Josua
2 Josua, omonamati waNun, okwa tuma meholeko ovalumenhu vavali va dja kuSittim ve li eendadi. Okwe va lombwela, a ti: “Indeni, ndele tamu konakona edu, unene tuu laJeriko.” Onghee ova ya, ndele tava i meumbo lombwada Rahab, nomo va kala omo. 2 Ohamba yaJeriko oya li ya lombwelwa kutya: “Tala, omwe uya ovalumenhu Ovaisrael oufiku, ve uya okundaada edu.” 3 Opo nee ohamba yaJeriko oya tuma ovatumwa kuRahab, tai ti: “Pitifa mo ovalumenhu ovo ve uya meumbo loye nomo hava di, osheshi ove uya okundaada edu alishe.”
4 Ndele Rahab okwa kufa ovalumenhu ovo vavali, ndele te va holeke. Opo nee okwa tya: “Kwaame okwe uyile shili ovalumenhu, ndele nghi shi shii kutya ova dja peni. 5 Ashike eshi kwa toka, eshi omuvelo woshilando wa li pokwiidilwa, ovalumenhu ova dja mo. Kandi shi shii kutya ovalumenhu ovo ova ya peni, ndele ngeenge omwa endelele mu va shikule, otamu ke va hanga.” 6 (Ashike okwa li a ya navo, ndele te va holeke pombada yeumbo laye, pokati koipandi yoimeno, oyo hai longwa oliina, oyo ya li pombada yeumbo.) 7 Opo nee ove va shikula va finda komulonga waJordan opo hapa taulukilwa, nomuvelo woshilando owa li wa idila, eshi ovo tave va shikula va dja mo.
8 Ofimbo ovalumenhu ovo inava kofa, Rahab okwa ya kuvo pombada yeumbo. 9 Okwa lombwela ovalumenhu ovo, ta ti: “Ondi shi shii kutya Jehova ote mu pe edu eli, nonokutya otwe mu tila. Ovanhu aveshe vomedu eli otava kakama omolweni, 10 molwaashi otwa uda nghee Jehova a pwiininika omeva mEfuta Litilyana moipafi yeni, eshi mwa li tamu di muEgipiti, naasho mwa ningila eehamba mbali dOvaamori, Sihon naOg, odo mwa hanauna po filufilu kombinga ikwao* yomulonga waJordan. 11 Eshi twe shi uda otwa li twa mbadapala,* nokape na vali oo a li e na ouladi,* osheshi Jehova, Kalunga keni, oye Kalunga oo e li meulu nokombada yedu. 12 Molwaashi onde mu ulikila ohole i na oudiinini, aneni moipafi yange kuJehova kutya otamu ka ulikila yo oukwaneumbo watate ohole i na oudiinini; omu na oku pa nge sha osho tashi ulike kutya otamu ka wanifa po eendjovo deni.* 13 Omu na okuxupifa tate, meme, ovamwamememati novamwamemekadona, novanhu vavo aveshe, nomu na oku tu* xupifa mefyo.”
14 Opo nee ovalumenhu ovo ova tya kuye: “Ohatu ka yandja eemwenyo detu ponhele yeemwenyo deni.* Ngeenge inamu popya osho twa li twa endela, ohatu ke mu ulikila ohole i na oudiinini nonokutya otu li ovalineekelwa, eshi Jehova te ke tu pa edu.” 15 Konima yaasho, okwe va kulukifila pedu nongodi okupitila mekende, osheshi eumbo laye ola li la ama kekuma loshilando. Sha yela kutya, okwa li a shiya kekuma loshilando. 16 Opo nee okwe va lombwela, ta ti: “Indeni koshitukulwa shokeemhunda, ndele tamu hondama oko oule womafiku atatu, opo ovo tave mu shikula vehe mu hange. Ngeenge ovo tave mu shikula ova aluka, opo nee otamu dulu okuya nondjila yeni.”
17 Ovalumenhu ovo ova tya kuye: “Ohatu ka manguluka ko ketimba li na sha neano eli we tu anifa, 18 ngeenge eshi hatu uya medu eli otwa hange wa mangela ongodi itilyana mekende omo we tu pitifila. Ou na okuya meumbo pamwe naxo, nyoko, ovamwaxo neumbo laxo alishe. 19 Ashike ngeenge umwe okwa piti mo meumbo loye, ndele ta i kondje, oye mwene a etifa efyo laye,* nohatu ka kala twa manguluka ko ketimba. Ndele ngeenge oshiponga osha hange* umwe oo a kala pamwe naave meumbo, ofye tu na etimba lefyo laye. 20 Ashike ngeenge owa popi osho twa li twa endela, ohatu ka manguluka ko ketimba li na sha neano olo we tu anifa.” 21 Rahab okwe va nyamukula, a ti: “Nashi kale ngaashi mwa popya.”
Opo nee okwe va lekela, nova ya nondjila yavo. Konima yaasho, okwa mangela ongodi itilyana mekende. 22 Ova dja po nova ya koshitukulwa shokeemhunda, ndele tava kala ko oule womafiku atatu, fiyo osheshi ovo tave va shikula va shuna. Ovo tave va shikula ova kala tave va kongo mondjila keshe, ashike inave va mona. 23 Ovalumenhu ovo vavali ova dja ko koshitukulwa shokeemhunda nova tauluka omulonga, ndele tava i kuJosua, omonamati waNun. Ove mu lombwela oinima aishe oyo ye va ningilwa. 24 Opo nee ova lombwela Josua, tava ti: “Jehova okwe tu pa edu alishe. Ovanhu aveshe ovo ve li medu olo ova tila omolwetu.”