Omafimbo otete
5 Ava ovanamati vaRuben, oshiveli shaIsrael. Oye a li oshiveli, ndele molwaashi okwa nangala nomukulukadi waxe wopomunghulo,* oushiveli waye owa yandjwa po kovanamati vaJosef, omonamati waIsrael; onghee Ruben ina shangwa momusholondodo waavo ve na oufemba woushiveli. 2 Nonande Juda oye a li e na eenghono e dule ovamwaxe, nomuye omo mwa dja oo a ninga omuwiliki, Josef oye a pewa oushiveli. 3 Ovanamati vaRuben, oshiveli shaIsrael, ovo: Hanok, Pallu, Hesron naKarmi. 4 Ovanamati vaJoel ovo: Shemaia, omonamati waye oGog, omonamati waye oSimei, 5 omonamati waye oMika, omonamati waye oReaja, omonamati waye oBaal 6 nomonamati waye oBeera, oo a twalwa moukwatwa kuTiglat-pilneser, ohamba yaAsiria. Okwa li elenga lepata lOvaruben. 7 Ovamwaxe, ovo ve lishangifa pashikulafano lomaludi omaludalo avo, ovo: Jeiel, oo e li omutwe, Sakaria 8 naBela, omonamati waAsas, omonamati waShema, omonamati waJoel, oo a li ha di muAroer fiyo okuNebo naBaal-meon. 9 Okwa ka kala ha di koshitukulwa shokoushilo fiyo okombuwa, pomulonga waEufrat, molwaashi oimuna yavo oya li ya hapupala neenghono medu laGilead. 10 Pefimbo laSaul, ova lwifa Ovahagri, ovo va findwa moipafi yavo, onghee ova kala hava di momatwali avo moitukulwa aishe oyo i li koushilo waGilead.
11 Oludalo laGad ola li hali di popepi navo medu laBasan fiyo okuSalka. 12 Joel oye a li omutwe muBasan, Safam omutivali, opa li yo Janai naShafat. 13 Ovamwaxe pamapata omaukwaneumbo avo ovo: Mikael, Mesullam, Sheba, Jorai, Jakan, Sia naEber, aveshe kumwe vaheyali. 14 Ava ova li ovanamati vaAbihail, omonamati waHuri, omonamati waJaroa, omonamati waGilead, omonamati waMikael, omonamati waJesisai, omonamati waJagdo, omonamati waBus. 15 Omutwe woukwaneumbo wepata lavo oAhi, omonamati waAbdiel naAbdiel omonamati waGuni. 16 Ova li hava di muGilead, muBasan needoolopa dasho,* nomomaulifilo aeshe aSharon fiyo ve a tamununa mo. 17 Aveshe ova li va shangwa pefimbo laJotam, ohamba yaJuda, nopefimbo laJerobeam,* ohamba yaIsrael.
18 Ovaruben, Ovagad netata lepata laManasse ova li ve na ovakwaita ovanaenghono 44 760 metangakwaita lavo, ovo va li hava humbata oikelelifo, omaongamukonda, ve likundika omauta* nova deulilwa oita. 19 Ova lwifa Ovahagri, oludalo laJetur, laNafis nolaNodab. 20 Ova li va kwafelwa moku va lwifa, onghee Ovahagri naaveshe ovo va li pamwe navo, ova li va yandjwa momake avo, osheshi ova indila ekwafo kuKalunga moita nokwa uda ekemo lavo, molwaashi ova li ve mu lineekela. 21 Ova kwata ko oimuna yavo; eengamelo 50 000, eedi 250 000 neendongi 2 000. Ova kwata ko yo ovanhu* 100 000. 22 Ovanhu vahapu ova fya, molwaashi oita oyo oya li tai luwa kuKalunga kashili, nova kala meenhele davo fiyo opefimbo loukwatwa.
23 Oludalo letata lepata laManasse ola kala hali di muBasan fiyo okuBaal-hermon, Senir nofiyo okomhunda yaHermon. Ola li lihapu neenghono. 24 Ava ovo omitwe domaukwaneumbo pamapata avo: Efer, Ishi, Eliel, Asriel, Jeremia, Hodavia naJagdiel; ova li ovakwaita ovanaenghono, ovalumenhu va tumbala nova li omitwe domaukwaneumbo omapata avo. 25 Ashike ova katuka shihe li pandunge koshipala shaKalunga kooxekulululwa nova yambela ookalunga kovanhu vomedu olo, ovo Kalunga a hanauna po moipafi yavo. 26 Onghee Kalunga kaIsrael okwa pendula omhepo yaPul, ohamba yaAsiria (sha hala okutya, Tiglat-Pilneser ohamba yaAsiria), opo a twale moukwatwa ovo vomepata laRuben, laGad netata lepata laManasse. Okwe va twala kuHala, kuHabor, kuHara nosho yo popepi nomulonga waGosan, oko ve li fiyo okunena.