Hesekiel
28 Ondjovo yaJehova oye uya vali kwaame tai ti: 2 “Omona womunhu, lombwela omuwiliki waTirus to ti: ‘Eshi osho Omwene Omunamapangelo aeshe, Jehova, ta ti:
“Molwaashi omutima woye owe linenepeka, oto twikile nokupopya kutya, ‘Aame kalunga.
Ondi li omutumba kolukalwapangelo lakalunga pokati* kefuta.’
Ndele ove omunhu ashike, ku fi kalunga,
Nonande momutima woye ou udite kutya ou li kalunga.
3 Tala! Ove omunaendunge u dule Daniel.
Kape na oiholekwa ye ku holekwa.
4 Omolwounongo neendunge doye dokuyoolola, owe lipunapalifa,
Noto twikile okulituvikilila oshingoli noshisilveri meemhungulilo doye domamona.
5 Ounghulungu woye wokungeshefa owe ku etela oupuna muhapu,
Nomutima woye owe linenepeka omolwoupuna woye.”’
6 “‘Onghee hano, eshi osho Omwene Omunamapangelo aeshe, Jehova, ta ti:
“Molwaashi momutima woye ou udite kutya oove kalunga,
7 Ohandi ka eta ovanailongo, ve ku lwife, ovo ve li ovakwanyanya neenghono vomoiwana,
Notava ka pweya mo omaongamukonda avo va lwife ewapalo lounongo woye
Notava ka nyateka etumbalo loye linene.
9 Mbela natango oto ka tya ngoo, ‘Aame kalunga,’ kwaao te ku dipaa?
Oto ka kala omunhu wongaho, ndele hakalunga, momake aavo tave ku nyateke.”’
10 ‘Oto ka fya efyo la fa laavo inava pita etanda, momake ovanailongo,
Osheshi ame mwene onde shi popya,’ Omwene Omunamapangelo aeshe, Jehova, osho ta ti.”
11 Nondjovo yaJehova oye uya vali kwaame tai ti: 12 “Omona womunhu, imba eimbilokemo* li na sha nohamba yaTirus, ndele to i lombwele to ti, ‘Eshi osho Omwene Omunamapangelo aeshe, Jehova, ta ti:
“Owa li oshihopaenenwa shiwa,*
U yadi ounongo, nowa wanenena mewapalo.
13 Owa li muEden, oshikunino shaKalunga.
Owa li wa wapekwa noumanya aveshe vondilo,
Oumanya vorubi, votopas novoyaspis; vokrisolit, voniks novojadi; vosafire, votekois nosho yo vo-emerald;
Noikwatifo yavo oya li ya longwa moshingoli.
Oya li ya longwa mefiku olo wa shitwa.
14 Onde ku tula po u li omukerubi omuvaekwa ta amene.
Owa li komhunda iyapuki yaKalunga, nowa endaenda mokati komamanya ondilo.
15 Okudja mefiku omo wa shitwa, kwa li wa monika epuko meendjila doye,
Fiyo osheshi okuhenouyuki kwa monika mwoove.
16 Omolwomangeshefelo oye mahapu,
Owa li wa yadifwa elongifo leenghono, nowa hovela okunyona.
Onghee ohandi ku kupulashi u li oshinima shitondifa okudja komhunda yaKalunga noku ku hanauna po,
Ove omukerubi wokwaamena, kokule nomamanya omundilo.
17 Omutima woye owa li we linenepeka omolwewapalo loye.
Owa nyona po ounongo woye omolwetumbalo loye mwene linene.
Ohandi ke ku umbila kombada yedu.
Ohandi ka talifa eehamba oudjuu woye.
18 Omolwetimba loye linene nosho yo okungeshefa kwoye kuhe li pauyuki, owa nyateka eenhele doye diyapuki.
Ohandi ka tukula omundilo mokati koye, notau ke ku xwika po.
Ohandi ke ku ninga omute kombada yedu moipafi yaaveshe ovo tave ku tale.
19 Aveshe ovo va li ve ku shii mokati kovanhu otave ke ku tala va kumwa.
Exulilo loye otali ka kala lombadilila nolitilifa,
Noto ka xula po fiyo alushe.”’”
20 Nondjovo yaJehova oye uya vali kwaame tai ti: 21 “Omona womunhu, taalelifa oshipala shoye kuSidon, nokuxunganeka u li omhinge naye. 22 Ou na okutya, ‘Eshi osho Omwene Omunamapangelo aeshe, Jehova, ta ti:
“Akutu Sidon, ondi li omhinge naave, nohandi ka tumbalekwa mokati koye;
Novanhu otava ka shiiva kutya aame Jehova, eshi handi ke mu tokola, nohandi ka yapulwa muye.
23 Ohandi ka tumina muye oudu wolutapo, nohonde otai ka kunguluka momapandavanda aye.
Oonakudipawa otava ka wila mokati kaye, eshi eongamukonda tali ke mu hanga okudja keembinga adishe;
Nove na oku ka shiiva kutya aame Jehova.
24 “‘“Opo nee eumbo laIsrael itali ka kala vali la dingililwa keeshosholo da nyika oshiponga nosho yo komakiya haa ehameke, ovo hava ungaunga navo nodino; novanhu otava ka shiiva kutya aame Omwene Omunamapangelo aeshe, Jehova.”’
25 “‘Eshi osho Omwene Omunamapangelo aeshe, Jehova, ta ti: “Ngeenge onda ongele vali eumbo laIsrael, okudja mokati kovanhu omo va li ve lihanifilwa, ohandi ka yapulwa mokati kavo moipafi yoiwana. Notava ka kala medu lavo, olo nde li pa omupiya wange, Jakob. 26 Otava kala mulo ve li meameno, notava ka tunga omaumbo, nokutwika omindjebele, notava ka kala ve li meameno, eshi handi ka tokola aveshe ovo ve va dingilila, ovo hava ungaunga navo nodino; notava ka shiiva kutya aame Jehova, Kalunga kavo.”’”