Eehamba dotete
3 Salomo okwa ninga oshitenya shaFarao, ohamba yaEgipiti. Okwa hombola* omonakadona waFarao noku mu twala kOshilando shaDavid, fiyo osheshi a mana okutunga eumbo laye, eumbo laJehova nosho yo ekuma olo la dingilila Jerusalem. 2 Ashike ovanhu ova li natango tava yambele keenhele dokoikulundudu, molwaashi natango kapa li eumbo lokufimanekela edina laJehova. 3 Salomo okwa twikila okukala e hole Jehova mokushikula eenghedimhango daxe David, ndele nande ongaho, okwa li ha yambe omayambo nomaxwikiloyambo keenhele dokoikulundudu.
4 Ohamba oya ya kuGibeon i ka yambele oko, osheshi onhele yokoshikulundudu osho oya li ya fimana.* Salomo okwa yamba omaxwikiloyambo 1 000 koaltari oyo. 5 Jehova okwe lihololela Salomo muGibeon okupitila mondjodi oufiku, ndele ta ti kuye: “Pula osho wa hala ndi ku pe.” 6 Salomo okwa ti: “Owa ulikila omupiya woye, tate David, ohole inene i na oudiinini, eshi a kala omudiinini, omunashili nomuyuki koshipala shoye. Owa twikila oku mu ulikila ohole inene i na oudiinini fiyo okunena, eshi we mu pa omonamati a kale omutumba kolukalwapangelo laye. 7 Ndele paife, Jehova, Kalunga kange, owa ninga omupiya woye ohamba ponhele yatate, David, nonande ame omunyasha* nokandi na owino.* 8 Omupiya woye oku li mokati kovanhu ovo wa hoolola, ovanhu ovo vahapu neenghono itava dulu okuvalulwa. 9 Onghee pa omupiya woye omutima u na eduliko, opo a dule okutokola ovanhu voye, a tokole pokati kaasho shiwa naasho shii, osheshi olyelye ta dulu okutokola oshiwana shoye osho shihapu?”*
10 Jehova okwa li a hafa, eshi Salomo e mu pula oshinima osho. 11 Opo nee Kalunga okwa tya kuye: “Molwaashi owa pula nge oshinima osho, noino pula u pewe omwenyo mule,* ile oupuna, ile efyo lovatondi voye, ndele owa pula ounongo, opo u dule okutokola oinima yopamhangu, 12 ohandi ke ku ningila osho wa pula nge. Ohandi ku pe omutima u na ounongo neudeko, noitapa ka kala nandenande omunhu e ku fa, ngaashi ashike paha li nande umwe e ku fa. 13 Natango, osho ino pula, ohandi ke shi ku pa, oupuna nefimano, noitapa ka kala ohamba imwe ye ku fa pefimbo* loye. 14 Ngeenge owa ende meendjila dange mokudulika komalombwelo nokoipango yange, ngaashi xo David a li a ninga, ohandi ku pe yo omwenyo mule.”*
15 Eshi Salomo a penduka, okwa mona kutya okwa li ta tu ondjodi. Opo nee okwa ya kuJerusalem nokwa kala ofika komesho yoshikefa shehangano laJehova, ndele ta yambe omaxwikiloyambo nomayambo oukumwe, nokwa ningila ovapiya vaye aveshe oshivilo.
16 Pefimbo opo, ovakainhu vavali eembwada ova li ve uya kohamba, ndele tava fikama komesho yayo. 17 Omukainhu wotete okwa tya: “Omwene wange, omukainhu ou ohatu di naye meumbo limwe, nonda dala okaana ofimbo a li meumbo. 18 Mefiku etitatu, konima eshi nda dala, omukainhu ou naye okwa dala. Otwa li pamwe tu li ashike vavali, nomeumbo kamwa li vali omunhu umwe. 19 Mokati koufiku, okamonamati komukainhu ou oka fya, molwaashi okwe ka lyaminina. 20 Onghee okwa penduka mokati koufiku, ndele ta kufa po pwaame okamonamati kange, ofimbo omupiya woye okakadona a li a kofa, nokaana kange okwe ka tula mekolo laye, ndele ta tula kaye, oko ka fya, mekolo lange. 21 Eshi nda penduka ongula ndi nyamife okamonamati kange, onda mona kutya oka fya. Onghee onde ka konakona noukeka ongula, nonda mona kutya kake fi okamonamati kange oko nda dala.” 22 Ashike omukainhu mukwao okwa tya: “Ahawe, okamonamati kange oko aka ke na omwenyo, koye oko aka ka fya.” Ndele omukainhu wotete okwa tya: “Ahawe, okamonamati koye oko aka ka fya, kange oko aka ke na omwenyo.” Osho va kala tava tu eemhata ngaho komesho yohamba.
23 Xuuninwa, ohamba oya ti: “Ou ota ti, ‘Okamonamati kange oko aka ke na omwenyo, koye oko aka ka fya!’ namukwao ota ti, ‘Ahawe, okamonamati koye oko aka ka fya, kange oko aka ke na omwenyo!’” 24 Ohamba oya ti: “Etelei nge eongamukonda.” Onghee ova etela ohamba eongamukonda. 25 Opo nee ohamba oya ti: “Teteni okaana oko ke na omwenyo pokati, noshipambu shimwe tamu shi pe omukainhu umwe, nashikwao tamu shi pe mukwao.” 26 Diva ina yokaana oko ke na omwenyo okwa indila ohamba, osheshi okwa kenukila okamonamati kaye. Okwa ti: “Alikana, omwene wange! Yandja okaana oko ke na omwenyo komukainhu ou! Inamu ka dipaa nandenande!” Omukainhu mukwao okwa ti: “Okaana oko itaka ningi kange, ile koye! Naka tetwe ashike pokati!” 27 Opo nee ohamba oya nyamukula ya ti: “Yandjeni okaana komukainhu wotete! Inamu ka dipaa nandenande, osheshi oye ina yako.”
28 Onghee Israel ashishe osha uda kombinga yetokolo olo ohamba ya ninga, nosha li sha kuminwa* ohamba, molwaashi osha mona kutya ounongo, oo wa dja kuKalunga, oo we i kwafela i tokole pauyuki.