Job
27 Job okwa twikila okupopya,* ta ti:
2 “Ohandi ane medina laKalunga omunamwenyo, oo a ungaunga naame shihe li pauyuki,
Ngaashi Omunaenghono adishe e na omwenyo, oo a nyikifa nge* oluhodi,
3 Ofimbo handi fuda,
Nomhepo ya dja kuKalunga i li momayulu ange,
4 Omilungu dange itadi ka popya okuhenouyuki;
Nelaka lange itali ka popya oipupulu.
5 Kashi li pandunge kwaame ndi popye kutya nye ovayuki.
Fiyo ohandi fi, itandi ka efa po* oudiinini wange.
6 Ohandi ka kanyatela ouyuki wange, noitandi u efa po;
Omutima wange itau ka hokololifa* nge, ofimbo ndi na omwenyo.*
7 Omutondi wange na ningwe ngaashi omukolokoshi,
Ovo tava hepeke nge ngaashi ovahenouyuki.
8 Osheshi omuhenakalunga* oku na eteelelo lashike, ngeenge okwa hanaunwa po,
Ngeenge Kalunga okwa kufa mo omwenyo waye?
9 Mbela Kalunga ota ka pwilikina ngoo kokulila kwaye,
Ngeenge okwa hangika koupyakadi?
10 Ile mbela ota ka hafa ngoo omolwOmunaenghono adishe?
Mbela ota ka ifana ngoo Kalunga efimbo alishe?
11 Ohandi ke mu honga kombinga yeenghono* daKalunga;
Itandi ka holeka sha kombinga yOmunaenghono adishe.
12 Taleni, ngeenge amushe omwa mona omamoniko,
Omolwashike tamu popi eendjovo dihe na oshilonga?
13 Ei oyo ondjabi yomukolokoshi ya dja kuKalunga,
Efyuululo olo Omunaenghono adishe ta yandje kovalongi vowii:
14 Ngeenge ovanamati vaye ova hapupala, otava ka fya keongamukonda,
Noludalo laye itali ka kala li na oikulya ya wana.
15 Ovo ta fiye po otava ka pakwa omolwomukifi omudipai,
Novafiyekadi vavo itave ke va lila.
16 Nonande oku ongele oshisilveri ngaashi ondwi,
Noku tuvikile oikutu iwa ngaashi elova,
17 Nonande okwe i ongele,
Omuyuki ote ke i djala po,
Naao ehe na ondjo ota ka tukula oshisilveri shaye.
18 Eumbo, olo a tunga, inali kola, ngaashi ashike okakutu omo hamu kala onhwishi,
Ngaashi onhele ya ningwa komunangeli.
19 Ota ka nangala e li oshipuna, ashike ita ka ongela sha;
Eshi ta ka pashula omesho aye, oinima aishe oya kana po.
20 Ehaluko otali ke mu hanga ngaashi efundja;
Noshikungulu otashi ke mu kungulula po oufiku.
21 Omhepo yokoushilo otai ke mu twaalela, noita ka kala po vali;
Otai mu kombolola po ponhele yaye.
22 Otai ke mu fundaula nopehe na oku mu fila onghenda,
Eshi ta kendabala okuya onhapo eenghono dayo.
23 Ohai mu pandulile omake
Noku mu shikila omwilwa okudja monhele yayo.*