Samuel omutivali
19 Joab okwa li a lombwelwa kutya: “Ohamba otai lili Absalom.” 2 Mefiku olo, efindano* ola ninga oluhodi kovanhu aveshe, molwaashi ova uda kutya ohamba otai lili omonamati wayo. 3 Mefiku olo, ovanhu ova shuna koshilando va mwena, va fa ovanhu ovo va fifwa ohoni, molwaashi va faduka po olwoodi. 4 Ohamba oya uvika oshipala shayo, noya kala tai lili mokule, tai ti: “Omona wange Absalom! Omona wange Absalom, omona wange!”
5 Opo nee Joab okwa ya keumbo lohamba, ndele ta ti: “Nena owa fifa ohoni ovapiya voye aveshe, ovo va xupifa omwenyo woye nosho yo eemwenyo dovanamati voye, ovanakadona voye, ovakulukadi voye novakulukadi voye vopomunghulo. 6 Ou hole ovo ve ku tonde nou tonde ovo ve ku hole, osheshi nena owa ulika kutya omalenga novapiya voye kave fi sha kwoove, molwaashi ondi shi shii kutya ngeno Absalom okwa kalele nomwenyo, ndele fye atushe hatu fi, ngeno oshe ku wapalela. 7 Fikama paife, ndele to i pondje nokushilipaleka* ovapiya voye, molwaashi ohandi ane kuJehova kutya ngeenge ino dja mo, kape na nande omunhu ta ka kala pwoove okudja onguloshi yonena. Osho otashi ka kala shii neenghono shi dule oinima aishe ii oyo ye ku ningilwa okudja eshi wa li omunyasha fiyo opaife.” 8 Onghee ohamba oya fikama, ndele tai kala omutumba poshivelo shoshilando, novanhu aveshe ova lombwelwa kutya: “Paife ohamba oi li omutumba poshivelo.” Opo nee ovanhu aveshe ove uya kohamba.
Ashike Ovaisrael ova faduka po, keshe umwe a finda keumbo lavo. 9 Ovanhu aveshe vomomapata aeshe Ovaisrael ova li tava ngongota, tava ti: “Ohamba oye tu xupifa kovatondi vetu noye tu xupifa kOvafilisti, ashike paife oya faduka po omolwaAbsalom. 10 Absalom, oo twa li twa hoolola* e tu pangele, okwa fila molwoodi. Onghee paife, omolwashike itamu ningi po sha mu alule ohamba?”
11 Ohamba David oya tuma etumwalaka komupristeri Sadok naAbjatar, tali ti: “Popyeni novakulunhu Ovajuda tamu ti, ‘Omolwashike onye mwa xuuninwa okwaalulila ohamba keumbo layo, ofimbo ondjovo yOvaisrael aveshe ye uya kohamba keumbo layo? 12 Nye ovamwameme novapambele vange vopopepi elela.* Omolwashike onye mwa xuuninwa okwaalula ohamba?’ 13 Ou na okulombwela Amasa to ti, ‘Ku fi omupambele wange wopopepi elela? Kalunga na handukile nge unene, ngeenge ino ninga ondjai yetangakwaita lange okudja paife, ponhele yaJoab.’”
14 Okwa tomha* ovalumenhu aveshe Ovajuda, ndele ta lombwele ohamba ta ti: “Aluka, ove nosho yo ovapiya voye aveshe.”
15 Eshi ohamba ya aluka, oya ya fiyo okuJordan, novanhu vomuJuda ove uya oku i shakeneka muGilgal, ndele tave i findikile, fiyo osheshi ya tauluka omulonga waJordan. 16 Opo nee Simei, omonamati waGera, Omubenjamin, wokuBahurim, okwa ya diva pamwe novalumenhu Ovajuda va ka shakeneke David, 17 nokwa li pamwe novalumenhu 1 000, va dja mepata laBenjamin. Natango, Siba, omupiya womeumbo laSaul, pamwe novanamati vaye 15 novapiya 20, ova ya diva komulonga waJordan, va tetekele ohamba. 18 Okwa* tauluka omulonga, opo a twale ovaneumbo vohamba nokuninga keshe osho a hala. Ashike Simei, omonamati waGera, okwe linyongamena koshipala shohamba ofimbo inai tauluka omulonga waJordan. 19 Okwa tya kohamba: “Omwene wange ohamba, ino yandja elitulemo kwaasho nda ninga, noino dimbuluka owii oo omupiya woye a ninga mefiku olo omwene wange ohamba a dja mo muJerusalem. Ohamba inai shi tula komutima, 20 osheshi omupiya woye oku shi shii kutya okwa nyona; onghee nena oye wotete movapambele* aveshe vaJosef okuuya okushakena nomwene waye ohamba.”
21 Abisai, omonamati waSerua, okwa tya: “Mbela Simei ina wana okudipawa, molwaashi okwa tuka omuvaekwa waJehova?” 22 Ashike David okwa tya: “Eshi oshi na shike nanye, ovanamati vaSerua, eshi tamu ungaunga naame ngaha nena? Mbela ope na oo e na okudipawa nena muIsrael? Mbela kandi shii kutya nena ame ohamba yaIsrael?” 23 Opo nee ohamba oya udanekela Simei, ya ti: “Ito fi.”
