Omafimbo omativali
28 Ahas okwa ninga ohamba, eshi a li e na eedula 20, nokwa pangela muJerusalem oule weedula 16. Ka li a longa osho sha yuka momesho aJehova, ngaashi xekulululwa, David, a li a ninga. 2 Ponhele yaasho, okwa shikula eendjila deehamba daIsrael, nokwa ningila nokuli ooBaal oihongwafano ya hambulwa moshivela.* 3 Kakele kaasho, okwa li a ninga omatwiminoyambo mEfilu lOmonamati waHinnom* nokuxwikila mo ovanamati vaye momundilo, ta shikula oilonga itondifa, oyo ya li hai longwa koiwana, oyo Jehova a taataa mo moipafi yOvaisrael. 4 Okwa kala yo ta yambe omayambo nomatwiminoyambo keenhele dokoikulundudu, koikulundudu nosho yo koshi yomuti keshe wa kula.
5 Onghee Jehova, Kalunga kaye, okwa li e mu yandja momake ohamba yaSiria, nova li ve mu finda, ndele tava kwata ko eenghwate dihapu neenghono noku di twala kuDamaskus. Okwa li yo a yandjwa momake ohamba yaIsrael, oyo ya li ya dipaa ovanhu vaye vahapu neenghono. 6 Peka, omonamati waRemalia, okwa li a dipaa Ovajuda 120 000 mefiku limwe, ovalumenhu aveshe omapenda, molwaashi ova li va efa po Jehova, Kalunga kooxekulululwa. 7 Sikri, omukwaita Omuefraim, okwa li a dipaa omonamati wohamba, Maasea, naAsrikam, oo a li ta pashukile ombala,* nosho yo Elkana, oo a li omutivali a shikula ohamba. 8 Kakele kaasho, Ovaisrael ova li va twala ovamwaina 200 000 moukwatwa, ovakainhu, ovanamati novanakadona; ova li yo va kufa po oixuulwa* ihapu neenghono noku i twala kuSamaria.
9 MuSamaria omwa li omuprofeti waJehova wedina Oded, nokwa li a ka shakeneka etangakwaita, olo la li tali uya kuSamaria, ndele ta ti kulo: “Taleni, Jehova, Kalunga kooxokulululwa, okwa li a handukila Ovajuda, nomolwaasho e va yandja momake eni, nomwe va dipaa monghedi inyanyalifa, na Kalunga okwa mona osho mwa ninga. 10 Paife omwa hala okuninga ovanhu vomuJuda novomuJerusalem ovapiya veni ovalumenhu novakainhu. Mbela kungaho nanye kamu na ondjo koshipala shaJehova, Kalunga keni? 11 Pwilikineni kwaame, ndele tamu shunifa ovamwaxo, ovo mwa ninga eenghwate, osheshi Jehova okwe mu handukila neenghono.”
12 Opo nee omalenga amwe omOvaefraim, Asaria, omonamati waJohanan, Berekia, omonamati waMesillemot, Jehiskia, omonamati waSallum, nosho yo Amasa, omonamati waHadlai, okwa shakeneka ovo va dja moshikonga sholwoodi, 13 ndele taa ti kuvo: “Inamu eta mo eenghwate omu, osheshi otashi tu ningifa tu kale tu na etimba koshipala shaJehova. Osho mwa hala okuninga otashi weda ko komanyono nosho yo komatimba etu, molwaashi omatimba etu omahapu nale, nOvaisrael ova handukilwa neenghono.” 14 Onghee ovakwaita va homata ova yandja komalenga nosho yo keongalo alishe eenghwate noinima oyo va nyeka ko. 15 Opo nee ovalumenhu, ovo va nangekwa po, ova fikama, ndele tava kufa eenghwate noku di pa oikutu, ya dja moixuulwa, molwaashi adishe kada li da djala sha. Onghee ove di djaleka, ndele tave di pe eenghaku, oikulya noikunwa nosho yo omaadi oku vava. Ova londeka yo keendongi ovo va nghundipala noku va twala kovamwaina kuJeriko, oshilando shomilunga. Lwanima, ovalumenhu ovo ova ka shuna kuSamaria.
16 Pefimbo opo, ohamba Ahas oya li ya pula ekwafo keehamba daAssiria. 17 Natango, Ovaedom ova li va ponokela Ovajuda noku va twala moukwatwa. 18 Ovafilisti ova li yo va ponokela oilando yomuShefela noyomuNegeb, yaJuda, nova li va kwata ko Bet-semes, Aijalon, Gederot, Soko needoolopa dasho,* Timna needoolopa dasho, naGimso needoolopa dasho, ndele tava kala oko. 19 Jehova okwa li a ninipika Ovajuda omolwohamba yaIsrael, Ahas, oyo ya li ihe fi idiinini kuJehova noya ningifa Ovajuda va kale ve na elihumbato lii.
20 Lwanima, Tiglat-pilneser, ohamba yaAssiria, okwa li e uya oku mu lwifa noku mu etela oudjuu, ponhele yoku mu pameka. 21 Ahas okwa kufa oinima aishe meumbo laJehova, meumbo* lohamba nosho yo momaumbo omalenga noku i yandja i li oshali kohamba yaAssiria, ashike osho inashi mu kwafela sha. 22 Ohamba Ahas kaya li nokuli idiinini kuJehova nopefimbo opo ya li moudjuu. 23 Ahas okwa li a hovela okuyambela oikalunga yokuDamaskus, oyo ya li ye mu finda nokwa popya a ti: “Molwaashi oikalunga yeehamba daSiria oye di kwafela, ohandi i yambele, opo naame i kwafele nge.” Ashike osho oshe mu etela nosho yo Ovaisrael aveshe omaupyakadi. 24 Shikwao vali, Ahas okwa ongela oilongifo aishe yomeumbo laKalunga kashili. Okwa teta moipambu oilongifo yomeumbo laKalunga kashili, ta idile omivelo domeumbo laJehova nokuliningila eealtari koxulo yepandavanda keshe muJerusalem. 25 Okwa li a ninga eenhele dokoikulududu moilando aishe yaJuda, opo a yambele ko ookalunga vamwe omatwiminoyambo, nokwa li a udifa nai Jehova, Kalunga kooxekulululwa.
26 Ondjokonona yaye aishe naashishe osho a ninga, okudja pehovelo fiyo opexulilo, oya shangwa mEmbo lEehamba daJuda nodaIsrael. 27 Opo nee Ahas okwa nangekwa pooxekulululwa, nove mu paka moshilando, muJerusalem, ashike inave mu twala konhele oko haku pakwa eehamba daIsrael. Omonamati waye, Hiskia, okwa ninga ohamba ponhele yaye.