Eehamba eenhivali
4 Umwe womovakulukadi vovanamati vovaprofeti, okwa ingida Elisa mokule, ta ti: “Omushamane wange, oo a li omupiya woye, okwa fya, nou shi shii nawa kutya omupiya woye okwa li alushe ha tila Jehova. Okwa li e na eendjo domulumenhu umwe, nomulumenhu oo okwe uya a kufe po ovana vange va ninge ovapika vaye.” 2 Opo nee Elisa okwa tya kuye: “Nandi ku ningile shike? Lombwele nge, meumbo ou na mo shike?” Okwa nyamukula, a ti: “Omupiya woye ke na mo sha nandenande, kakele koshanga yomaadi.” 3 Onghee okwa tya kuye: “Inda pondje, ndele to pula ovashiinda shoye aveshe oikwatelwa ihe na sha. Pula oikwatelwa ihapu ngaashi tashi shiiva. 4 Opo nee inda meumbo pamwe novanamati voye, ndele to idile po. Yadeka oikwatelwa aishe nomaadi, ndele oyo i yadi to i tula ombinga imwe.” 5 Onghee omukulukadi okwa dja po puye.
Eshi e liidilila mo pamwe novanamati vaye, ovanamati vaye ova kala tave mu pe oikwatelwa, ofimbo ta tile mo. 6 Eshi oikwatelwa ya yada, okwa tya kuumwe womovanamati vaye: “Pe nge vali oshikwatelwa shimwe.” Ashike omonamati waye okwa tya: “Kape na vali oikwatelwa.” Opo nee omaadi kaa li vali taa kunguluka. 7 Onghee omukulukadi okwa ya komupiya waKalunga kashili, ndele te shi mu lombwele, nomupiya oo okwa ti: “Inda, ndele to landifa po omaadi, opo u fute eendjo doye, ndele eshi sha xupa po tashi ningi shoye noshovanamati voye.”
8 Efiku limwe, Elisa okwa li a ya kuSunemi, oko kwa li ku na omukainhu a tumbala, nokwe mu shiva va lye pamwe. Alushe ngeenge a li ta piti po, okwa li ha ka lya pamwe naye. 9 Onghee omukainhu oo okwa tya komushamane waye: “Ondi shi shii kutya omulumenhu, oo ha ende apa alushe, omupiya omuyapuki waKalunga. 10 Alikana, natu mu tungile onduda inini pombada, ndele hatu tula mo ombete, oshitaafula, oshipundi nosho yo oshikwatelwalamba. Opo nee ngeenge te uya kufye, ota ka kala omo.”
11 Efiku limwe, Elisa okwa ya oko, ndele ta i a ka nangale monduda yopombada. 12 Opo nee okwa lombwela Gehasi, omupiya waye, a ti: “Ka ifane omukainhu Omusunemi.” Onghee okwe mu ifana, nomukainhu okwa fikama komesho yaye. 13 Elisa okwa tya kuGehasi: “Alikana, mu lombwela, to ti, ‘Owe lipa oilonga ihapu, eshi we tu tungila onduda. Owa hala okuningilwa shike? Nandi ke ku popile ko kohamba, ile kondjai yetangakwaita?’” Ashike okwe mu nyamukula, a ti: “Inandi pumbwa sha, molwaashi ondi li mokati koshiwana shetu.” 14 Onghee okwa ti: “Omukainhu oo natu mu ningile shike?” Gehasi okwa nyamukula a ti: “Ke na omonamati, nomushamane waye okwa kulupa.” 15 Diva Elisa okwa ti: “Mu ifana.” Onghee okwe mu ifana, nomukainhu okwa li a fikama lwoposhivelo. 16 Opo nee okwa ti: “Modula tai uya, pefimbo eli, oto ka kala u na okaana okamati.” Ashike omukainhu okwa ti: “Ahawe, omwene wange, omupiya waKalunga kashili. Ino fufya omupiya woye.”
17 Omukainhu okwa ninga oufimba, nokwa dala okaana okamati pefimbo la faafana modula ya shikula ko, ngaashi Elisa a li e mu lombwela. 18 Okaana oka kula, nefiku limwe oka li ka ya kuxe, oo a li pamwe novateyi. 19 Oka kala taka ti kuxe: “Ohandi ehama omutwe.” Opo nee xe okwa tya komupiya waye: “Ka twala kuina.” 20 Onghee okwe ka shuna kuina, noka kala omutumba komatundji aye, fiyo opokati komutenya, ndele taka fi. 21 Opo nee ina okwa ya monduda yopombada; okwe ka nangeka kombete yomupiya waKalunga kashili, nokwa idila omuvelo, ndele ta i. 22 Okwa ifana omushamane waye, ndele ta ti: “Alikana, tumine nge umwe womovapiya voye nosho yo ondongi imwe, opo ndi ye diva komupiya waKalunga kashili, nokwaaluka.” 23 Ashike omushamane okwe mu pula, ta ti: “Omolwashike to ile kuye nena? Nena kashi fi omwedi mupe, ile eshabata.” Omukulukadi okwe mu nyamukula, a ti: “Aishe oi li nawa.” 24 Onghee omukulukadi okwa longekida ondongi yaye, nokwa tya komupiya waye: “Endelela. Ino endifa nge kanini, okuninga shapo nde ku lombwela.”
