Josua

22 Josua okwa ifana Ovaruben, Ovagad netata lepata laManasse, 2 ndele ta ti kuvo: “Omwa longa ashishe osho Moses, omupiya waJehova, e mu lombwela, nomwa dulika kwaashishe osho nde mu lombwela. 3 Inamu efa po ovamwaxo efimbo alishe olo, fiyo okunena, nomwa diinina oipango yaJehova, Kalunga keni. 4 Paife Jehova, Kalunga keni, okwa pa ovamwaxo etulumuko, ngaashi e va udanekela. Onghee shuneni paife komatwali eni medu olo Moses, omupiya waJehova, e mu pa mu li nangale kombinga ikwao* yomulonga waJordan. 5 Shilipalekeni filufilu kutya otamu dulika koipango nokOmhango, oyo Moses, omupiya waJehova, e mu lombwela, mokukala mu hole Jehova, Kalunga keni, mokweenda meendjila daye adishe, mokudiinina oipango yaye, mokukanyatela kuye nomoku mu longela nomutima weni aushe nosho yo nomwenyo* weni aushe.”

6 Opo nee Josua okwe va nangeka noupuna nokwe va lekela, ndele tava shuna komatwali avo. 7 Moses okwa pa etata lepata laManasse efyuululo muBasan, netata likwao lepata, Josua okwe li pa edu kombinga yokouninginino womulonga waJordan, pamwe novamwaxe. Kakele kaasho, eshi Josua a li te va lekele va ye komatwali avo, okwe va nangeka noupuna, 8 ndele ta ti kuvo: “Shuneni komatwali eni noupuna muhapu, oimuna ihapu, oshisilveri noshingoli, ongopolo noshivela shilaula, noikutu ihapu neenghono. Kufeni oixuulwa* yovatondi veni, ndele tamu ke i tukulilafana novamwaxo.”

9 Konima yaasho, Ovaruben, Ovagad netata lepata laManasse ova dja po pOvaisrael vakwao, muSilo medu laKaanan, nova shuna kedu laGilead, edu olo va fyuulula va kale mo palombwelo laJehova okupitila muMoses. 10 Eshi Ovaruben, Ovagad, netata lepata laManasse va ya koitukulwa oyo i li komulonga waJordan, medu laKaanan, ova tungila pomulonga waJordan oaltari ya kula neenghono. 11 Lwanima, Ovaisrael vakwao ove shi uda, ndele tava ti: “Tala, Ovarubeni, Ovagad netata lepata laManasse ova tunga oaltari peengaba dedu laKaanan moitukulwa, oyo i li pomulonga waJordan, kombinga yOvaisrael.” 12 Eshi Ovaisrael ve shi uda, ongudu aishe yOvaisrael oya ongala muSilo, opo ve ke va lwife.

13 Opo nee Ovaisrael ova tuma Pinehas, omonamati womupristeri Eliaser, kOvaruben, kOvagad noketata lepata laManasse medu laGilead, 14 nokwa li pamwe nomalenga omulongo, epata keshe laIsrael ola li li lilwe po kelenga limwe, nelenga keshe ola li omutwe woukwaneumbo mokati komaludi* Ovaisrael. 15 Eshi va fika kOvaruben, kOvagad noketata lepata laManasse medu laGilead, ova tya kuvo:

16 “Oshiwana shaJehova ashishe osha ti: ‘Omolwashike muhe fi ovadiinini kuKalunga kaIsrael omolwoilonga yeni? Omwa efa po okushikula Jehova nena, eshi mwe litungila oaltari nomwa tukululila Jehova oshibofa. 17 Mbela epuko olo twa li twa ninga muPeor inali wana? Nonande oshiwana shaJehova osha hangwa kehandukilo olo, inatu likoshola kepuko olo fiyo okunena. 18 Omwa hala okweefa po okushikula Jehova nena eli! Ngeenge omwa tukululile Jehova oshibofa nena, ota ka handukila ongudu aishe yOvaisrael mongula. 19 Ngeenge omwe shi ninga, molwaashi edu leni inali koshoka, ileni kedu laJehova oko ku na etwalihangano laJehova, ndele tamu kala hamu di mokati ketu, ashike inamu tukululila Jehova oshibofa noinamu tu ningifa ovanashibofa mokulitungila oaltari imwe ihe fi yaJehova, Kalunga ketu. 20 Eshi Akan, omonamati waSera, a li a longa oilonga oyo tai ulike kutya ke fi omudiinini kwaasho sha li sha tokolelwa ehanauno, mbela ongudu aishe yOvaisrael kaya li ya handukilwa? Haye aeke a li e na okufya omolwenyono laye.’”

