Omafimbo omativali
8 Pexulilo leedula 20, odo Salomo a kala ta tungu eumbo laJehova neumbo* laye, 2 Salomo okwa tungulula oilando oyo a pewa kuHiram, ndele ta tula mo Ovaisrael.* 3 Natango, Salomo okwa ya kuHamat-soba, ndele te shi kwata ko. 4 Opo nee okwa tunga* Tadmor mombuwa nosho yo oilando aishe yokutuvikila, oyo a tunga muHamat. 5 Okwa tunga yo Bet-horon, osho shi li koshikulundudu, naBet-horon, osho shi li mefilu, oilando ya dingililwa komakuma a pama, i na omivelo noihakifo, 6 naBaalat nosho yo oilando aishe yaSalomo yokutuvikila, oilando aishe yomatemba, oilando yovalondinghambe, nakeshe osho Salomo a li a hala okutunga muJerusalem, muLibanon nomedu alishe olo li li mepangelo laye.
7 Ovanhu aveshe, ovo va li va xupa po, va dja mOvaheti, mOvaamori, mOvaperesi, mOvahevi nomOvajebusi, ovo inava dja moshiwana shaIsrael, 8 oludalo lavo olo la li la fyaala moshilongo, olo Ovaisrael va li inava xulifa po, ola li la kufwa po kuSalomo, nokwa ka kala he li longifa oilonga idjuu fiyo okunena. 9 Ashike Salomo ina ninga Ovaisrael ovapika voilonga yaye, molwaashi ova li ovakwaita vaye, omalenga ovayakuli vovakwaita vaye, nomalenga aye, oo taa pashukile omatemba aye oita, novalondinghambe. 10 Opa li omalenga omakulunhu 250 ohamba Salomo, oo a li taa pashukile ovanhu.
11 Salomo okwa kufa omonakadona waFarao kOshilando shaDavid, ndele te mu tula meumbo, olo e mu tungila, osheshi okwa ti: “Nonande ye omukulukadi wange, ita dulu okukala meumbo laDavid, ohamba yaIsrael, molwaashi onhele omo mu na Oshikefa shaJehova oiyapuki.”
12 Opo nee Salomo okwa yambela Jehova omaxwikiloyambo koaltari yaJehova, oyo a tunga komesho yokalupale kokufikila. 13 Okwa shikula osho hashi ningwa efiku keshe, nokwa yamba omayambo she likolelela kelombwelo laMoses li na sha nOmashabata, oivilo yeemwedi dipe, oivilo oyo hai ningwa lutatu modula peufwafimbo layo; Oshivilo shOmingome inadi ya Efulika, Oshivilo shOivike nOshivilo shOmatwali.* 14 Natango, okwa nangeka po epata lovapristeri li longe oilonga yalo she likolelela koshipango shaxe, David, nosho yo Ovalevi va wanife po oilonga yavo, va tange nokuyakula moipafi yovapristeri she likolelela kwaasho hashi ningwa efiku keshe nosho yo ovapashukili vopoivelo pamapata avo va pashukile omivelo da yoolokafana, molwaashi osho osho sha li oshipango shaDavid, omupiya waKalunga kashili. 15 Ovapristeri nOvalevi inava efa po oshipango shohamba shi na sha noshinima keshe, ile shi na sha neemhungulilo. 16 Oilonga yaSalomo oya li ya unganekwa nawa, okudja kefiku olo ekanghameno leumbo laJehova la dikwa, fiyo osheshi la pwa. Onghee eumbo laJehova ola li la pwa filufilu.
17 Opo nee Salomo okwa li a ya kuEsion-geber nokuElot, komunghulofuta, medu laEdom. 18 Hiram okwe mu tumina eeskepa novanailonga vomefuta va pyokoka, tava wilikwa kovapiya vaye. Ova ya pamwe novapiya vaSalomo kuOfir, nova kufa ko oitalenti* yoshingoli 450, ndele tave i twala kohamba Salomo.