Daniel

11 “Ashike ame, modula yotete yaDarius, Omumedia, onda fikama ndi mu pameke nondi mu amene.* 2 Osho handi ku lombwele paife oshoshili:

“Tala! Eehamba dikwao nhatu otadi ka holoka* muPersia, nohamba onhine otai ka ongela omamona mahapu i dulife dikwao adishe. Nongeenge oya nghonopala okupitila moupuna wayo, otai ka longifa keshe shimwe i lwife ouhamba waGreka.

3 “Nohamba inaenghono otai ka holoka, nokupangela i na eenghono dinene nokuninga osho tashi i wapalele. 4 Ashike ngeenge oya holoka, ouhamba wayo otau ka teyaulwa po nokutukulilwa eemhepo nhee deulu, ndele hakoludalo* layo, na hangaashi eenghono odo ya pangela nado; osheshi ouhamba wayo otau ka dudwa mo, nokuya kuvamwe, kakele kaavo.

5 “Nohamba yokolukadi otai ka nghonopala, sha hala okutya, umwe womomalenga ayo; ashike imwe otai ke i finda, notai ka pangela i na eenghono dinene, dinene di dule daayo tai pangele.

6 “Konima yeedula donhumba, otadi ke limanga kumwe, nomonakadona wohamba yokolukadi ota ka ya kohamba yokolundume, opo va ninge elongekido* la yuka. Ashike ita ka kala e na eenghonopangelo dokwooko kwaye; noitai ka fikama, ile okwooko kwayo; nota ka yandjwa, ye naavo tave mu eta mo, naao e mu dala, naao te mu nghonopaleke pomafimbo oo. 7 Naumwe a dja moshitutumine shomidi daye ota ka holoka ponhele yaye, note ke uya ketangakwaita nokulwifa ohotekuma yohamba yokolundume note ke va katukila onghatu nokufindana. 8 Natango ote ke uya kuEgipiti noikalunga yavo, noihongwafano yavo yoivela,* noinima yavo iwa* yoshisilveri noyoshingoli nosho yo neenghwate. Osheshi oule weedula donhumba ota ka fikama kokule nohamba yokolundume, 9 oyo tai ke uya i lwife ouhamba wohamba yokolukadi, ashike otai ka shuna kedu layo vene.

10 “Shi na sha novanamati vaye, otave ke lilongekidila oita notava ka ongela vahapu, etangakwaita linene. Ota ka xuma komesho shili nokukombolola ngaashi efundja. Ashike ota ka shuna nota ka lwa oita fiyo okohotekuma yaye.

11 “Nohamba yokolukadi otai ka handuka notai ka ya noku mu lwifa, sha hala okutya, ohamba yokolundume; notai ka ongela ongudu inene, ndele ongudu oyo otai ka yandjwa meke laikwao. 12 Nongudu oyo otai ka kufwa po. Omutima wayo otau ke linenepeka, notai ka ningifa omayovi omilongo va wile po; ashike itai ka longifa ondodo yayo ya kula.

13 “Nohamba yokolundume otai ka aluka nokwoongela ongudu inene i dulife yotete; nopexulilo lomafimbo, konima yeedula donhumba, otai ke uya shili netangakwaita la kula nosho yo noinima ihapu. 14 Pomafimbo oo vahapu otava ka fikama va lwife ohamba yokolukadi.

“Naavo ve hole elongifo leenghono,* ovo ve li mokati koshiwana sheni, otava ka iwa navo va kendabale okuningifa emoniko li wanifwe; ashike otava ka punduka.

15 “Nohamba yokolundume otai ke uya, notai ka ninga ekondeka londuba yomadu nokukwata ko oshilando shomakuma a pama. Nomaoko* okolukadi itaa ka fikama, ile ovalumenhu vayo, ovo va hoololwa; noitava ka kala ve na eenghono dokufikama. 16 Oo te uya oku i lwifa ota ka ninga osho tashi mu wapalele, nokape na oo ta ka fikama, e i kondjife. Ota ka fikama moshilongo Sha wapala,* neenghono dokuhanauna otadi ka kala meke laye. 17 Ota ka lulika oshipala shaye* e uye neenghono dinene douhamba waye, notapa ka kala elongekido* la yuka naye; nota ka katuka nomupondo. Shi na sha nomonakadona wovakainhu, ota ka yandjwa kuye e mu hanaune po. Noita ka fikama noita ka twikila okukala waye. 18 Ota ka pungulula ko oshipala shaye shi taalele kominghulofuta nota ka kwata ko vahapu. Nomuwiliki ota ka xulifa po odino yaye, opo aha kale vali a dinika; ote ke i mu shunifila. 19 Opo nee ota ka taalelifa vali oshipala shaye keehotekuma doshilongo shaye mwene, notai ka punduka nokuwila po, ndele ita ka monika.

20 “Noponhele yaye otapa ka holoka umwe, oo ha ningifa omufendelifi* a ende mouhamba muwa elela, ashike meni lomafiku manini, ota ka teyaulwa po, nonande hamehandu, ile moita.

21 “Noponhele yaye otapa ka fikama oo a dinika* noitave ke mu pa efimano louhamba; note ke uya pefimbo leameno* nota ka kwata ko ouhamba noupu.* 22 Nomaoko* efundja, otaa ka kombololwa po omolwaye, notaa ka teyaulwa po; ngaashi tashi ka ningilwa Omuwiliki wehangano. 23 Nomolweudafanotwokumwe lavo naye, ota ka twikila okukengelela nokufikama, ndele ta nghonopala okupitila moshiwana shinini. 24 Pefimbo leameno,* ote ke uya koitukulwa ya punapala* unene yoshitukulwalongo* nota ka ninga osho ooxe nosho yo ooxe yavo inava ninga. Oinima oyo ya nyekwa ko noixuulwa* nosho yo oinima vali imwe iwa ote ke i va tukulila; nota ka pangelela omhangela eenhele domakuma a pama, ndele oule ashike wokafimbo.

