Omayeletumbulo

19 Oshixwepo okukala ohepele, ndele oumudiinini,

Ponhele yokukala elai noho popi oipupulu.

 2 Kashiwa omunhu* a kale ehe na eshiivo,

Naao ha katuka meendelelo* ota nyono.

 3 Oulai womunhu oo tau mu pukifa mondjila yaye,

Ndele ta handukile Jehova momutima waye.

 4 Oupuna otau etele omunhu ookaume vahapu,

Ndele ohepele otai fiwa po nokuli nokukaume kayo.

 5 Ondombwedi yoipupulu itai efiwa inai handukilwa,

Naao ha popi alushe oipupulu ita xupu.

 6 Ovanhu vahapu ohava kala va hala okuhokiwa komunhu oo a fimana,*

Naao ha yandje eeshali oku na ookaume vahapu.

 7 Ovamwainamati vohepele aveshe otave i tondo;

Nookaume kayo otave i kala kokule.

 9 Ondombwedi yoipupulu itai efiwa inai handukilwa,

Naao ha popi alushe oipupulu ota ka hanaunwa po.

10 Ngaashi ashike inashi wapala elai li kale la hepuluka,

Inashi yuka yo omupiya a pangele omalenga.

11 Eendunge domunhu otadi loteke filufilu ehandu laye,

Nota ningi nawa, ngeenge ota tale onheni* epuko.*

12 Ehandu lohamba oli li ngaashi onghoshi* tai kumbu,

Ashike onghenda yayo oi li ngaashi omume koimeno.

13 Omonamati elai ota etele xe oupyakadi,

Nomukulukadi e hole okutanguna* okwa fa onhongo tai ndoda efimbo alishe.

14 Ovanhu ohava fyuulula eumbo nemona kooxe,

Ashike Jehova oye ha yandje omukulukadi omunaendunge.

15 Ondede ohai etele omunhu eemhofi didjuu,

Nomukwandede ota fi ondjala.

16 Ou ha diinine oipango ota kala nomwenyo;

Ou ehe na ko nasha meendjila daye ota ka fya.

17 Ou ta file onghenda ohepele ota yandje kuJehova,

Note mu futu* omolwoshinima osho a ninga.

18 Yandja outekuduliko komonamati woye, ofimbo pe na omhito,*

Noino kala u na ondjo* omolwefyo laye.

19 Omunhu oo e na ehandu lidjuu ota ka mona oilanduliko;

Ngeenge owa kendabala oku mu kwafela, ou na oku shi ninga lwoikando noikando.

20 Pwilikina komayele nokutambula ko outekuduliko,

Opo u ka kale omunaendunge monakwiiwa.

21 Omunhu oku na eemhangela dihapu momutima waye,

Ashike omhangela* yaJehova otai kalelele.

22 Oshinima shiwa momunhu osho ohole yaye i na oudiinini;

Oshixwepo okukala omufyoona shi dulife okukala omunaipupulu.

23 Okutila Jehova otaku twala komwenyo;

Oo he mu tila ota ka kofa nawa, ita ka hangwa koshiponga.

24 Omukwandede ota tula onyala yaye moshiyaxa shoitendele,

Ndele ota nyengwa oku i kufa mo e i shunife kokanya kaye.

25 Denga omusheki, opo oo ehe na owino a ninge omunaendunge,

Pukulula oo e na eudeko, opo a hapupalife eshiivo laye,

26 Omonamati oo ta ungaunga nai naxe nota taataa ina,

Omulengifa nota fifa ohoni.

27 Omumwange, ngeenge owa efa po okupwilikina koutekuduliko,

Oto ka ehena kokule neshiivo.

28 Ondombwedi yongaho ohai sheke ouyuki,

Nokanya komukolokoshi ohaka xwake owii.

29 Ovasheki ova tuvikililwa etokolo,

Nombuda yelai ihai pu okudengwa.