Omafimbo omativali
10 Rehabeam okwa li a ya kuSekem, osheshi Israel ashishe osha li she uya kuSekem, opo shi mu ninge ohamba. 2 Diva eshi Jerobeam, omonamati waNebat, e shi uda (okwa li natango muEgipiti, molwaashi okwa li a faduka po omolwohamba Salomo), Jerobeam okwa aluka ko kuEgipiti. 3 Ove mu tuma a ka talwe ko, na Jerobeam nosho yo Ovaisrael aveshe ove uya kuRehabeam, ndele tava ti: 4 “Xo okwe tu twika ondjoko idjuu. Ashike ngeenge owa pupaleke oilonga, oyo xo e tu pa, nosho yo ondjoko idjuu,* oyo e tu twika, ohatu ke ku longela.”
5 Opo nee okwa tya kuvo: “Alukileni kwaame konima yomafiku atatu.” Onghee ovanhu ova ya. 6 Ohamba Rehabeam oya ka pula ovalumenhu ovakulunhu, ovo va longela xe, Salomo, ofimbo a li momwenyo, ya ti: “Omayele elipi tamu dulu okupa nge, opo ndi nyamukule ovanhu ava?” 7 Ove mu nyamukula, va ti: “Ngeenge owa ungaunga nawa novanhu ava noku va hafifa, ndele to va pe enyamukulo olo va hala, otava ka kala alushe ovapiya voye.”
8 Ashike ina pwilikina komayele, oo a pewa kovalumenhu ovakulunhu, ndele okwa ka pula ovalumenhu ovanyasha, ovo a putukila pamwe navo, nova li ovayakuli vaye pefimbo opo. 9 Okwe va pula, a ti: “Omayele elipi tamu dulu okupa nge, opo ndi nyamukule ovanhu ovo va lombwela nge kutya, ‘Pupaleka ondjoko oyo xo e tu twika’?” 10 Ovalumenhu ovanyasha, ovo va putukila pamwe naye, ova tya kuye: “Eshi osho u na okulombwela ovanhu ovo va tya kwoove, ‘Xo okwa djuupaleka ondjoko yetu, ashike i pupaleka’; ou na oku va lombwela, to ti, ‘Ohandi ka ungaunga nanye nai, shi dulife pwaasho tate a ungaunga nanye.* 11 Tate okwe mu twika ondjoko idjuu, ashike ame ohandi ka weda ko kondjoko yeni. Tate okwa li e mu denga neengola, ashike ame ohandi ke mu denga neengola di na omakiya.’”
12 Jerobeam novanhu aveshe ove uya kuRehabeam mefiku etitatu, ngaashi ashike ohamba ya tile: “Alukileni kwaame mefiku etitatu.” 13 Ashike ohamba oye va nyamukula nonyanya. Onghee ohamba Rehabeam inai tambula ko omayele ovalumenhu ovakulunhu. 14 Oye va lombwela she likolelela komayele oo ya pewa kovalumenhu ovanyasha, ya ti: “Ohandi ka djuupaleka ondjoko yeni nohandi ka weda ko. Tate okwa li e mu denga neengola, ashike ame ohandi ke mu denga neengola di na omakiya.” 15 Onghee ohamba inai pwilikina kovanhu, molwaashi Kalunga kashili oye a ningifa oiningwanima oyo, opo eendjovo daJehova, odo a popya okupitila muAhia, Omusilo, di wanifilwe Jerobeam, omonamati waNebat.
16 Molwaashi ohamba oya anya okupwilikina kuvo, Ovaisrael aveshe ova nyamukula ohamba, va ti: “Oshitukulwa shilipi tu na muDavid? Katu na oshitukulwafyuululo momonamati waIsai. Alikana, Israel shuneni kookalunga keni. Nye oludalo laDavid lifileni oshisho.” Opo nee Ovaisrael aveshe ova shuna komaumbo* avo.
17 Ashike Rehabeam okwa twikila okupangela Ovaisrael, ovo va li hava di moilando yaJuda.
18 Opo nee ohamba Rehabeam oya tuma Hadoram, oo a li ta pashukile ovanailonga, ovo hava longifwa oilonga idjuu, ashike okwa dipawa kOvaisrael nomamanya. Ohamba Rehabeam oya londa metemba layo, noya ya onhapo kuJerusalem. 19 Ovaisrael ova kala ihava udafana neumbo laDavid fiyo okunena eli.