Eehamba eenhivali
19 Diva eshi ohamba Hiskia ya uda oshinima osho, oya pombaula oikutu yayo, ndele tai djala oshako, noya ya meumbo laJehova. 2 Opo nee oya tuma Eliakim, oo a li ta pashukile eumbo,* hamushanga Sebna, novakulunhu vovapristeri, va djala eeshako, komuprofeti Jesaja, omonamati waAmos. 3 Ova tya kuye: “Eshi osho Hiskia a popya, ‘Efiku eli efiku loudjuu, lehandu* nolokufifwa ohoni. Otwa fa omukainhu, oo e li pokudala,* ashike ke na eenghono dokudala. 4 Pamwe Jehova, Kalunga koye, ota ka uda eendjovo adishe odo Rabsake, oo a tumwa komwene waye, ohamba yaAssiria, a sheke Kalunga omunamwenyo, note ke lihokolola omolweendjovo odo Jehova, Kalunga koye, a uda. Onghee ilikana ponhele yoshixupe osho sha xupa po.’”
5 Onghee ovapiya vohamba Hiskia ova ya kuJesaja, 6 na Jesaja okwa tya kuvo: “Eshi osho mu na okulombwela omwene weni, ‘Jehova ota ti ngaha, “Inamu kala mwa tila omolweendjovo odo mwa uda, eendjovo odo ovapiya vohamba yaAssiria va ula nge. 7 Ohandi tula ediladilo momutima waye,* nota ka uda onghundana, ndele ta shuna koshilongo shavo, nohandi ke mu ningifa a file moshilongo shavo keongamukonda.”’”
8 Konima eshi Rabsake a uda kutya ohamba yaAssiria oya dja mo muLakis, okwa shuna kuyo, nokwa hanga tai lwifa Libna. 9 Ohamba oya uda taku ti: “Tirhaka, ohamba yaEtiopia, okwe uya oku ku lwifa.” Onghee okwa tuma vali ovatumwa kuHiskia, ta ti: 10 “Lombwela Hiskia, ohamba yaJuda, to ti, ‘Ino efa Kalunga koye, oo we lineekela, e ku pukife, eshi ta ti: “Jerusalem itashi ka yandjwa momake ohamba yaAssiria.” 11 Tala, owa uda osho eehamba daAssiria da ningila oilongo aishe moku i hanauna po. Mbela oove nee auke to ka xupifwa? 12 Mbela ookalunga voiwana, oyo ootatekulululwa va hanauna po, ove va xupifa? Gosan, Haran, Resef nosho yo ovanhu vomuEden, ovo va li muTelassar, ove li peni? 13 Ohamba yaHamat, ohamba yaArpad nohamba yoilando yaSefarvaim, yaHena noyaIva, odi li peni?’”
14 Hiskia okwa kufa eenhumwafo momake ovatumwa, ndele te di lesha, opo nee Hiskia okwa ya keumbo laJehova, ndele te di* nyanununa mo moipafi yaJehova. 15 Hiskia okwa hovela okwiilikana moipafi yaJehova, ta ti: “Alikana, Jehova, Kalunga kaIsrael, u li omutumba kolukalwapangelo, kombada* yovakerubi, oove auke Kalunga kashili komauhamba aeshe okombada yedu. Oove wa shita eulu nedu. 16 Alikana, Jehova, pwilikina, ndele to udu ko. Alikana, Jehova, patulula omesho oye, u mone ko. Uda eendjovo, odo Sanheerib a tuma, opo a sheke Kalunga omunamwenyo. 17 Alikana, Jehova, oshoshili kutya, eehamba daAssiria oda hanauna po oiwana noilongo yado. 18 Oda umbila ookalunga kavo momundilo, molwaashi kava li ookalunga kashili, ndele oilonga yomake ovanhu, oiti nomamanya, nomolwaashi va dula oku va hanauna po. 19 Ashike paife, alikana, Jehova, Kalunga ketu, alikana, tu xupifa momake aye, opo omauhamba aeshe kombada yedu a shiive kutya, oove auke Kalunga, Jehova.”
