Omuudifi

11 Ekela omungome woye kombada yomeva, osheshi konima yomafiku mahapu, oto ke u mona vali. 2 Yandja moinima yoye kovanhu vaheyali, ile nokuli vahetatu, osheshi ku shi shii kutya oupyakadi* ulipi tau ka holoka kombada yedu.

3 Ngeenge oilemo oi yadi omeva, otai ka loka kombada yedu; nongeenge omuti owa wile kolundume, ile kolukadi, ponhele opo wa wila opo tau kala wa nangala.

4 Ou ta tale omhepo ita ka kuna ombuto, naau ta tale koilemo ita ka teya.

5 Ngaashi ashike uhe shii nghee omhepo hai longo momakipa okaana oko ke li meni* lomukainhu omufimba, osho yo uhe shii oilonga yaKalunga kashili, oo ha ningi oinima aishe.

6 Kuna ombuto yoye efimbo longula noino tulumukifa eke loye fiyo okonguloshi, osheshi ku shi shii kutya ilipi po tai ka mena, kutya oyo ei, ile oikwao, ile kutya adishe otadi ka mena.

7 Ouyelele omuwa, noshiwa ngeenge omesho taa mono etango. 8 Ngeenge omunhu okwa kala nomwenyo omido dihapu, nedi hafele adishe. Ashike oku na okudimbuluka kutya omafiku omilaulu otaa dulu okukala mahapu, naashishe osho tashi ke uya oshongaho elela.

9 Omunyasha ove, kala wa hafa ofimbo u li omunyasha, nomutima woye nau kale wa hafa momafiku oye ounyasha. Shikula eendjila domutima woye nokuya keshe opo pawa momesho oye; ndele shiiva kutya Kalunga kashili ote ke ku tokola* omolwoinima aishe oyo. 10 Onghee hano, kufa mo oinima ii momutima woye, nokweefa po oinima oyo tai dulu okweehameka olutu* loye, osheshi ounyasha neenghono dounyasha oyongaho elela.