25 “Nota ka nyatipala nokulongekida omutima waye a lwife ohamba yokolukadi e na etangakwaita linene, nohamba yokolukadi otai ke lilongekidila oita netangakwaita la kula unene noli na eenghono. Noita ka pondola, molwaashi otave ke mu pangelela omhangela. 26 Naavo hava li eendja daye otava ka etifa ehanauno laye.

“Shi na sha netangakwaita laye, otali ka kombololwa po,* navahapu otava ka dipawa.

27 “Shi na sha neehamba odo mbali, omitima dado otadi ka kala da hala okulonga osho shii, notadi ka kala omutumba poshitaafula shimwe tadi lombwelafana oipupulu. Ndele kape na osho tashi ka pondola, molwaashi exulilo otali ke uya pefimbo olo la tulwa po.

28 “Notai ka shuna kedu layo i na oinima ihapu unene, nomutima wayo otau ka kala u li omhinge nehangano liyapuki. Otai ka pondola nokushuna kedu layo.

29 “Otai ka shuna pefimbo olo la tulwa po, ndele tai uya okukondjifa olukadi. Ashike pefimbo olo itashi ka kala ngaashi sha li nale, 30 osheshi eeskepa domuKittim otadi ke uya oku i kondjifa, notai ka ninipikwa.

“Otai ka shuna nokuyandja omatokolo a kwata moiti* kehangano liyapuki nokukatuka nomupondo; notai ka shuna nokuyandja elitulemo kwaavo tava fiye po ehangano liyapuki. 31 Nomaoko* otaa ka fikama taa di puyo; notaa ka nyateka onhele iyapuki, ohotekuma, nokukufa mo eyambo laalushe.*

“Notava ka tula ponhele oshinima shitondifa osho tashi etifa ehanauno.

32 “Naavo tava katuka shihe li pandunge shi na sha nehangano, ote ke va ninga ovashunimonima okupitila meendjovo domufenu.* Ashike ovanhu, ovo ve shii Kalunga kavo, otava ka findana nokupondola. 33 Naavo ve na eendunge mokati kovanhu otava ka honga vahapu. Notava ka pundukifwa keongamukonda nokomalaka omundilo, koukwatwa nokokunyekwa ko oule womafiku onhumba. 34 Ashike ngeenge ova pundukifwa, otava ka pewa ekwafo linini; navahapu otave ke va waimina okupitila meendjovo domufenu.* 35 Navamwe ovo ve na eendunge otava ka pundukifwa, opo ku longwe oilonga yokuyelifwa omolwavo nokukosholwa nokutokekwa fiyo efimbo lexulilo; molwaashi efimbo olo la tulwa po, opo tali uya.

36 “Ohamba otai ka ninga osho tashi i wapalele, notai ke litumbaleka nokulifimanekifa kombada yakalunga keshe; otai ka popya oinima tai kumwifa i li omhinge naKalunga wookalunga. Notai ka kala tai pondola fiyo etokolo tali pu; molwaashi osho sha tokolwa oshi na okuningwa. 37 Itai ka fimaneka Kalunga kooxe; noitai ka fimaneka osho shi holike kovakainhu, ile kukalunga umwe, ashike otai ke lifimanekifa kombada yakeshe umwe. 38 Ndele ponhele yaasho,* otai ka yandja efimano kukalunga keehotekuma; otai ka yandja efimano kukalunga, oo ooxe inava shiiva, okupitila moshingoli nomoshisilveri nomomamanya ondilo nomoinima iwa.* 39 Otai ka pondola shi na sha neehotengulu domakuma a pama unene, pamwe* nakalunga omunailongo. Otai ka yandja efimano linene kwaavo have i fimaneke,* notai ke va ninga va pangele mokati kavahapu; notai ka yandja* edu li li ondjabi.

40 “Pefimbo lexulilo, ohamba yokolukadi otai ka kondja naye mokuundulafana,* nohamba yokolundume otai ke mu kondjifa noshikungulu shomatemba noshovalondinghambe nosheeskepa dihapu; notai ka ya moilongo nokukombolola ngaashi efundja. 41 Otai ka ya yo moshilongo Sha wapala,* noilongo ihapu otai ka pundukifwa. Ashike ei oyo ei ya ya onhapo okudja meke layo: Edom naMoab nosho yo oshitukulwa shinene shOvaammoni. 42 Notai ka twikila okuyelulila eke layo oilongo; ndele shi na sha nedu laEgipiti, itali ka ya onhapo. 43 Notai ka pangela omamona a holekwa, oshingoli noshisilveri, noinima aishe iwa* yomuEgipiti. NOvalibia nosho yo Ovaetiopia otava ka shikula omana ayo.*

44 “Ashike eenghundana tadi di koushilo* nosho yo tadi di kolundume otadi ke i piyaaneka, notai ka ya ya fula onya i ka hanaune po nokutokolela vahapu ehanauno. 45 Notai ka dika omatwali ouhamba* wayo pokati kefuta linene nomhunda iyapuki yEwapalo;* notai ke uya pexulilo layo, noitapa ka kala oo te i kwafele.