Omafimbo otete
16 Opo nee ova eta mo Oshikefa shaKalunga kashili, ndele tave shi tula metwali, olo David e shi dikila; ova yamba omaxwikiloyambo nomayambo oukumwe koshipala shaKalunga kashili. 2 Eshi David a mana okuyamba omaxwikiloyambo nomayambo oukumwe, okwa nangeka noupuna ovanhu medina laJehova. 3 Natango, okwa tukulila Ovaisrael aveshe, omulumenhu nomukainhu keshe, omungome u li ongonga, oshikuki shomadaakala* noshikuki shomandjebele a kukutikwa. 4 Opo nee okwa nangeka po Ovalevi vamwe va yakule komesho yOshikefa shaJehova, va fimaneke,* va pandule nova hambelele Jehova, Kalunga kaIsrael. 5 Asaf oye a li omutwe, nomutivali, oo e mu shikula, oSakaria; Jeiel, Semiramot, Jehiel, Matitia, Eliab, Benaia, Obed-edom naJeiel ova li tava shiki oishikomwa yeengodi nouxumbafeta; na Asaf okwa shika omayaxa, 6 nosho yo ovapristeri Benaia naJahasiel ova kala nokushika omanghuma komesho yoshikefa shehangano laKalunga kashili.
7 Mefiku olo, omo David a totela Jehova eimbilo lolupandu oshikando shotete, nokwa wilika Asaf novamwaxe ve li imbe, tava ti:
8 “Panduleni Jehova; ifaneni edina laye,
Shiivifeni oilonga yaye mokati kovanhu.
10 Litangeleni edina laye liyapuki.
Omitima daavo tava kongo Jehova nadi nyakukwe.
11 Kongeni Jehova nosho yo eenghono daye.
Twikileni okukonga alushe oshipala shaye.
12 Dimbulukeni oilonga iwa oyo a longa,
Oikumwifilonga yaye nomatokolo oo a ninga,
13 Nye oludalo laIsrael, omupiya waye,
Nye ovanamati vaJakob, ovahoololwa vaye.
14 Oye Jehova, Kalunga ketu.
Ota tokola kombada yedu alishe.
15 Dimbulukeni alushe ehangano laye,
Eudaneko, olo a udanekela* omapupi omayovi,
16 Ehangano, olo a ninga naAbraham,
Neano, olo a anena Isak,
17 Olo a tula po li li oshipango kuJakob
Noli li ehangano laalushe kuIsrael,
18 A ti, ‘Ohandi ke ku pa edu laKaanan
Li li efyuululo, olo wa pewa pashihoololifo.’
19 Eshi osha ningwa, eshi mwa li muvanini momuvalu,
Heeno, muvanini neenghono, nomwa li ovanailongo medu olo.
20 Ova enda okudja koshiwana shimwe fiyo okoshiwana shikwao,
Okudja kouhamba umwe fiyo okouhamba mukwao.
21 Ina efa nande omunhu e va fininike,
Ashike okwa hanyena eehamba omolwavo,
22 A ti, ‘Inamu kuma ovavaekwa vange,
Noinamu ningila owii ovaprofeti vange.’
23 Amushe, imbileni Jehova.
Shiivifeni exupifo laye efiku nefiku.
24 Shiivifeni efimano laye mokati koiwana,
Oilonga yaye iwa mokati kovanhu aveshe.
25 Jehova omunene nokwa wana filufilu okufimanekwa.
Ye omukumwifi neenghono e dule ookalunga aveshe.
26 Ookalunga aveshe vovanhu ovo ookalunga vongaho,
Ashike Jehova oye a shita eulu.
27 Eenghono* newapalo oye mu dingilila;
Eenghono nehafo oi li molukalwa laye.
28 Yandjeni efimano kuJehova, nye ovanhu vomaludi aeshe,
Yandjeni efimano kuJehova omolwoshinge neenghono daye.
29 Yandjeni efimano kuJehova omolwedina laye;
Eteni eeshali, ndele tamu uya koshipala shaye.
Linyongameneni* Jehova mwa djala oikutu iyapuki.*
30 Ovanhu aveshe nava kakame koshipala shaye.
Edu* ola dikwa po; itali dulu okulinyengifwa.*
31 Eulu nali nyakukwe, nedu nali hafe;
Hepaululeni mokati koiwana tamu ti: ‘Jehova okwa ninga Ohamba.’
32 Efuta nali popome nosho yo oinima aishe oyo i li mo;
Omifitu noinima aishe, oyo i li mo, nai nyakukwe.
33 Pefimbo opo tuu opo, omiti domomufitu nadi nyakukwe koshipala shaJehova,
Molwaashi ote uya* okutokola edu.
34 Panduleni Jehova, osheshi ye omuwa;
Ohole yaye i na oudiinini otai kala po fiyo alushe.
35 Ndele tamu ti, ‘Kalunga kexupifo letu, tu xupifa,
Tu ongela nou tu xupife koiwana,
Opo tu pandule edina loye liyapuki,
Notu ku tange nehafo.
Ovanhu aveshe ova tya, “Amen!”* ndele tava tange Jehova.
37 Opo nee David okwa fiya Asaf novamwaina komesho yoshikefa shehangano laJehova, opo va twikile okuyakula komesho yOshikefa, she likolelela kwaasho hashi ningwa efiku keshe. 38 Obed-edom novamwaina aveshe kumwe ova li 68. Obed-edom, omonamati waJedutun, naHosa ova li ovapashukili vopoivelo. 39 Omupristeri Sadok novapristeri vakwao ova li komesho yetwalihangano laJehova, konhele yokoshikulundudu, kuGibeon, 40 opo va yambele Jehova omaxwikiloyambo pandjikilile koaltari yomaxwikiloyambo, ongula nonguloshi, nokuninga ashishe osho sha shangwa mOmhango yaJehova, oyo a lombwela Israel. 41 Ova li pamwe naHeman, Jedutun novalumenhu aveshe, ovo va hoololwa pamadina avo, va pandule Jehova, osheshi “ohole yaye i na oudiinini otai kala po fiyo alushe”; 42 ova li pamwe naHeman naJedutun, opo va shike omanghuma, omayaxa noishikomwa, oyo hai longifwa okutanga* Kalunga kashili; novanamati vaJedutun ova li poshivelo. 43 Opo nee ovanhu aveshe ova ya komaumbo avo, na David okwa ya a ka nangeke noupuna ovaneumbo laye.