Omafimbo omativali
20 Lwanima, Ovamoab nOvaammoni pamwe nOvaammonim vamwe* ove uya okulwifa Josafat. 2 Opo nee Josafat okwa lombwelwa taku ti: “Ongudu inene ya dja koshitukulwa shokefuta,* kuEdom, oye uya oku ku lwifa, noi li muHasason-tamar, sha hala okutya, En-gedi.” 3 Onghee Josafat okwa li a kwatwa koumbada, nokwa tokola* okukonga Jehova. Okwa lombwela Ovajuda aveshe ve lidilike. 4 Opo nee ovanhu aveshe vomuJuda ova ongala pamwe va pule ekwafo kuJehova. Ova dja moilando aishe yaJuda, opo va konge ewiliko kuJehova.
5 Josafat okwa fikama mokati keongalo laJuda naJerusalem meumbo laJehova komesho yoshihale shipe, 6 ndele ta ti:
“Alikana, Jehova, Kalunga kootatekulululwa, mbela haave Kalunga komeulu; haave u na eenghonopangelo kombada yomauhamba aeshe oiwana? Meke loye omu na eenghono, nokape na oo ta dulu oku ku lwifa. 7 Alikana, Kalunga ketu, mbela ino taataa mo ovakalimo vomedu eli moipafi yOvaisrael, ndele to li yandje koludalo lakaume koye, Abraham, li li emona lalo laalushe? 8 Ova tula mulo, nove ku tungila mo onhele iyapuki omolwedina loye, tava ti, 9 ‘Ngeenge otwa hangwa koudjuu, kutya nee oweongamukonda, ketokolo la kwata moiti, koudu wolutapo, ile kondjala, natu fikame komesho yeumbo eli nokomesho yoye, (molwaashi edina loye oli li meumbo eli) noku ku pula u tu kwafele moudjuu wetu, u tu ude nou tu xupife.’ 10 Ava ovalumenhu vokuAmmoni, vokuMoab novokoshitukulwa shokeemhunda shaSeir, ovo ino efa va ponokelwe kOvaisrael, eshi va dja medu laEgipiti. Ova aluka ko kuvo noinave va hanauna po. 11 Paife otave tu alulile owii, eshi va hala oku tu taataa mo medu loye, olo we tu pa li li efyuululo. 12 Alikana, Kalunga ketu, mbela ito va handukile? Osheshi fye katu na eenghono dokulwifa ongudu ei inene; katu shi shii kutya natu ninge po shike, ashike omesho etu okwa tala kwoove.”
13 Pefimbo opo, ovanhu aveshe vomuJuda ova li va fikama koshipala shaJehova, pamwe nounona vavo, ovakulukadi vavo novana,* vavo.
14 Opo nee omhepo yaJehova oye uya mokati keongalo, kuJahasiel, omonamati waSakaria, omonamati waBenaia, omonamati waJeiel, omonamati waMattania, Omulevi womoludalo laAsaf. 15 Okwa ti: “Pwilikineni nye Ovajuda amushe, novakalimo vomuJerusalem, naave ohamba Josafat! Jehova ote mu lombwele ta ti, ‘Inamu kala mwa tila, ile mu mbadapale omolwongudu ei inene, molwaashi olwoodi kali fi leni, ndele olaKalunga. 16 Mongula, indeni mu ke va lwife. Otave uya nondjila oyo hai ifanwa Sis, notamu ke va hanga opo pa xulila efilu, ofimbo inamu hanga ombuwa yaJeruel. 17 Itamu pumbwa okulwa olwoodi eli. Fikameni, kaleni ofika, nokutala nghee Jehova te mu xupifa. Akutu Juda naJerusalem, inamu kala mwa tila, ile mu mbadapale. Mongula, indeni mu ke va lwife, na Jehova ota ka kala pamwe nanye.’”
18 Opo nee Josafat okwe linyongamena, oshipala shaye sha twa pedu, nOvajuda aveshe nosho yo ovakalimo vomuJerusalem ove linyongamena pedu koshipala shaJehova, va ilikane Jehova. 19 Ovalevi, oludalo lOvakohat nolOvakora, ova fikama va hambelele Jehova, Kalunga kaIsrael, newi lopombada.
