Eehamba eenhivali
3 Jehoram, omonamati waAhab, okwa ninga ohamba yaIsrael, muSamaria, momudo omuti-18 wepangelo laJosafat, ohamba yaJuda, nokwa pangela oule weedula 12. 2 Okwa kala ta longo osho shii momesho aJehova, ashike ina longa owii u fike pwaao wa longwa kuxe, ile kuina, molwaashi okwa hanauna po ongudimanya iyapuki yaBaal, oyo ya longwa kuxe. 3 Ndele okwa kanyatela kowii, oo wa longwa kuJerobeam, omonamati waNebat, oo a ningifa Ovaisrael va nyone. Ine u efa po nandenande.
4 Mesa, ohamba yaMoab, okwa li e na eedi dihapu nokwa li ha futu eedjona 100 000 nosho yo eedi deendume, odo inadi kululwa, 100 000 kohamba yaIsrael, di li eemhale.* 5 Diva eshi Ahab a fya, ohamba yaMoab oya li ya pilukila po ohamba yaIsrael. 6 Onghee pefimbo opo, ohamba Jehoram, oya dja mo muSamaria noya ongela Ovaisrael aveshe ve lilongekidile olwoodi. 7 Oya li yo ya tumina etumwalaka Josafat, ohamba yaJuda, tai ti: “Ohamba yaMoab oya pilukila nge po. Oto i ngoo pamwe naame tu ka lwife Moab?” Opo nee Josafat okwa ti: “Heeno, ohandi i. Fye naave vamwe aveke. Ovanhu vange novanhu voye vamwe aveke. Eenghambe dange neenghambe doye dimwe adike.” 8 Opo nee Josafat okwa pula, a ti: “Ohatu i nondjila ilipi?” Ohamba oya nyamukula ya ti: “Onondjila oyo ya pita mombuwa yaEdom.”
9 Ohamba yaIsrael oya ya pamwe nohamba yaJuda nosho yo ohamba yaEdom. Konima eshi va enda oule womafiku aheyali, kapa li vali omeva omonhanda nosho yo oimuna yavo, oyo ya li ye va shikula. 10 Ohamba yaIsrael oya ti: “Eshi oshidjuu neenghono. Jehova okwa ifana eehamba edi nhatu, opo e di yandje meke laMoab.” 11 Opo nee Josafat okwa ti: “Hano apa kape na omuprofeti waJehova, oo hatu dulu okupula ekwafo kuJehova okupitila muye?” Onghee umwe womovapiya vohamba yaIsrael okwa nyamukula, a ti: “Ope na Elisa, omonamati waShafat, oo a li ha tile Elia omeva keenyala.”* 12 Josafat okwa ti: “Jehova oha popi okupitila muye.” Onghee Josafat, ohamba yaIsrael, nosho yo ohamba yaEdom ova ya kuye.
13 Elisa okwa tya kohamba yaIsrael: “Omolwashike we uyila kwaame?* Inda kovaprofeti vaxo nokovaprofeti vanyoko.” Ashike ohamba yaIsrael oya tya kuye: “Ahawe, osheshi Jehova oye a ifana eehamba edi nhatu e di yandje momake aMoab.” 14 Opo nee Elisa okwa ti: “Ohandi ane kuJehova, Kalunga komatangakwaita omunamwenyo, oo handi longele,* kutya ngeno kanda li nda fimaneka Josafat, ohamba yaJuda, ngeno itandi ku tale noitandi pwilikine kwoove. 15 Etele nge paife omushiki wokaxumbafeta.”* Diva eshi omushiki wokaxumbafeta a hovela okushika, eke laJehova ole uya kombada yaye. 16 Okwa ti: “Jehova okwa ti: ‘Fa omikangha da shikulafana mefilu eli, 17 osheshi Jehova okwa ti: “Itaku kala omhepo nodula itai ka loka, ashike efilu eli otali ka yada omeva noto ka nwa mefilu eli, ove noimuna yoye.”’ 18 Ndele osho oshinima shanafangwa momesho aJehova, osheshi ota ka yandja yo Moab momake eni. 19 Omu na okuponokela oilando aishe, oyo i na omakuma a pama, noilando aishe ya denga mbada, nomu na okuka po omuti keshe muwa nokufitika eefifiya adishe domeva nosho yo okunyonauna po epya keshe liwa nomamanya.”
20 Ongula, pefimbo leendjayambo dongula, ombadilila omeva okwa li taa kunguluka okudja kombinga yaEdom, nefilu ola li la yada omeva.
21 Eshi Ovamoab aveshe va uda kutya eehamba ode uya oku va lwifa, ova ifana ovalumenhu aveshe ovo tava dulu okuhumbata oilwifo,* ndele tava kala ofika peengaba. 22 Eshi va penduka ongula inene, etango ola li tali minikile kombada yomeva, nOvamoab, ovo va li va taalela ketango, ova li ve wete omeva a tilyana a fa ohonde. 23 Ova ti: “Ei ohonde. Eehamba oda dipaafana shili neongamukonda. Onghee Moab ka tale oixuulwa.” 24 Eshi ve uya monhanda yaIsrael, Ovaisrael ova fikama, nova hovela okudipaa Ovamoab, ovo va li tave va faduka po. Ova ya va finda muMoab, nova enda tava dipaa Ovamoab. 25 Ova hanauna po oilando yomuMoab, nomulumenhu keshe okwa kupula emanya mepya keshe liwa lomedu olo, va ndubila mo omamanya. Ova fitika eefifiya adishe domeva nova ka po omiti adishe odo diwa. Xuuninwa, ekuma lomamanya laKir-hareset olo ashike la li la xupa po la fikama, novaumbi vomamanya ova li ve li dingilila nove li teya po.
26 Eshi ohamba yaMoab ya mona kutya ova findwa molwoodi, oya kufa ovalumenhu 700 va homata omaongamukonda, opo va faduke po tava pitile kombinga oko kwa ama ohamba yaEdom, ashike kava li tava dulu oku shi ninga. 27 Onghee oya kufa omonamati wayo woshiveli, oo a li ta ka pangela ponhele yayo, noye mu yamba po e li exwikiloyambo kekuma. Ova li va handukila unene Israel nova efa po oku mu lwifa, ndele tava shuna kedu lavo.