Omafimbo omativali
11 Eshi Rehabeam a fika muJerusalem, okwa ongaleka diva eumbo laJuda nolaBenjamin, ovakwaita va deulwa* 180 000 va ka lwife Ovaisrael, opo va shunife ouhamba kuRehabeam. 2 Opo nee ondjovo yaJehova oye uya kuShemaia, omupiya waKalunga kashili, tai ti: 3 “Lombwela Rehabeam, omonamati waSalomo, ohamba yaJuda, nOvaisrael aveshe ovo ve li muJuda nomuBenjamin, to ti, 4 ‘Jehova okwa ti: “Inamu ka lwifa ovamwaxo. Keshe umwe na shune keumbo lavo, osheshi aame nda etifa oshinima osho.”’” Onghee ova dulika kondjovo yaJehova, ndele tava shuna komaumbo avo, noinava ka lwifa vali Jerobeam.
5 Rehabeam okwa kala ha di muJerusalem, nokwa tunga oilando ya dingililwa komakuma a pama, muJuda. 6 Okwa tunga* Betlehem, Etam, Tekoa, 7 Bet-sur, Soko, Adullam, 8 Gat, Maresha, Sif, 9 Adoraim, Lakis, Aseka, 10 Sora, Aijalon naHebron, oilando ya dingililwa komakuma a pama, oyo ya li muJuda nomuBenjamin. 11 Natango, okwa pameka eenhele da dingililwa komakuma a pama nokwa tula mo ovawiliki, ndele te va longekidile oikulya, omaadi nomaviinyu. 12 Oilando aishe ya yoolokafana okwe i pa oikelelifo ya kula nosho yo omaonga; okwe i pameka filufilu. Oitukulwa yaJuda noyaBenjamin oya li yaye.
13 Ovapristeri nOvalevi, ovo va li muIsrael ashishe, ova ya kuJuda ve ke mu yambidide, va dja moitukulwa yavo aishe. 14 Ovalevi ova li va fiya po omaulifilo avo noinima yavo, ndele tava i kuJuda nokuJerusalem, molwaashi Jerobeam novanamati vaye ova li ve va lekela mo moilonga yavo yokukala ovapristeri vaJehova. 15 Opo nee Jerobeam okwa nangeka po ovapristeri vaye mwene keenhele dokoikulundudu va yakule eendemoni, odo da fa oikombo,* noihongwafano yeenhana, oyo a ninga. 16 Ovanhu, va dja momapata aeshe aIsrael, ovo va li va tokola momitima davo okukonga Jehova, Kalunga kaIsrael, ove va shikula kuJerusalem, opo va ka yambele Jehova, Kalunga kooxekulululwa. 17 Ova pameka ouhamba waJuda oule weedula nhatu, nova yambidida Rehabeam, omonamati waSalomo, molwaashi ova shikula oshihopaenenwa shaDavid noshaSalomo oule weedula nhatu.
18 Opo nee Rehabeam okwa kufa Mahalat, omonakadona waJerimot, omonamati waDavid, a ninge omukulukadi waye. Ina yaMahalat oAbihail, omonakadona waEliab, omonamati waIsai. 19 Mokweendela ko kwefimbo, okwe ke mu dalela ovanamati ava: Jehus, Shemaria naSaham. 20 Konima yaasho, okwa hombola Maaka, omutekulu waAbsalom. Mokweendela ko kwefimbo, okwe mu dalela Abia, Attai, Sisa naSelomit. 21 Rehabeam okwa li e hole unene Maaka, omutekulu waAbsalom, shi dulife ovakulukadi vaye vamwe novakulukadi vaye aveshe vopomunghulo, molwaashi okwa li e na ovakulukadi 18 nosho yo ovakulukadi vopomunghulo 60. Okwa dala ovanamati 28 novanakadona 60. 22 Onghee Rehabeam okwa nangeka po Abia, omonamati waMaaka, a ninge elenga nomukwateli komesho mokati kovamwaxe, molwaashi okwa li a hala oku mu ninga ohamba. 23 Ashike okwa li a katuka pandunge, ndele ta tumu ovanamati vaye vamwe koitukulwa aishe yaJuda noyaBenjamin, koilando aishe ya dingililwa komakuma a pama, ndele te va pe oinima ihapu nokwe va kongela ovakulukadi vahapu.