Eehamba eenhivali
18 Momudo omutitatu wepangelo laHosea, omonamati waEla, ohamba yaIsrael, Hiskia, omonamati waAhas, ohamba yaJuda, okwa ninga ohamba. 2 Hiskia okwa ninga ohamba, eshi a li e na eedula 25, nokwa pangela muJerusalem oule weedula 29. Edina laina oAbi,* omonakadona waSakaria. 3 Okwa kala ta longo osho sha yuka momesho aJehova, ngaashi ashike xekulululwa, David, a li a ninga. 4 Hiskia oye a hanauna po eenhele dokoikulundudu neengudimanya diyapuki, ndele ta tetaula po opala iyapuki.* Okwa nyanyaula po yo eyoka longopolo, olo la ningwa kuMoses, molwaashi fiyo opefimbo opo, ovanhu muIsrael ova kala noku li twimina omatwiminoyambo, nola li hali ifanwa oshihongwafano sheyoka longopolo.* 5 Okwa li e lineekela muJehova, Kalunga kaIsrael; kapa li umwe e mu fa mokati keehamba adishe daJuda, odo de mu shikula, ile mokati kaado de mu tetekela. 6 Okwa kala omudiinini kuJehova, noina efa po oku mu shikula; okwa twikila okudiinina oipango, oyo Jehova a li a yandja kuMoses. 7 Jehova okwa li pamwe naye. Okwa katuka pandunge mukeshe osho a longa. Okwa tukululila ohamba yaAssiria oshibofa, nokwa anya oku i longela. 8 Okwa finda yo Ovafilisti fiyo okuGasa nosho yo oitukulwa yasho, okudja koshungongulu fiyo okoilando ya dingililwa komakuma a pama.*
9 Momudo omutine wepangelo lohamba Hiskia, sha hala okutya, momudo omutiheyali wepangelo laHosea, omonamati waEla, ohamba yaIsrael, Salmaneser, ohamba yaAssiria, okwe uya okulwifa Samaria, nokwa hovela oku shi kondeka. 10 Ove shi kwata ko konima yomido nhatu; Samaria osha kwatwa ko momudo omutihamano wepangelo laHiskia, oo wa li omudo omutimuwoi wepangelo laHosea, ohamba yaIsrael. 11 Opo nee ohamba yaAssiria oya twala Ovaisrael moukwatwa kuAssiria, noye va pa va kale hava di muHala nomuHabor, osho shi li pomulonga waGosan nomoilando yOvamedia. 12 Osho osha ningwa, molwaashi inava dulika kondaka yaJehova, Kalunga kavo, ashike ova twikila okunyona ehangano laye, ashishe osho Moses, omupiya waJehova, a popya. Inava pwilikina, noinava dulika.
13 Momudo omuti-14 wepangelo lohamba Hiskia, Sanheerib, ohamba yaAssiria, okwe uya okulwifa oilando aishe yaJuda ya dingililwa komakuma a pama, ndele te i kwata ko. 14 Onghee Hiskia, ohamba yaJuda, okwa tumina ohamba yaAssiria ondjovo puLakis, a ti: “Aame ndi na ondjo. Dja po pwaame, nohandi ke ku pa keshe osho to futifa nge.” Ohamba yaAssiria oya futifa Hiskia, ohamba yaJuda, oitalenti* yoisilveri 300 noitalenti yoshingoli 30. 15 Hiskia okwa yandja oshisilveri ashishe osho sha hangwa meumbo laJehova nosho yo meemhungulilo domeumbo* lohamba. 16 Pefimbo opo, Hiskia okwa teyaula po* omivelo dotembeli yaJehova nosho yo oikulo oyo Hiskia, ohamba yaJuda, a vaeka,* ndele te i yandje kohamba yaAssiria.
17 Opo nee ohamba yaAssiria oya tuma Tartan,* Rabsaris* nosho yo Rabsake* pamwe netangakwaita linene, la dja kuLakis, kohamba Hiskia, muJerusalem. Ova ya kuJerusalem, ndele tava fikama pomukangha wetale, olo li li komulondo, pondjila oyo ya finda konhele yovakoshi voikutu. 18 Eshi va ifana ohamba i dje mo, Eliakim, omonamati waHilkia, oo a li ha pashukile eumbo,* hamushanga Sebna nosho yo Joa, omonamati waAsaf, omushangi wondjokonona, ova ya kuvo.