25 Opo nee okwa ya komupiya waKalunga kashili komhunda yaKarmel. Diva eshi omupiya waKalunga kashili e mu monena kokule, okwa tya kuGehasi, omupiya waye: “Tala, omukainhu Omusunemi oye winya. 26 Alikana, tondoka u ke mu shakeneke, ndele to mu pula to ti, ‘Ou li tuu nawa? Omushamane woye oku li ngoo nawa? Okaana koye oke li ngoo nawa?’” Opo nee omukulukadi okwe mu nyamukula, ta ti: “Aishe oi li nawa.” 27 Eshi e uya komhunda, komupiya waKalunga kashili, okwe mu kwata diva keemhadi. Opo nee Gehasi okwe uya popepi, e mu undule po, ashike omupiya waKalunga kashili okwa tya kuGehasi: “Mu efa, osheshi okwa* nyika oluhodi neenghono, na Jehova okwe shi holeka nge, noine shi lombwela nge.” 28 Omukulukadi okwa ti: “Mbela onda pula omwene wange a pe nge okaana okamati? Inandi ku lombwela kutya, ‘Ino ningila nge eudaneko itali wanifwa’?”
29 Diva okwa tya kuGehasi: “Lidingila oikutu yoye moshiya nokukufa onhaili yange meke loye, ndele to i. Ngeenge owa shakeneke omunhu, ino mu popifa, nongeenge umwe okwe ku popifa, ino mu nyamukula. Inda, ndele to tenheke onhaili yange moshipala shokaana oko okamati.” 30 Opo nee ina yokaana oko okwa ti: “Ohandi ane kuJehova, Kalunga omunamwenyo, kutya, ofimbo u na omwenyo, itandi ku fiye po.” Onghee okwa fikama, ndele ta i pamwe naye. 31 Gehasi okwe va tetekela, nokwa tula onhaili moshipala shokaana oko okamati, ashike kaka li taka ulike ke na omwenyo. Okwa shuna a ka shakeneke Elisa, ndele te mu lombwele, ta ti: “Okaana inaka penduka.”
32 Eshi Elisa e uya meumbo, okaana oka li ka nangala kombete yaye, ka fya. 33 Okwa ya meni nokwe liidilila mo pamwe nako, ndele ta hovele okwiilikana kuJehova. 34 Opo nee okwa londa kombete, ndele ta nangala kombada yokaana, nokwa tula omulungu waye komulungu wako, nomesho aye komesho ako, omake aye komake ako, nokwe lifidimika kuko, nolutu lokaana ola hovela okupupyala. 35 Okwa kala ta endaenda meumbo, ndele ta londo kombete, nokwe lifidimika vali kuko. Okaana oka twa onghisha lwoikando iheyali, nokonima yaasho oka pashuka. 36 Elisa okwa ifana Gehasi, ndele ta ti: “Ifana omukainhu Omusunemi.” Onghee okwe mu ifana, ndele te uya kuye. Opo nee okwa tya kuye: “Kufa po omonamati woye.” 37 Omukainhu okwe uya mo nokwa wila peemhadi daElisa, ndele te linyongamene pedu koshipala shaye, nokonima yaasho, okwa kufa po omonamati waye, ndele ta di mo.
38 Eshi Elisa a shuna kuGilgal, medu olo omwa li mu na ondjala. Ovanamati vovaprofeti ova li omutumba komesho yaElisa, nokwa tya komupiya waye: “Telekela ovanamati vovaprofeti oikulya mombiya oyo ya kula.” 39 Umwe womuvo okwa ya a ka tale oihemba mepya, nokwe litwa momuti womofuka, ndele ta kufa ko oiimati yao, nokwa yadeka oshikutu shaye. Opo nee okwa aluka, ndele te i tetele mombiya, nonande ka li e shii kutya oikwashike. 40 Lwanima, ova pa ovalumenhu oikulya va lye, ashike diva eshi ve i lya, ova ingida mokule tava ti: “Omupiya waKalunga kashili, mombiya omu na oudiyo!”* Nokava li vali tava dulu oku i lya. 41 Onghee okwa ti: “Etele nge oufila.” Konima eshi e u tula mombiya, okwa ti: “Pa ovanhu va lye.” Nomombiya kamwa li sha vali sha nyika oshiponga.
42 KuBaal-shalisha okwa dja omulumenhu, ndele ta etele omupiya waKalunga kashili omingome do-barley 20, da ningwa moiimati, oyo ya pya tete, nosho yo ekutu loilya ipe. Opo nee Elisa okwa ti: “I yandja kovanhu va lye.” 43 Ashike omupiya waye okwa ti: “Oikulya ei itai wanene ovanhu 100.” Opo nee Elisa okwa ti: “I yandja kovanhu va lye, osheshi Jehova okwa ti, ‘Otava ka lya, ndele tava xupifa po sha.’” 44 Onghee okwe va pa va lye, nova xupifa po sha, ngaashi Jehova a popya.