Exodus
4 Moses okwa nyamukula, a ti: “Ongahelipi ngeenge inava itavela nge noinava pwilikina kondaka yange, ndele tava ti, ‘Jehova ine ku lihololela?’” 2 Jehova okwa tya kuye: “Oshike osho u kwete meke loye?” Okwa nyamukula, a ti: “Odibo.” 3 Kalunga okwa ti: “I ekela pedu.” Opo nee okwe i ekela pedu, ndele tai shituka eyoka, na Moses okwe li faduka po. 4 Jehova okwa tya kuMoses: “Nana eke loye, ndele to li kwata komushila.” Onghee okwa nana eke laye nokwe li kwata, ndele tali shituka odibo. 5 Kalunga okwa ti: “Osho otashi ke va ningifa va itavele kutya Jehova, Kalunga kooxekulululwa, Kalunga kaAbraham, Kalunga kaIsak naKalunga kaJakob, okwe ku lihololela.”
6 Jehova okwa tya vali kuye: “Shitika eke loye moshikutu shoye.” Onghee okwa shitika eke laye moshikutu shaye. Eshi e li kufa mo, ola li la kwatwa koshilundu, la toka ngaashi eemhawe. 7 Natango, Kalunga okwa ti: “Shuna mo eke loye moshikutu shoye.” Opo nee okwa shuna mo eke laye moshikutu shaye. Eshi e li kufa mo moshikutu, ola veluka nola li ngaashi olutu laye alishe. 8 Kalunga okwa weda ko vali, a ti: “Ngeenge inave ku itavela, ile inava tomhwa kedidiliko lotete, otava ka itavela omolwedidiliko la shikula ko. 9 Natango, ngeenge itava itavele omolwomadidiliko oo avali notava anye okupwilikina kondaka yoye, oto ka kufa omeva momulonga waNil, ndele to a tile komutunda, nomeva oo wa kufa muNil otaa ka shituka ohonde komutunda.”
10 Moses okwa tya kuJehova: “Jehova, file nge onghenda. Ame kandi fi omupopi muwa nghee nda dja, naashi wa popya nomupiya woye, osheshi ohandi popi handi ende kashona,* nelaka lange ihali endelele.” 11 Jehova okwa tya kuye: “Olyelye a shitila omunhu okanya, ile olyelye e mu ninga omufitandaka, omufitamatwi, ha mono ko, ile omupofi? Mbela haame Jehova nde shi ninga? 12 Inda paife, ohandi ka kala pamwe naave, eshi to ka popya,* nohandi ke ku lombwela osho u na okutya.” 13 Moses okwa tya: “Jehova, file nge onghenda, alikana, tuma ko umwe oo wa hala okutuma.” 14 Jehova okwa li a handukila Moses, ndele ta ti kuye: “Ongahelipi shi na sha nomumwanyoko Aron, Omulevi? Ondi shi shii kutya ye omupopi muwa. Oku li mondjila paife te uya e ku shakeneke. Ngeenge okwe ku mono, ota* kala a hafa neenghono. 15 Onghee ou na oku mu lombwela osho e na oku ka tya. Ohandi ka kala pamwe nanye, eshi tamu ka popya, nohandi ke mu lombwela osho mu na okuninga. 16 Ota ka popya novanhu ponhele yoye nota ka kala omupopikalelipo woye, naave oto ka kala onga Kalunga kuye.* 17 Oto ka kufa odibo ei meke loye, ndele to ka longa nayo omadidiliko.”
18 Onghee Moses okwa shuna kuxemweno Jetro, ndele ta ti kuye: “Alikana, onda hala okuya, ndi shune kovamwameme ovo ve li kuEgipiti, opo ndi ka tale, ngeenge ove na natango omwenyo.” Jetro okwa tya kuMoses: “Inda nombili.” 19 Konima yaasho, Jehova okwa lombwela Moses muMidian, a ti: “Inda, shuna kuEgipiti, molwaashi ovanhu aveshe ovo va li va hala oku ku dipaa* ova fya.”
20 Opo nee Moses okwa kufa omukulukadi waye novanamati vaye nokwe va londeka kondongi, ndele ta shuna navo kedu laEgipiti. Moses okwa kufa yo meke laye odibo yaKalunga kashili. 21 Jehova okwa tya kuMoses: “Onde ku pa eenghono u longe oikumwifilonga. Onghee ngeenge owa shuna kuEgipiti, ou na okulonga oikumwifilonga aishe oyo koshipala shaFarao. Ashike ohandi ka efa a kukutike omutima waye, novanhu ite ke va lekela va ye. 22 Ou na okulombwela Farao ngaha, ‘Jehova okwa ti: “Israel omonamati wange, oshiveli shange. 23 Ohandi ku lombwele kutya, lekela omonamati wange a ka longele nge. Ndele ngeenge ito mu lekele, ohandi ka dipaa omonamati woye, oshiveli shoye.”’”
24 Ofimbo a li ta fuda po, eshi a li mondjila, Jehova okwa li e mu holokela nokwa li a hala oku mu dipaa. 25 Xuuninwa, Sippora okwa kufa emanya li na eemhemo,* ndele ta kenghe omonamati waye, noshipa shokoxulo youlumenhu waye okwe shi kumifa keemhadi daye, nokwa tya: “Owa ninga omushamane wange okupitila mohonde ei.” 26 Opo nee Kalunga okwe mu efa a ye. Omolwekengho olo, Sippora okwa ti: “Owa ninga omushamane wange okupitila mohonde.”
27 Jehova okwa lombwela Aron, a ti: “Inda mombuwa u ka shakeneke Moses.” Opo nee okwa ya, nokwe mu shakeneka pomhunda yaKalunga kashili, ndele te mu popifa nexupito. 28 Moses okwa lombwela Aron ashishe osho a lombwelwa kuJehova, oo e mu tuma, nomadidiliko aeshe oo e mu lombwela a ninge. 29 Okudja opo, Moses naAron ova ya, ndele tava ongele ovakulunhu aveshe vOvaisrael. 30 Aron okwe va lombwela ashishe osho Jehova a lombwela Moses, nokwa ninga omadidiliko moipafi yovanhu. 31 Opo nee ovanhu ova itavela. Eshi va uda kutya Jehova okwa dimbuluka Ovaisrael nokwa mona okuhepekwa kwavo, ova twa eengolo nokulinyongamena pedu.