Levitikus
9 Mefiku etihetatu, Moses okwa li a ifana Aron novanamati vaye nosho yo ovakulunhu vaIsrael. 2 Okwa lombwela Aron, a ti: “Likufila onhana yetimbayambo nodi yondume yexwikiloyambo ya koshoka, ndele to di yandje koshipala shaJehova. 3 Ashike ou na okulombwela Ovaisrael kutya, ‘Kufeni oshikombo shoshindume shetimbayambo nonhana nosho yo odjona yondume, aishe yomudo umwe ya koshoka, yexwikiloyambo. 4 Kufeni yo ongobe yomhedi nodi yondume yomayambo oukumwe mu i yambele koshipala shaJehova nosho yo eendjayambo da pilulilwa omaadi, osheshi Jehova ote ke mu lihololela nena.’”
5 Onghee ova eta komesho yetwali lokwoongalela osho Moses e va lombwela. Opo nee ongudu aishe oye uya komesho, ndele tai fikama koshipala shaJehova. 6 Moses okwa tya: “Eshi osho Jehova e mu lombwela mu ninge, opo oshinge shaJehova shi uye kunye.” 7 Opo nee Moses okwa tya kuAron: “Inda koaltari, ndele to yandje etimbayambo loye nexwikiloyambo loye, ndele to pula ediminepo omolwomatimba oye nosho yo ovaneumbo loye. Ou na yo okuyandja omayambo ovanhu, ndele to pula ediminepo omolwomatimba avo, ngaashi ashike Jehova a popya.”
8 Aron okwa ya diva koaltari, ndele ta dipaa onhana yaye yetimbayambo. 9 Ovanamati vaAron ova yandja ohonde kuye, ndele ta yave omunwe waye mohonde noku i vaeka keembinga doaltari, nohonde oyo ya xupa mo okwe i tila koshitako shoaltari. 10 Oinghene neefiyo noinghene oyo i li kexuli yetimbayambo okwe i xwikila koaltari, ngaashi ashike Jehova a li a lombwela Moses. 11 Okwa xwika po ombelela noshikafa momundilo kondje yonhanda.
12 Opo nee okwa dipaa oshinamwenyo shexwikiloyambo, novanamati vaAron ove mu pa ohonde, ndele te i shamine keembinga adishe doaltari. 13 Ove mu pa oinhimbu yoshinamwenyo shexwikiloyambo pamwe nomutwe, nokwe i xwikila koaltari. 14 Natango, okwa kosha omandjadja noitukulwa imwe, ndele te i xwikile kombada yexwikiloyambo koaltari.
15 Opo nee okwa yandja exwikiloyambo lovanhu nokwa kufa oshikombo shetimbayambo lovanhu, ndele te shi dipaa nokwe shi yandja shi li etimbayambo ngaashi eshi shotete. 16 Okwa yandja exwikiloyambo, nokwa ungaunga nalo ngaashi hashi ningwa.
17 Kakele kexwikiloyambo olo a yandja ongula, natango okwa yandja eendjayambo, a kufa mo eke li yadi, ndele te di xwikile koaltari.
18 Konima yaasho, okwa dipaa omhedi nodi yondume yeyambo loukumwe lovanhu. Ovanamati vaAron ove mu pa ohonde, ndele te i shamine keembinga adishe doaltari. 19 Ashike oinhimbu yoinghene yomhedi, oinghene oyo i li komushila wodi yondume, oinghene oyo i li koitukulwa ikwao yomeni, eefiyo nosho yo oinghene oyo i li kexuli, 20 oinghene aishe oyo ove i tula keembadja, nokonima okwa xwikila oinhimbu yoinghene oyo koaltari. 21 Ashike eembadja noshilama shokolulyo Aron okwe i dungadungifa i li edungadungifwayambo koshipala shaJehova, ngaashi ashike Moses a popya.
22 Opo nee Aron okwa yelula omake aye kombada yovanhu nokwe va nangeka noupuna, ndele ta di ko koaltari, eshi a mana okuyandja omatimbayambo, omaxwikiloyambo nomayambo oukumwe. 23 Xuuninwa, Moses naAron ova ya metwali lokwoongalela nova dja mo, ndele tava nangeke noupuna ovanhu.
Opo nee oshinge shaJehova osha li she uya kovanhu aveshe, 24 nomundilo wa dja kuJehova owa li we uya nowa hovela okuxwika po exwikiloyambo noinhimbu yoinghene oyo ya li koaltari. Eshi ovanhu aveshe ve shi mona ova hovela okwiingida nove linyongamena pedu.