19 Onghee Rabsake okwa tya kuvo: “Alikana, lombweleni Hiskia kutya, ‘Ohamba inene, ohamba yaAssiria, tai ti ngaha: “Owe lineekela mushike? 20 Oto ti, ‘Ondi na omhangela neenghono doku ka lwa moita,’ ashike odo eendjovo dongaho. Owe lineekela mulyelye, opo u tukululile nge oshibofa? 21 Tala, owe lineekela mekwafo laEgipiti, oo e li olumbungu la tenda, oko ngeenge omunhu te likolelele ko tali mu tu meke noku li tyuula. Farao, ohamba yaEgipiti, osho e li ngaho kwaaveshe ovo tave mu lineekele. 22 Nongeenge otamu lombwele nge, tamu ti, ‘Otwe lineekela muJehova, Kalunga ketu,’ haye ngoo oo eenhele daye dokoikulundudu neealtari daye da hanaunwa po kuHiskia, ofimbo ta lombwele Juda naJerusalem ta ti, ‘Omu na okulinyongamena koaltari ei i li muJerusalem’?”’ 23 Alikana, ninga paife eudafanotwokumwe nomwene wange, ohamba yaAssiria: Ohandi ku pe eenghambe 2 000, ngeenge oto dulu oku di kongela ovalondi va wana. 24 Ongahelipi hano to ka dula okufinda nande ongoloneya, oo munini movapiya vomwene wange, ofimbo to lineekele Egipiti omolwomatemba novalondinghambe? 25 Mbela onde uya inandi pewa epitikilo kuJehova, eshi nde uya okulwifa onhele ei noku i hanauna po? Jehova okwa lombwela nge ye mwene, a ti, ‘Inda u ka lwife oshilando osho noku shi hanauna po.’”
26 Opo nee Eliakim, omonamati waHilkia, Sebna naJoa ova lombwela Rabsake, va ti: “Alikana, popya novapiya voye melaka lOshiaramia,* molwaashi fye ohatu shi udu; ino popya nafye melaka lOshijuda, opo ovanhu ovo ve li omutumba kekuma vaha ude ko.” 27 Ashike Rabsake okwe va nyamukula, a ti: “Mbela omwene wange okwa tuma nge ashike ndi popye nanye nosho yo nomwene weni eendjovo edi? Mbela ina tuma nge yo ndi popye novalumenhu ovo ve li omutumba kekuma, ovo tava ka lya omatudi nokunwa omaxu avo vene, pamwe nanye?”
28 Opo nee Rabsake okwa fikama, ndele ta ingida mokule melaka lOshijuda, ta ti: “Udeni eendjovo dohamba inene, ohamba yaAssiria. 29 Ohamba otai ti ngaha, ‘Inamu pukifwa kuHiskia, molwaashi ita dulu oku mu xupifa meke lange. 30 Inamu efa yo Hiskia e mu ningife mu lineekele muJehova, eshi ta ti: “Jehova ote ke tu xupifa filufilu, noshilando eshi itashi yandjwa momake ohamba yaAssiria.” 31 Inamu pwilikina kuHiskia, molwaashi ohamba yaAssiria otai ti: “Ningeni ombili naame nokuliyandja,* nakeshe umwe womunye ota ka lya komundjebele waye mwene nokomukwiyu waye mwene, nota ka nwa omeva omondungu yaye mwene, 32 fiyo handi uya, ndele handi mu twala kedu olo li li ngaashi leni, edu loilya nolomaviinyu mape, edu lomungome noloikunino yomandjebele, edu lomiti deemono nolomaadi eenyiki. Opo nee otamu ka kala nomwenyo, noitamu ka fya. Inamu pwilikina kuHiskia, molwaashi ye ote mu pukifa, eshi ta ti, ‘Jehova ote tu xupifa.’ 33 Mbela ope na ngoo ookalunga ovo va dula okuxupifa oilando yavo meke lohamba yaAssiria? 34 Ookalunga vaHamat novaArpad ove li peni? Ookalunga vaSefarvaim, vaHena novaIva ove li peni? Ova dula tuu okuxupifa Samaria momake ange? 35 Olyelye mokati kookalunga aveshe voilando oyo a dula okuxupifa oshilando shaye meke lange, opo Jehova a dule okuxupifa Jerusalem meke lange?”’”
36 Ashike ovanhu ova kala va mwena, noinava nyamukula nande onondjovo imwe, molwaashi ohamba oya yandja elombwelo tali ti, “Inamu mu nyamukula.” 37 Ashike Eliakim, omonamati waHilkia, oo a li ta pashukile eumbo,* hamushanga Sebna naJoa, omonamati waAsaf, omushangi wondjokonona, ove uya kuHiskia va djala oikutu ya pombauka, ndele tave mu lombwele eendjovo daRabsake.