20 Opo nee Jesaja, omonamati waAmos, okwa tuma etumwalaka kuHiskia, tali ti: “Jehova, Kalunga kaIsrael, ota ti, ‘Onda uda eilikano loye li na sha naSanheerib, ohamba yaAssiria. 21 Jehova okwa popya shi na sha naSanheerib, a ti:
“Okakadona elela kaSion otake ku tondo notake ku sheke.
Okakadona kaJerusalem otake ku pukapukile omutwe wako.
22 Olyelye wa kembaula nowe mu tuka?
Olyelye wa hanyena
Nowe mu tala neisho lii?
Owe shi ningila Omuyapuki waIsrael!
23 Owa kembaula Jehova okupitila movatumwa voye, wa ti:
‘Ohandi ka londa koxulo yeemhunda
Nomatemba ange oita mahapu,
Koitukulwa ye likalela yaLibanon.
Ohandi ka tetaula po omisederi dasho dile nomiti dasho diwa domidjenipa.
Ohandi ka ya keenhele dasho dokokule komifitu dasho da fita.
24 Ohandi ka fa eendungu nokunwa omeva okoilongo;
Ohandi ka pwiininika oumulonga* aveshe vaEgipiti neemhadi dange.’
25 Mbela ino shi uda? Osha tokolwa* okudja nale.
Onde shi longekida* okudja pomafiku onale.
Paife ohandi ke shi wanifa po.
Oilando yomakuma a pama oto ke i ninga onduba yoikulukuma.
26 Ovakalimo vamo otava ka kala vehe na ekwafo lasha;
Otava ka mbadapalifwa nokufifwa ohoni.
Otava ka kala ngaashi oimeno nomwiidi mutalala,
Ngaashi omwiidi u li kombada yeumbo, wa kukutikwa komhepo yokoushilo.
27 Ashike ondi ku shii nawa, ngeenge u li omutumba, ngeenge to di mo, ile ngeenge to uya mo,
Nongeenge wa handukila nge,
28 Molwaashi owa handukila nge, neendjovo dehandu loye oda fika momatwi ange.
Onghee ohandi ka tula ongona meyulu loye noshitomo shange pokati komilungu doye,
Nohandi ke ku shunifa nondjila oyo we uya nayo.”
29 “‘Eshi osho tashi ningi edidiliko loye:* Modula ei, oto ka lya osho sha mena kusho vene,* nomomudo omutivali, oto ka lya oilya oyo ya twiyuka. Ashike momudo omutitatu, oto ka kuna eembuto nokuteya, noto ka kuna oikunino yomandjebele, ndele to li oiimati yayo. 30 Ovanhu vomeumbo laJuda, ovo va faduka po, ovo va xupa po, otava ka kala ngaashi omuti u na omidi da ya moule notau imi oiimati ihapu. 31 Oshixupe otashi ka dja mo muJerusalem, naavo va xupa po otava ka dja ko kOmhunda yaSion. Ouladi waJehova womatangakwaita otau ke shi ninga.
32 “‘Onghee Jehova okwa popya kombinga yohamba yaAssiria, a ti:
“Ite ke uya mo moshilando eshi,
Ile a umbe mo oshikuti,
Ile a ye mo noshikelelifo,
Ile e shi ningile ekondeka londuba yomadu.
33 Ondjila oyo e uya nayo oyo ta ka shuna nayo;
Ite ke uya mo moshilando eshi, Jehova osho ta ti.
34 “Ohandi ka lwila oshilando eshi,” noku shi xupifa omolwedina lange
Nomolwomupiya wange, David.”’”
35 Oufiku oo tuu oo, omweengeli waJehova okwa ya, ndele ta dipaa ovalumenhu 185 000 monhanda yOvaassiria. Eshi ovanhu va penduka ongula inene, ova mona ovanhu aveshe va fya. 36 Opo nee Sanheerib, ohamba yaAssiria, okwa dja ko, ndele ta shuna kuNinive, naako oko a kala. 37 Ofimbo a li te linyongamene meumbo* lakalunga kaye, Nisroko, ovanamati vaye, Adrammelek naShareser, ove mu dipaa neongamukonda, ndele tava i onhapo kedu laArarat. Omonamati waye, Esar-haddon, okwa ninga ohamba ponhele yaye.