Hesekiel
7 Ondjovo yaJehova oye uya vali kwaame tai ti: 2 “Ashike ove, omona womunhu, eshi osho Omwene Omunamapangelo aeshe, Jehova, ta ti kedu laIsrael: ‘Exulilo! Exulilo ole uya keembinga adishe nhee dedu. 3 Exulilo ole ku hanga, nohandi ke ku fululukila nehandu lange, noku ku tokola she likolelela keendjila doye, nohandi ke ku hokololifa omolwoilonga yoye aishe itondifa. 4 Eisho lange itali ke ku fila onghenda; ile ndi ulike olukeno, osheshi ohandi ke ku etela oilanduliko yeendjila doye, noto ka mona oixuna omolwoilanduliko yoilonga yoye itondifa. Nomu na oku ka shiiva kutya aame Jehova.’
5 “Eshi osho Omwene Omunamapangelo aeshe, Jehova, ta ti: ‘Tala! Oudjuu, oudjuu mukumwifi, otau uya. 6 Exulilo otali uya; exulilo oli na okuuya; otali ke ku fikamena.* Tala! Otali uya. 7 Olufo* loye ole uya, ove ou ho di moshilongo. Efimbo otali uya, efiku ola ehena. Ope na engwangwano, nokape na okwiingida nehafo keemhunda.
8 “‘Ohandi ke ku tilila ehandu lange diva, nohandi ke ku fululukila filufilu nehandu lange, noku ku tokola she likolelela keendjila doye, nohandi ke ku hokololifa omolwoilonga yoye aishe itondifa. 9 Eisho lange itali ka fila onghenda; ile ndi ulike olukeno. Ohandi ke ku etela oilanduliko yeendjila doye, noto ka mona oixuna omolwoilanduliko yoilonga yoye itondifa. Nomu na oku ka shiiva kutya ame, Jehova, aame handi mu denge.
10 “‘Tala, efiku! Tala, otali uya! Olufo* loye ole uya. Odibo oya temuna, nelinenepeko ola twiyuka. 11 Elongifo leenghono ola mena kodibo youkolokoshi. Kutya nee ovo, ile oupuna wavo, ile eemhunga davo, ile efimano lavo, kape na osho tashi ka xupa. 12 Efimbo otali uya, efiku otali ka fika. Omulandi ina nyakukwa, nomulandifi ina nyika oluhodi, osheshi ongudu yavo aishe otai ka hangwa kehandu.* 13 Osheshi omulandifi ita ka alukila kwaasho sha landifwa, nokuli nonande omwenyo waye owa xupifwa, osheshi emoniko otali ka hanga ongudu aishe inene. Kape na oo ta ka aluka, nomolwepuko laye,* kape na oo ta xupifa omwenyo waye.
14 “‘Ova shika enghuma, nakeshe umwe okwe lilongekida, ashike kape na ou ta i kolwoodi, molwaashi ehandu lange ola hanga ongudu aishe inene. 15 Eongamukonda oli li kondje, noudu wolutapo nosho yo ondjala oi li meni. Keshe oo e li mepya ota ka fya keongamukonda, nondjala nosho yo oudu wolutapo otai ka hanga ovo ve li moshilando. 16 Ooluxupe vavo, ovo va dula okuya onhapo, otava ka ya keemhunda, nongaashi eenghuti domomafilu, keshe umwe ota ka nyika oluhodi omolwepuko laye. 17 Omake avo aeshe otaa ka endjelela a tyololoka, neengolo davo adishe otadi ka shisha omeva.* 18 Ova djala eeshako, nokukakama okwe va hanga.* Keshe umwe ota ka fifwa ohoni, nakeshe omutwe otau ka ninga ongwala.*
19 “‘Otava ka kupulashi oisilveri yavo momapandavanda, noingoli yavo otai ka kala itondifa kuvo. Kutya nee oisilveri yavo, ile oingoli yavo itai ka dula oku va xupifa mefiku lehandu linene laJehova. Itava* ka wanenwa, noitava ka kutifa omadimo avo, osheshi oya* ninga emanya lepundukifo, noye va ningifa va nyone. 20 Ova li ve udite etumba omolwewapalo loumanya vavo, nova ninga mo* oihongwafano yavo itondifa, oikalunga yavo itondifa. Nomolwaasho ohandi ke i ninga oinima itondifa kuvo. 21 Ohandi ke i* yandja momake ovanailongo, opo i nyekwe ko, nokovakolokoshi vokombada yedu, i li oixuulwa,* notave ke i nyateka.
22 “‘Ohandi ka pungulula ko oshipala shange kuvo, notava ka nyateka onhele yange yomeholeko,* novanyeki otava ka ya mo noku i nyateka.
23 “‘Ninga elyenge,* osheshi edu oli yadi etokolo li na sha netiko lohonde, noshilando oshi yadi elongifo leenghono. 24 Ohandi ka eta mo oiwana imwe ya nyika oshiponga neenghono, notai ka kwata ko omaumbo avo, nohandi ka xulifa po ounhwa wovanaenghono, neenhele davo diyapuki otadi ka nyatekwa. 25 Ngeenge ouyehame wavo owe va hange, otava ka konga ombili, ashike itai ka kala po. 26 Otape ke uya omaudjuu a shikulafana, neenghundana da shikulafana, novanhu otava ka konga emoniko komuprofeti, ashike omhango,* oyo hai di komupristeri, otai ka xula po, nomayele* oo haa di kovakulunhu. 27 Ohamba otai ka nyika oluhodi, nelenga otali ka dikwa oudjuu,* nomake ovanhu vomedu olo otaa ka dekweta koumbada. Ohandi ka ungaunga navo she likolelela keendjila davo, nohandi ke va tokola ngaashi va tokola. Nove na oku ka shiiva kutya aame Jehova.’”