Exodus
27 “Ou na okuninga oaltari moiti yomwoonde, oule wayo womukokomoko omaludimbo* atano, nounene wayo omaludimbo atano. Oaltari oi na okukala i na eehuke nhee di fike pamwe noule wayo wopombada omaludimbo atatu. 2 Oaltari ou na oku i ningila eembinga meehuke dayo nhee; eembinga odo odi na okukala oshitukulwa shoaltari, nou na okuvaeka oaltari nongopolo. 3 Ou na okuninga omavela okuyuka mo omute,* nosho yo oixupulo, ouyaxa, omafoloko noikwatelwa yomundilo. Oilongifo aishe yomoaltari ou na oku i ninga mongopolo. 4 Oaltari ou na oku i ningila odalate yokuyofela yongopolo, nomeehuke nhee dodalate ou na okutula mo oikongo ine yongopolo. 5 Odalate oyo ou na oku i tula moaltari pedu lomungenge, noi na okukala pokati koaltari. 6 Ou na okuninga eepala doaltari moiti yomwoonde noku di vaeka nongopolo. 7 Eepala odo odi na okutulwa moikongo, opo di kale keembinga mbali doaltari eshi ya humbatwa. 8 Oaltari ou na oku i ninga molupe loshipakete sha patuluka kombada nokoshitako. Ou na oku i ninga naanaa ngaashi nde ku ulikila komhunda.
9 “Ou na yo okuninga oshihale shetwalihangano. Kombinga yokolukadi loshihale osho, oku na okukala omalapi a longwa meengodi diwa doliina da hodilwa, a endjelela a taalela kolukadi, e na oule womaludimbo 100 kombinga imwe. 10 Oshi na okukala shi na eengudi 20 noikwatelwamhadi 20 yongopolo. Ouhakifo veengudi noupatifo* vado ove na okukala voshisilveri. 11 Omalapi oo a endjelela kombinga yokolundume nao oku na okukala e na oule womukokomoko womaludimbo 100, pamwe neengudi 20 noikwatelwamhadi yado yongopolo 20, nouhakifo voshisilveri nosho yo oupatifo* veengudi. 12 Momunghulo woshihale, osho kombinga yokouninginino, omu na okukala omalapi, a endjelela oshinano shomaludimbo 50, neengudi omulongo nosho yo oikwatelwamhadi omulongo. 13 Oshinano shoshihale kombinga yokoushilo, oko haku piti etango, oshi na okukala shi na omaludimbo 50. 14 Kombinga imwe oku na okukala omalapi a endjelela, oshinano shomaludimbo 15, neengudi nhatu nosho yo oikwatelwamhadi itatu. 15 Nokombinga ikwao, oku na okukala omalapi, a endjelela oshinano shomaludimbo 15, neengudi nhatu nosho yo oikwatelwamhadi itatu.
16 “Poshivelo shoshihale ope na okukala oshiidilifoyata shoule womukokomoko womaludimbo 20 sha longwa meengodi dimbulau, molududi leedi lipeepela, moshiyata shitilyana, meengodi diwa doliina da hodilwa, ya hondjelwa kumwe, neengudi nhee nosho yo oikwatelwamhadi yayo ine. 17 Eengudi adishe doshihale odi na okukala di na oupatifo nosho yo ouhakifo voshisilveri, ashike oikwatelwamhadi yado oi na okukala yongopolo. 18 Oule womukokomoko woshihale osho ou na okukala u na omaludimbo 100, ounene omaludimbo 50, noule wopombada womalapi, oo a endjelela, a longwa meengodi diwa doliina da hodilwa, omaludimbo 5, noshi na okukala shi na oikwatelwamhadi yongopolo. 19 Oilongifo aishe noinima aishe oyo ya longifwa etwalihangano nosho yo outenda vokukwata etwalihangano noutenda aveshe vokukwata oshihale oi na okukala yongopolo.
20 “Ou na okulombwela Ovaisrael ve ku etele omaadi mawa eemono omeelamba, opo eelamba di kale da tema efimbo alishe. 21 Aron novanamati vaye ove na okulongekidila eelamba metwali lokwoongalela olo li li kondje yetukulifolapi, olo li li popepi nOipelende yOumbangi, opo di kale da tema okudja onguloshi fiyo ongula koshipala shaJehova. Oyo onghedimhango yaalushe komapupi avo aeshe oyo i na okushikulwa kOvaisrael.