Hesekiel
22 Nondjovo yaJehova oye uya vali kwaame tai ti: 2 “Ashike ove, omona womunhu, mbela owe lilongekida ngoo okushiivifila* oshilando etokolo omolwetimba lohonde noku shi shiivifila oinima yasho aishe itondifa? 3 Ou na okutya, ‘Eshi osho Omwene Omunamapangelo aeshe, Jehova, ta ti: “Ove oshilando, osho sha tilashi ohonde musho vene, osho efimbo lasho tali uya, osho sha ninga oikalunga itondifa* shi linyateke sho vene, 4 ohonde oyo wa tilashi, oye ku ningifa u kale u na etimba, noikalunga yoye itondifa oye ku ningifa u kale ino koshoka. Owa endelelifa exulilo lomafiku oye, nexulilo leedula doye ola fika. Nomolwaasho handi ke ku ninga oshinima shidinifa koiwana noshinima shokushekwa komadu oo aeshe. 5 Oilongo oyo i li popepi naayo i li kokule naave, otai ke ku sheka, ove ou edina loye inali koshoka, nowa yadifwa nomapiyaano. 6 Tala! Elenga keshe lOvaisrael, li li mokati keni, ohali longifa eenghonopangelo dalo li tileshi ohonde. 7 Mwoove ohava ungaunga nooxe nosho yo nooina nodino. Ohava kengelele ovanailongo, nohava ungaunga nai nounona vehe na ooxe* nosho yo novafiyekadi.”’”
8 “‘Omwa tonda eenhele dange diyapuki, nomwa nyateka omashabata ange. 9 Mwoove omu na ovalundili, va hala okutilashi ohonde. Mwoove ohava lile mo omayambo keemhunda, nohava twikile okulihumbata monghedi itondifa mokati koye. 10 Mwoove inava fimaneka ombete yaxe* nova nyateka omukainhu ina koshoka e li komafimbo. 11 Mwoove omulumenhu umwe okwa ninga oinima itondifa nomukulukadi wamukwao, naumwe okwa longela oshitenya shaye okakadona omunyonena, namukwao okwa nangala nomumwainakadona, omonakadona a dalwa kuxe. 12 Mwoove ohava yandje ombubo, opo va tileshi ohonde. Oho yandje eendjo wa weda ko oishoshela, ile u likole oshimaliwa* shihapu, noho nyokoma ovanhu vakweni oimaliwa. Heeno, owa dimbwa nge filufilu,’ Omwene Omunamapangelo aeshe, Jehova, osho ta ti.
13 Tala! Onda pandula omake ange nda tonda, molwaashi owa likola monghedi ihe li paushili, nomolwoilonga yokutilashi ohonde mokati koye. 14 Mbela oto ka kala ngoo omuladi,* nomake oye otaa ka kala ngoo a pama momafiku oo, eshi handi ka katuka onghatu ndi ku lwife? Ame mwene, Jehova, onde shi popya nohandi ka katuka onghatu. 15 Ohandi ke ku lihanifila mokati koiwana noku ku halakanifila mokati komadu oo, nohandi ka xulifa po okuhenoukoshoki kwoye. 16 Noito ka fimanekwa moipafi yoiwana, nou na oku ka shiiva kutya aame Jehova.’”
17 Nondjovo yaJehova oye uya vali kwaame tai ti: 18 “Omona womunhu, eumbo laIsrael ola ninga ngaashi etutu loitenda lihe na oshilonga* kwaame. Alishe ongopolo noshipapa noshivela shilaula noholo i li mediko. Ova ninga etutu loshisilveri.
19 “Onghee eshi osho Omwene Omunamapangelo aeshe, Jehova, ta ti: ‘Molwaashi amushe omwa ninga ngaashi etutu loitenda lihe na oshilonga, ohandi mu ongele pamwe meni laJerusalem. 20 Ngaashi ashike oshisilveri nongopolo noshivela shilaula noholo noshipapa hai ongelwa mediko, opo i xwamekwe, noi hengumunwe po, nanye osho handi ke mu ongela mehandu lange nomonya yange, nohandi ke mu fudila, noku mu hengumuna po. 21 Ohandi ke mu ongela, noku mu fudila omundilo wonya yange, notamu ka hengumukila meni laye. 22 Ngaashi ashike oshisilveri hashi hengumuka, ngeenge sha tulwa mediko, nanye otamu ka hengumukila meni laye, notamu ka shiiva kutya ame mwene, Jehova, onda tila ehandu lange kunye.’”
23 Nondjovo yaJehova oye uya vali kwaame tai ti: 24 “Omona womunhu, tya kuye, ‘Ove edu olo itali ka kosholwa, ile itali ka lokwa mefiku loupyuhandu. 25 Ovaprofeti vaye ova pangelela omhangela muye, ngaashi onghoshi tai kumbu tai nyanyaula oshihakanwa. Otava xwake po ovanhu.* Ova kwata ko omamona nosho yo oinima yondilo. Ova ningifa vahapu va kale ovafiyekadi muye. 26 Ovapristeri vaye ova nyona omhango yange, nova kala tava nyateke eenhele dange diyapuki. Inava tongola pokati kaasho shiyapuki naasho shakwalukeshe, nova dopa okushiivifa osho inashi koshoka naasho sha koshoka, nova anya okudiinina omashabata ange, nonda dinika mokati kavo. 27 Omalenga aye, oo e li mokati kaye, oku li ngaashi omambungu* taa nyanyaula oshihakanwa; ohaa tileshi ohonde nokudipaa ovanhu,* opo e likongele eliko. 28 Ashike ovaprofeti vaye ova kolonga nomunoko mutoka oilonga yavo. Ova mona omamoniko oipupulu, nova nyanekela oipupulu, ndele tava ti: “Eshi osho Omwene Omunamapangelo aeshe, Jehova, ta ti,” ofimbo Jehova ye mwene ina popya. 29 Ovanhu vomoshilando ova kengelela nova nyeka, ova ungaunga nai naavo ve li momhumbwe nosho yo novakwanaluhepo, nova kengelela omunailongo noku mu anyena ouyuki.’
30 “‘Onda li handi kongo omulumenhu mokati kavo, oo ta dulu okuwapekulula ekuma lemanya, ile a fikame moipafi yange e lile po oshilando, opo shiha dule okuhanaunwa po, ashike inandi mona nande oumwe. 31 Onghee ohandi ka tilila ehandu lange kuvo, nohandi ke va hanauna po nomundilo wonya yange. Ohandi ka eta oilanduliko yeenghatu davo komitwe davo,’ Omwene Omunamapangelo aeshe, Jehova, osho ta ti.”