24 Mefiboset, omutekulu waSaul, naye okwe uya okushakeneka ohamba. Ina fila oshisho eemhadi daye, ile a kulule ko eendjedi daye dopombada, noina kosha oikutu yaye okudja efiku olo ohamba ya ya, fiyo efiku olo ohamba ya aluka nombili. 25 Eshi e uya* kuJerusalem a ka shakeneke ohamba, ohamba oya tya kuye: “Mefiboset, omolwashike ino ya pamwe naame?” 26 Opo nee okwa tya: “Omwene wange ohamba, omupiya wange okwa kengelela nge, osheshi omupiya woye okwa ti, ‘Ohandi longekida ondongi yange, opo ndi londe ndi ye nohamba,’ molwaashi omupiya woye okwa lemana. 27 Okwa lundila omupiya woye komwene wange ohamba. Ashike omwene wange ohamba oku li ngaashi omweengeli waKalunga kashili, onghee ninga keshe osho she ku wapalela. 28 Ovaneumbo aveshe vatate ngeno ova dipawa komwene wange ohamba, ashike owa hoolola omupiya woye a kale umwe womwaavo tava li poshitaafula shoye. Oshike vali ndi na okupula ohamba?”
29 Onghee ohamba oya tya kuye: “Omolwashike natango to popi ngaho? Onda tokola, opo nye naSiba mu litukulile epya.” 30 Opo nee Mefiboset okwa tya kohamba: “Nali ninge laye alishe, osheshi omwene wange ohamba okwe uya keumbo laye nombili.”
31 Barsillai, Omugilead, okwa dja kuRogelim, opo a ka findikile ohamba komulonga waJordan. 32 Barsillai okwa li a kulupa neenghono, a li e na eedula 80, nokwa li ha pe ohamba oikulya, ofimbo a li ha di muMahanaim, molwaashi okwa li a punapala neenghono. 33 Onghee ohamba oya tya kuBarsillai: “Natu tauluke, nohandi ke ku pa oikulya muJerusalem.” 34 Opo nee Barsillai okwa tya kohamba: “Ondi na ko eedula* ngapi, opo ndi ye nohamba kuJerusalem? 35 Paife ondi na eedula 80. Mbela ohandi dulu okutongola pokati kaasho shiwa naasho shii? Mbela omupiya woye ota dulu tuu okuuda omulyo waasho ta li naasho ta nu? Mbela ohandi dulu ngoo vali okupwilikina kovalumenhu novakainhu tava imbi? Omolwashike omupiya woye e na okuweda ko komutengi womwene wange ohamba? 36 Osha wana eshi omupiya woye a eta ohamba komulonga waJordan. Omolwashike ohamba i na okupa nge ondjabi i fike opo? 37 Alikana, efe nge ndi ka file moshilando shetu osho shi li popepi naapo pa pakwa tate nameme. Ashike omupiya woye, Kimham, oye ou. Na tauluke pamwe nomwene wange ohamba, ndele to mu ningile osho she ku wapalela.”
38 Onghee ohamba oya tya: “Kimham ohatu ka tauluka pamwe naye, nohandi ke mu ningila keshe osho she ku wapalela; keshe osho to pula nge ndi ninge, ohandi shi ku ningile.” 39 Ovanhu aveshe ova hovela okutauluka omulonga waJordan, naashi ohamba ya tauluka, oya xupita Barsillai noku mu nangeka noupuna, ndele Barsillai ta shuna keumbo. 40 Eshi ohamba ya tauluka i ye kuGilgal, Kimham okwa tauluka pamwe nayo. Ovanhu aveshe vokuJuda netata lOvaisrael ola tauluka pamwe nayo.
41 Ovalumenhu aveshe Ovaisrael ove uya kohamba, ndele tava ti kuyo: “Omolwashike ovamwameme ovalumenhu Ovajuda va taulukifa ohamba noukwaneumbo wayo omulonga waJordan meholeko pamwe novakwaita aveshe vaDavid?” 42 Ovalumenhu vomuJuda ova nyamukula ovalumenhu vomuIsrael va ti: “Omolwaashi ohamba oye tu pamba. Omolwashike mwe tu handukila? Mbela otwa lya sha shohamba, ile oye tu pa oshali yonhumba?”
43 Onghee ovalumenhu vomuIsrael ova nyamukula ovalumenhu vomuJuda va ti: “Otu na oitukulwa omulongo mouhamba, onghee ohatu dulu okupula shihapu kuDavid tu mu dule. Ndele omolwashike mu na okuungaunga nafye nonyanya? Mbela hafye twa li tu na okwaalula ohamba yetu tete?” Ashike eendjovo dovalumenhu Ovajuda oda li didjuu* di dule dovalumenhu vomuIsrael.