Deuteronomion

16 “Dimbulukeni omwedi waAbib* nokudana Opaasa yaJehova, Kalunga keni, osheshi momwedi waAbib, omo Jehova, Kalunga keni, e mu kufa mo muEgipiti konguloshi. 2 Omu na yo okuyamba omayambo Opaasa yaJehova, Kalunga keni, taa di meedi, moikombo nomeengobe, monhele oyo Jehova a hoolola mu fimanekelwe edina laye. 3 Inamu lya sha sha ya efulika pamwe nomayambo oo, omu na okulya omungome inau ya efulika oule womafiku aheyali, molwaashi medu laEgipiti omwa dja mo meendelelo. Eshi tamu ningi ngaho, otamu dimbuluka omahepeko oo mwa li tamu piti muo, noitamu dimbwa nandenande mokukalamwenyo kweni efiku olo mwa dja muEgipiti. 4 Mokati keni inamu hangika nande olumbololo la ya efulika moitukulwa yeni aishe oule womafiku aheyali, nombelela yoshinamwenyo osho tamu yambe konguloshi mefiku lotete, inai tuvikilwa oufiku aushe fiyo efiku lomongula. 5 Itamu ka pitikwa mu yambele omayambo Opaasa moshilando keshe shomoilando oyo Jehova, Kalunga keni, te mu pe. 6 Ndele oku na okuyambelwa monhele oyo Jehova, Kalunga keni, a hoolola mu fimanekelwe edina laye. Omu na okuyamba omayambo Opaasa konguloshi diva, ngeenge etango la ningine, pefimbo* olo mwa dile muEgipiti. 7 Omu na oku a teleka noku a lila monhele oyo Jehova, Kalunga keni, ta ka hoolola, opo nee efimbo longula otamu ka shuna komatwali eni. 8 Omu na okulya omungome inau ya efulika oule womafiku ahamano, nomefiku etiheyali otaku ka kala oshoongalele shokufimanekifa Jehova, Kalunga keni. Kamu na okulonga sha mefiku olo.

9 “Omu na okuvalula oivike iheyali. Noivike oyo iheyali omu na oku i valula okudja pefimbo olo mwa hovela okuteya oilya momapya noshikashulifo. 10 Opo nee omu na okudana Oshivilo shOivike omolwaJehova, Kalunga keni, nokuyandja omayambo ehalo liwa taa di momake eni, she likolelela komanangeko noupuna oo mwa pewa kuJehova, Kalunga keni. 11 Otamu ka kala yo mwa hafa moipafi yaJehova, Kalunga keni, nye novanamati veni, ovanakadona veni, ovapiya veni ovalumenhu, ovapiya veni ovakainhu, Ovalevi ovo hava di moilando* yeni, ovanailongo, ounona ovo vehe na ooxe,* novafiyekadi ovo ve li mokati keni, monhele oyo Jehova, Kalunga keni, a hoolola mu fimanekelwe edina laye. 12 Dimbulukeni kutya omwa li ovapika muEgipiti, nomwa li hamu diinine nokudulika komaufomhango aa.

13 “Omu na okudana Oshivilo shOmatwali* oule womafiku aheyali, eshi tamu ongele oilikolomwa oyo ya dja momapya eni,* moikolelo yeni yomaviinyu nosho yo omaadi oo mwa henga. 14 Kaleni mwa hafa pefimbo loshivilo sheni, nye novanamati veni, ovanakadona veni, ovapiya veni ovalumenhu, ovapiya veni ovakainhu, Ovalevi, ovanailongo, ounona ovo vehe na ooxe novafiyekadi, ovo ve li moilando yeni. 15 Oshivilo osho tashi fimanekifa Jehova, Kalunga keni, omu na oku shi danena monhele oyo Jehova ta hoolola, molwaashi Jehova, Kalunga keni, ota ka nangeka noupuna oilikolomwa yeni aishe nakeshe osho tamu ningi, notamu ka kala mwa hafa neenghono.

16 “Ovalumenhu aveshe ovo ve li mokati keni ove na okuholoka lutatu momudo koshipala shaJehova, Kalunga keni, monhele oyo a hoolola: pOshivilo shOmingome inadi ya Efulika, pOshivilo shOivike nopOshivilo shOmatwali,* ashike kape na nande oumwe womuvo e na okuholoka koshipala shaJehova e li eenyala dongaho. 17 Keshe umwe oku na okweeta eeshali, she likolelela komanangeko noupuna oo Jehova Kalunga e mu pa.

18 “Omu na okuhoolola ovatokoli novaleli vepata keshe moilando* aishe oyo Jehova, Kalunga keni, te mu pe, nove na okutokola ovanhu netokolo li li pauyuki. 19 Inamu pengifa ouyuki, noinamu kala mu na okatongo, ile mu tambule ombubo, osheshi ombubo ohai twikifa omesho omunaendunge nohai pengifa eendjovo domuyuki. 20 Lalakaneneni ouyuki, ndele hashinima shimwe, opo mu kale nomwenyo nomu ka kale medu olo Jehova, Kalunga keni, te mu pe.

21 “Inamu twika omuti woludi keshe u li opala iyapuki* popepi noaltari oyo mwa ningila Jehova, Kalunga keni.

22 “Inamu lidikila nande ongudimanya iyapuki, oshinima osho Jehova, Kalunga keni, e tonde.