Hesekiel
10 Eshi nda li handi tale, onda mona kombada yoshilyatelo, osho sha li kombada yomitwe dovakerubi, oshinima sha fa okamanya kosafir sha holoka pombada yavo, neholokepo lasho ola li la fa lolukalwapangelo. 2 Opo nee okwa lombwela omulumenhu, oo a li a djala oshikutu sholiina, ta ti: “Inda pokati komalola, koshi yovakerubi, ndele to yadifa omake oye aeshe nomakala a xwama taa di pokati kovakerubi noku e lihanifila moshilando ashishe.” Onghee okwe uya mo, fimbo nda li handi tale.
3 Ovakerubi ova li va fikama kolulyo leumbo, eshi omulumenhu a ya mo, noshilemo osha li sha pwipwikila omukala womeni. 4 Noshinge shaJehova osha dja ko kovakerubi sha ya koshivelo sheumbo, nomokweendela ko kwefimbo, eumbo ola li la pwipwikilwa koshilemo, nomukala owa li u yadi ouyelele wa twa woshinge shaJehova. 5 Nelinyengo lomavava ovakerubi ola li la udika momukala wokondje, la fa ewi laKalunga Omunaenghono adishe, ngeenge ta popi.
6 Opo nee okwa yandja elombwelo komulumenhu, oo a djala oshikutu sholiina, ta ti: “Kufa omundilo pokati komalola, pokati kovakerubi,” nokwa ya mo, ndele ta kala a fikama pomunghulo welola. 7 Opo nee umwe womovakerubi okwa nana eke laye e li yukifa komundilo oo wa li pokati kovakerubi. Okwa kufa omundilo umwe, ndele te u tula meenyala adishe daao a li a djala oshikutu sholiina, oo e u kufa po, ndele ta di mo. 8 Ovakerubi ova li ve na oshinima osho tashi monika sha fa omake omunhu koshi yomavava avo.
9 Eshi nda li handi tale, onda mona omalola ane e li polwamba lovakerubi; pomukerubi keshe opa li elola limwe, nomalola okwa li taa monika a fa taa vema ngaashi okamanya kokrisolit. 10 Shi na sha neholokepo lao, ane omuo okwa li a faafana, taa monika a fa elola li li melola likwao. 11 Ngeenge okwe linyenge, ohaa dulu okuya keembinga adishe nhee nopehe na okutanauka, molwaashi ohaa i konhele oko omutwe wa taalela nopehe na okutanauka. 12 Omalutu ovakerubi aeshe, eembuda davo, omake avo, omavava avo nosho yo omalola, omalola avo aeshe ane, okwa li e yadi omesho keembinga adishe. 13 Shi na sha nomalola, onda uda ondaka ye a ingida tai ti: “Omalola, linyengeni!”
14 Keshe umwe* okwa li e na oipala ine. Oshipala shotete osha li oshipala shomukerubi, oshipala oshitivali osha li oshipala shomulumenhu,* oshititatu osha li oshipala shonghoshi, noshitine osha li oshipala shonhwa.
15 Novakerubi ohava yeluka, ova li oishitwa* oyo nda monene pomulonga Kebar, 16 nongeenge ovakerubi ove linyenge, omalola ohae linyenge pamwe navo; nongeenge ovakerubi ova yelula po omavava avo a kale pombada elela yedu, omalola ihaa tanauka, ile a dje ko kombinga yao. 17 Ngeenge oya kanghama, ohaa kanghama; nongeenge oya fikama, ohaa fikama pamwe nayo, osheshi omhepo oyo tai longo moishitwa oyo* oya li muo.
18 Opo nee oshinge shaJehova osha dja po poshivelo sheumbo, ndele tashi kanghama kombada yovakerubi. 19 Ovakerubi ova yelula omavava avo, ndele tava fikama va dje ko kombada yedu, eshi nda li handi tale. Omalola okwa li yo pamwe navo, eshi tava i. Ova kanghama poshivelo shomuvelo wokoushilo weumbo laJehova, noshinge shaKalunga kaIsrael osha li kombada yavo.
20 Ei oyo ya li oishitwa* oyo nda monene koshi yaKalunga kaIsrael pomulonga Kebar, onghee onda ka mona kutya oya li ovakerubi. 21 Aishe ine oya li i na oipala ine, omavava ane nosho yo osho tashi monika sha fa omake omunhu koshi yomavava ayo. 22 Neholokepo loipala yayo ola li la fa oipala oyo nda monene pomulonga Kebar. Keshe shimwe ohashi i sha yukilila komesho.