Deuteronomion

12 “Aa omaufomhango nomatokolo oo mu na okudiinina filufilu omafiku aeshe oo mu li medu olo Jehova, Kalunga kooxokulululwa, te ke mu pa mu kale mo. 2 Omu na okuhanauna po filufilu eenhele adishe omo oiwana oyo mwa taataa mo ya li hai longele ookalunga kayo, kutya nee okoxulo yeemhunda, ile okoikulundudu, ile okoshi yomiti da kula. 3 Omu na okungumauna po eealtari davo nokuhanauna po eengudimanya davo diyapuki, okuxwika po eepala davo diyapuki* momundilo nokutetaula po oihongwafano yookalunga kavo, nokudima po filufilu omadina avo monhele oyo.

4 “Inamu longela Jehova, Kalunga keni, monghedi ya tya ngaho. 5 Ashike indeni konhele oyo Jehova, Kalunga keni, a hoolola ku fimanekelwe edina laye, noi li onhele yaye yokukala mokati komapata eni aeshe, naako oko tamu ke mu longela. 6 Konhele oyo oko tamu ka twala omaxwikiloyambo eni, omayambo eni, oitimulongo yeni,* omayambidido taa di momake eni, omayambo eni eano, omayambo eni ehalo liwa nosho yo eengobe, eedi noikombo yeni oyo ya dalwa tete. 7 Nye nomaukwaneumbo eni omu na okulila oko moipafi yaJehova, Kalunga keni, nokuhafela ashishe osho mwa longa, molwaashi Jehova, Kalunga keni, okwe mu nangeka noupuna.

8 “Inamu ninga ngaashi hatu ningi apa nena, keshe umwe ta ningi osho a hala,* 9 molwaashi inamu fika natango monhele yetulumuko nomedu olo Jehova, Kalunga keni, te mu pe. 10 Ngeenge omwa tauluka omulonga waJordan, ndele tamu ka kala medu olo Jehova, Kalunga keni, te mu pe mu kale mo, ote ke mu amena filufilu kovatondi veni aveshe ovo ve mu dingilila, notamu ka kala meameno. 11 Oinima aishe oyo handi mu lombwele otamu ke i twala konhele oyo Jehova, Kalunga keni, a hoolola ku fimanekelwe edina laye, omaxwikiloyambo eni, omayambo eni, oitimulongo yeni, omayambidido taa di momake eni nakeshe eyambo leano olo mwa anena Jehova. 12 Otamu ka kala mwa hafa moipafi yaJehova, Kalunga keni, nye novanamati veni, ovanakadona veni, ovapiya veni ovalumenhu novakainhu, nOmulevi oo e li moilando* yeni, osheshi ina pewa oshitukulwa, ile efyuululo pamwe nanye. 13 Lungameni muha yambe omaxwikiloyambo eni monhele keshe tamu mono. 14 Omu na ashike okuyambela omaxwikiloyambo eni monhele, oyo Jehova a hoolola mushimwe shomoitukulwa yomomapata eni, naako oko mu na okuningila keshe shimwe osho handi mu lombwele.

15 “Efimbo keshe mwa hala* okulya ombelela, dipaeni shimwe shomoinamwenyo yeni, she likolelela kenangeko noupuna olo Jehova, Kalunga keni, e mu pa moilando* yeni aishe. Omunhu oo ina koshoka nomunhu oo a koshoka otava dulu oku i lya, ngaashi ashike tamu li omenye, ile oholongo. 16 Ashike ku na okulya ohonde, ou na oku i tilashi medu ngaashi omeva. 17 Itamu ka pitikwa mu lile moilando* yeni oshitimulongo sheendjayambo deni, shomaviinyu eni, shomaadi eni, sheengobe, sheedi noikombo yeni, oyo ya dalwa tete, omayambo eni eano keshe olo mwa ana, omayambo eni ehalo liwa, ile omayambidido, oo taa di momake eni. 18 Oinima oyo otamu ke i lila moipafi yaJehova, Kalunga keni, monhele oyo Jehova, Kalunga keni, a hoolola, nye novanamati veni, ovanakadona veni, ovapiya veni ovalumenhu novakainhu, nOvalevi ovo hava di moilando* yeni, nokuhafela ashishe osho mwa longa moipafi yaJehova, Kalunga keni. 19 Lungameni muhe lidimbike Ovalevi efimbo olo mu li medu leni.

20 “Ngeenge Jehova, Kalunga keni, a tamununa mo oshitukulwa sheni, ngaashi e mu udanekela, ndele tamu ti: ‘Onda hala okulya ombelela,’ molwaashi omwa hala* okulya ombelela, otamu dulu okulya ombelela efimbo keshe mwe i hala.* 21 Ngeenge onhele oyo Jehova, Kalunga keni, a hoolola ku fimanekelwe edina laye oi li kokule nanye, omu na okudipaa dimwe domeengobe deni, ile eedi, ile oikombo imwe oyo Jehova e mu pa, ngaashi ashike nde mu lombwela, nomu na oku i lila meni loilando* yeni efimbo keshe mwe i hala.* 22 Omunhu oo ina koshoka nomunhu oo a koshoka, aveshe otava dulu oku i lya, ngaashi tamu li omenye nosho yo oholongo. 23 Kaleni mwa tokola toko muha lye ohonde, molwaashi ohonde oi lile po omwenyo,* noinamu lya omwenyo pamwe nombelela. 24 Inamu i lya. Omu na oku i tilashi medu ngaashi omeva. 25 Inamu i lya, opo shi mu endele nawa nye novana veni ovo tave mu shikula, molwaashi nye ohamu longo osho sha yuka momesho aJehova. 26 Omu na ashike okukufa oinima iyapuki oyo yeni nomayambo eni eano, ngeenge tamu i konhele oyo Jehova ta ka hoolola. 27 Konhele oyo oko tamu ka yandjela omaxwikiloyambo eni, ombelela nohonde koaltari yaJehova, Kalunga keni, nohonde yomayambo eni oi na okutilwashi koshitako shoaltari yaJehova, Kalunga keni, ashike ombelela otamu dulu oku i lya.

28 “Lungameni mu dulike keendjovo adishe edi handi mu lombwele, opo shi mu endele nawa alushe nye novana veni ovo tave mu shikula, molwaashi nye ohamu longo osho sha yuka momesho aJehova, Kalunga keni.

29 “Ngeenge Jehova, Kalunga keni, okwa hanauna po oiwana oyo tamu ka taataa mo, ndele tamu kala hamu di medu layo, 30 lungameni muha pukifwe, ngeenge ova hanaunwa po moipafi yeni. Inamu pula kombinga yookalunga kavo kutya, ‘Oiwana ei oya li hai longele ngahelipi ookalunga kayo? Naame ohandi ka ninga sha faafana.’ 31 Inamu longela Jehova, Kalunga keni, monghedi ya tya ngaho, molwaashi ohava ningile ookalunga kavo oshinima keshe shitondifa osho Jehova e tonde; ohava xwikile nokuli ookalunga kavo ovanamati vavo novanakadona vavo momundilo. 32 Lungameni mu dulike kondjovo keshe oyo handi mu lombwele. Inamu kufa mo, nye inamu weda mo.