21 Opo nee Ovaruben, Ovagad netata lepata laManasse ova nyamukula ovawiliki* vOvaisrael, va ti: 22 “Kalunga kookalunga, Jehova!* Kalunga kookalunga, Jehova, oku shi shii, nOvaisrael otave ke shi shiiva yo. Ngeenge otwa li twa tukula oshibofa notuhe fi ovadiinini kuJehova, ino tu xupifa nena eli. 23 Ngeenge otwe litungila oaltari tu efe po okushikula Jehova nokuyambela ko omaxwikiloyambo, eendjayambo nomayambo oukumwe, Jehova ota ka konakona oshinima osho. 24 Hasho twa li twe i tungila osho, otwe i tunga netomheno limwe li lili. Otwa li hatu lipula kutya: ‘Monakwiiwa, ovana veni otava ka tya kovana vetu: “Omu na ekwatafano lashike naJehova, Kalunga kaIsrael? 25 Jehova okwa tula po omulonga waJordan u kale ongaba pokati ketu nanye, Ovaruben nOvagad. Kamu na oufemba wokulongela Jehova.” Novana veni otava ka kelela ovana vetu vaha longele* Jehova.’

26 “Onghee otwa ti: ‘Natu ninge eenghendabala ngaashi hatu dulu tu tunge oaltari, ndele kai fi yomaxwikiloyambo, ile yomayambo amwe vali, 27 ashike otai kala ondombwedi pokati ketu nanye nokoludalo* letu olo tali tu shikula kutya ohatu ka wanifa po oilonga yetu oyo hatu longele Jehova moipafi yaye, nomaxwikiloyambo etu nomayambo amwe vali nosho yo nomayambo oukumwe, opo monakwiiwa ovana veni vaha ka tye kovana vetu: “Kamu na oufemba wokulongela Jehova.”’ 28 Onghee otwa ti: ‘Ngeenge ove ke tu ula nosho yo oludalo* letu monakwiiwa, ohatu ka tya: “Taleni oaltari oyo ootate va ninga ya fa oaltari yaJehova, kai fi yomaxwikiloyambo, ile yomayambo amwe e lili, ashike oi li ondombwedi pokati ketu nanye.”’ 29 Katu na nande efiku tu tukululile Jehova oshibofa nokweefa po okushikula Jehova nena mokutunga oaltari yomaxwikiloyambo, eendjayambo nomayambo amwe e lili ihe fi oaltari yaJehova, Kalunga ketu, oyo i li popepi netwalihangano!”

30 Eshi omupristeri Pinehas, omalenga ongudu novawiliki* vOvaisrael ovo va li pamwe naye va uda eendjovo odo da popiwa koludalo laRuben, laGad nolaManasse, ova li va mbilipalelwa. 31 Onghee Pinehas, omonamati womupristeri Eliaser, okwa tya koludalo laRuben, laGad nolaManasse: “Nena eli otu shi shii kutya Jehova oku li mokati ketu, molwaashi inamu longa sha osho tashi ulike kutya kamu fi ovadiinini kuJehova. Paife omwa xupifa Ovaisrael meke laJehova.”

32 Opo nee Pinehas, omonamati womupristeri Eliaser, nomalenga ova dja ko kOvaruben nokOvagad medu laGilead, va ya kedu laKaanan, ndele tava ka lombwela Ovaisrael vakwao eendjovo odo. 33 Ovaisrael ova li va mbilipalelwa kehokololo olo, opo nee ova tanga Kalunga, noinava popya sha vali shi na sha noku ka lwifa Ovaruben nOvagad, opo va hanaune po edu omo hava di.

34 Onghee Ovaruben nOvagad ova luka oaltari,* molwaashi “oi li ondombwedi pokati ketu kutya Jehova oye Kalunga kashili.”