwandede. Nomolwaasho tava ingida tava ti, ‘Otwa hala okuya; otwa hala oku ka yambela Kalunga ketu!’ 9 Va longifeni oilonga idjuu, noku va kaleka ve lipyakidila, opo vaha yandje elitulemo keendjovo doipupulu.”
10 Onghee ovayandji voilonga novapashukili voilonga ova ya, ndele tava lombwele ovanhu tava ti: “Farao okwa ti, ‘Itandi mu pe vali oitekaukile yoihati. 11 Indeni mu ka konge nye vene oitekaukile yoihati; taleni kutya otamu i hange peni, ashike oilonga yeni itai ninipikwa nandenande.’” 12 Opo nee ovanhu ove lihanena medu alishe laEgipiti tava kongo oihati ve ke i nyanyaule. 13 Ovayandji voilonga ova kala noku va lombwela tava ti: “Keshe umwe oku na okumanifa oilonga yaye efiku keshe, ngaashi ashike mwa kala hamu ningi, eshi mwa li hamu pewa oitekaukile yoihati.” 14 Natango, ovapashukili voilonga, ovo va hoololwa kovayandji voilonga vaFarao va kale tava pashukile Ovaisrael vakwao, ova li va dengwa. Ove va pula va ti: “Omolwashike inamu foloma eedopi di fike pwaado hamu foloma shito? Oilonga yeni inamu i wanifa po onghela nonena.”
15 Ovapashukili voilonga ovo vOvaisrael ova ya kuFarao tava ngongota tava ti: “Omolwashike to ungaunga ngaho novapiya voye? 16 Ihave tu pe oitekaukile yoihati, ashike otave tu lombwele kutya, ‘Folomeni eedopi!’ Ovapiya voye otava dengwa, ashike ovanhu voye ovo ve na epuko.” 17 Farao okwa tya: “Nye ovakwandede, nye ovakwandede! Nomolwaasho tamu ti, ‘Otwa hala okuya; otwa hala oku ka yambela Jehova.’ 18 Indeni paife, shuneni koilonga! Itamu pewa oitekaukile yoihati, ashike natango omu na okuwanifa po omuvalu weedopi.”
19 Ovapashukili voilonga vOvaisrael ova mona kutya ove li moupyakadi wa kwata moiti omolwelombwelo olo kutya: “Kamu na okuninipika nandenande omuvalu weedopi odo mu na okufoloma efiku keshe.” 20 Konima yaasho, ova shakena naMoses naAron, ovo va li va fikama, va teelela okushakena navo, eshi tava di kuFarao. 21 Ovapashukili voilonga ova tya kuMoses naAron: “Jehova na tale oilonga yeni noku mu tokola, osheshi omwa ningifa Farao novapiya vaye ve tu tonde* nomwa tula eongamukonda meke lavo ve tu dipae.” 22 Opo nee Moses okwa pula Jehova, ta ti: “Jehova, omolwashike to hepeke oshiwana eshi? Omolwashike wa tuma nge? 23 Okudja ngoo eshi nda li nda ka popya naFarao medina loye, okwa kala ta ungaunga nai noshiwana shoye, ndele ove ino xupifa nandenande ovanhu voye.”