20 Mefiku la shikula ko, ova fikama ongula inene, ndele tava i kombuwa yaTekoa. Ofimbo tava i, Josafat okwa fikama, ndele ta ti: “Akutu nye Ovajuda novakalimo vomuJerusalem, pwilikinei nge. Lineekeleni Jehova, Kalunga keni, opo mu dule okufikama mu na omukumo.* Lineekeleni ovaprofeti vaye, notamu ka pondola.”
21 Konima eshi a popya novanhu, okwa nangeka po ovalumenhu va imbile Jehova noku mu hambelela, va djala omidjalo diyapuki, eshi tava tetekele ovakwaita va homata, tava imbi tava ti: “Panduleni Jehova, osheshi ohole yaye i na oudiinini otai kala po fiyo alushe.”
22 Eshi va hovela okwiimba omaimbilohambelelo nehafo, Jehova okwa tula po vamwe va nangele ovalumenhu vokuAmmoni, vokuMoab novokoshitukulwa shokeemhunda shaSeir, ovo va li tava ponokele Juda, nove lipilukila po vo vene. 23 Ovaammoni nOvamoab ova pilukila po ovakalimo vokoshitukulwa shokeemhunda shaSeir, ve va hanaune po noku va xulifa po. Eshi va mana okuhanauna po ovakalimo vomuSeir, ove lihanauna po vo vene.
24 Ndele eshi Ovajuda ve uya koshungongulu yomombuwa, ova tala kongudu, ndele ova mona oimhu ya kangavala pedu. Inapa xupa nande oumwe. 25 Josafat novanhu vaye ova kufa po oixuulwa,* nova hanga mokati kavo oinima ihapu neenghono, oikutu noinima yondilo, oyo va kufa koimhu, fiyo osheshi itava dulu vali okuhumbata. Oshe va pula omafiku atatu okututa oixuulwa, molwaashi oya li ihapu neenghono. 26 Mefiku etine, ova ongala pamwe mEfilu laBeraka, molwaashi omo omo va hambelela* Jehova. Nomolwaashi va luka onhele oyo Efilu laBeraka fiyo okunena eli.
27 Opo nee ovalumenhu vokuJuda novokuJerusalem, pamwe naJosafat e va li komesho, ova alukila kuJerusalem va hafa, molwaashi Jehova okwe va hafifa, eshi va finda ovatondi vavo. 28 Ove uya muJerusalem tava shiki oishikomwa yeengodi, ouxumbafeta nomanghuma, ndele tava i meumbo laJehova. 29 Omauhamba aeshe oilongo okwa kwatwa koumbada omolwaKalunga, eshi a uda nghee Jehova a lwifa ovatondi vOvaisrael. 30 Okudja opo, ouhamba waJosafat owa kala u na ombili. Kalunga kaye okwa twikila oku mu pa etulumuko keembinga adishe.
31 Josafat okwa twikila okupangela muJuda. Okwa li e na eedula 35, eshi a ninga ohamba. Okwa pangela muJerusalem oule weedula 25. Edina laina oAsuba, omonakadona waSilhi. 32 Okwa twikila okweenda mondjila yaxe, Asa. Ina yapuka mo muyo, nokwa longa osho sha yuka momesho aJehova. 33 Ashike eenhele dokoikulundudu kada li da hanaunwa po, novanhu kava li va longekida omitima davo va konge Kalunga kooxekulululwa.
34 Ondjokonona aishe yaJosafat, okudja pehovelo fiyo opexulilo, oya shangwa meendjovo daJehu, omonamati waHanani, odo da wedwa mEmbo lEehamba daIsrael. 35 Konima yoinima ei, Josafat, ohamba yaJuda, okwa ninga eudafanotwokumwe naAhasia, ohamba yaIsrael, oo a katuka shihe li pandunge. 36 Ova longela kumwe, opo va pangele eeskepa dokuya kuTarsis, nova pangelela eeskepa odo muEsion-geber. 37 Ashike Elieser, omonamati waDodava, wokuMaresa, okwa popya ta xunganeke oinima i li omhinge naJosafat, a ti: “Molwaashi owa ninga eudafanotwokumwe naAhasia, Jehova ota hanauna po oilonga yoye.” Onghee eeskepa oda li da teka noinadi dula okuya kuTarsis.