Ovatokolipangeli
2 MuGilgal omwa dja omweengeli waJehova nokwa ya kuBokim, ndele ta ti: “Onde mu kufa muEgipiti, ndele handi mu twala medu olo nda ana okupa ooxokulululwa. Natango onda tya, ‘Itandi ka teya ehangano lange, olo nda ninga nanye. 2 Kamu na okuninga ehangano novakalimo vomedu olo, nomu na okuhanauna po eealtari davo.’ Ashike inamu dulika kondaka yange. Omolwashike mwa ningila ngaho? 3 Osho osho yo sha ningifa nge ndi popye kutya, ‘Itandi ke va taataa mo moipafi yeni, notave ke mu pukifa, nookalunga kavo otave ke mu yula.’”
4 Eshi omweengeli waJehova a lombwela Ovaisrael aveshe eendjovo odo, ova hovela okulila mokule. 5 Onghee ova luka onhele oyo Bokim,* naako oko va yambela Jehova omayambo.
6 Eshi Josua a lekela ovanhu va ye, Omuisrael keshe okwa ya koshitukulwa shedu osho a fyuulula, oko a ka kale. 7 Ovanhu ova twikila okulongela Jehova efimbo alishe olo Josua a kala e na omwenyo. Ovakulunhu, ovo va twikila okukala nomwenyo konima yefyo laJosua, ova twikila okulongela Jehova nova mona oilonga inene aishe, oyo a longa ponhele yOvaisrael. 8 Opo nee Josua, omonamati waNun, omupiya waJehova, okwa fya e na eedula 110. 9 Onghee ove mu paka moshitukulwa osho a fyuulula muTimnat-heres, osho shi li koshitukulwa shokeemhunda shaEfraim, kolundume lomhunda yaGaas. 10 Epupi alishe, olo ola li la pakwa pooxekulululwa,* nokonima yalo ope ke uya epupi limwe olo lihe shii Jehova, ile osho a ningila Ovaisrael.
11 Onghee Ovaisrael ova longa osho shii momesho aJehova nova longela ooBaal. 12 Kungaho, ova li va efa po Jehova, Kalunga kooxe, oo e va kufa mo medu laEgipiti. Ova li va shikula ookalunga vamwe, ookalunga vovanhu ovo ve va dingilila, ndele tave ve linyongamene nova li va nyemateka Jehova. 13 Ova li va efa po Jehova, ndele tava longele oihongwafano yaBaal naAstoret. 14 Jehova okwa li a handukila neenghono Ovaisrael, onghee okwe va yandja kovatondi vavo nove va kufa oinima yavo. Okwe va landifa po momake ovatondi ovo ve va dingilila, nokava li vali tava dulu okuliamena kovatondi vavo. 15 Keshe opo va li tava i, Jehova ka li pamwe navo, nova li va hangwa koupyakadi, ngaashi ashike Jehova a popya. Ndele ngaashi ashike Jehova e va anena, ova li moudjuu munene. 16 Jehova okwa li ta ka hoolola ovatokoli, ovo va li tave ke va amena momake ovatondi vavo.
17 Ashike ova li va anya okupwilikina nokuli nokovatokoli, nongaashi eembwada, ova li ve liyandja kookalunga vamwe noku ve linyongamena. Ova li va dja mo diva mondjila oyo ooxekulululwa, ovo va li hava dulika koipango yaJehova, va enda. Ova dopa okuninga ngaho. 18 Alushe ngeenge Jehova e va tulila po ovatokoli, Jehova oha kala pamwe nomutokoli oo, nohe va xupifa mo momake ovatondi vavo efimbo alishe olo omutokoli e li po, osheshi Jehova okwa li e va kenukila* omolwoupyakadi oo wa etifwa kwaavo tave va fininike nosho yo ovo tava ungaunga navo nonyanya.
19 Ashike ngeenge omutokoli a fi, ohave lihumbata vali nai unene ve dule ooxe mokushikula ookalunga vamwe, oku va longela noku ve linyongamena. Kava li va efa po oilonga yavo ii nosho yo oikala yavo younashibofa. 20 Xuuninwa, Jehova okwa li a handukila neenghono Ovaisrael, ndele ta ti: “Molwaashi oshiwana eshi osha nyona ehangano lange, olo nda lombwela ooxekulululwa, noina shi dulika kwaame, 21 itandi ka taataa mo moipafi yavo nande oshimwe shomoiwana, oyo Josua a fiya mo, eshi a fya. 22 Osho osha li tashi ka yeleka Ovaisrael, ngeenge otava ka enda ngoo mondjila oyo ame, Jehova, nde va ulikila, ngaashi ooxe va ninga.” 23 Onghee Jehova okwa li a efa oiwana oyo i kale po. Ka li e i taataa mo diva, noka li e i yandja momake aJosua.