Deuteronomion

24 “Ngeenge omulumenhu okwa hombola omukainhu, ndele omulumenhu oo ina hokwa vali omukainhu oo, molwaashi a mona sha shififa ohoni muye, oku na oku mu shangela ombapila yeteyohombo, ndele te i mu pe noku mu lekela mo meumbo laye. 2 Ngeenge okwa di mo meumbo laye, ota dulu okuya a ka hombolwe po komulumenhu umwe. 3 Ngeenge omulumenhu omutivali okwe mu tondo,* noku mu shangela ombapila yeteyohombo, ndele te i mu pe, noku mu lekela mo meumbo laye, ile ngeenge omulumenhu omutivali oo e mu hombola okwa fi, 4 omushamane waye wotete oo e mu lekela ita ka pitikwa e mu hombole po vali konima eshi a nyatekwa, osheshi osho oshinima shitondifa kuJehova. Inamu nyona sha medu olo Jehova, Kalunga keni, te mu pe li li efyuululo.

5 “Ngeenge omulumenhu opo a hombola, ke na okuya metangakwaita, ile okupewa oinakuwanifwa imwe. Ina pewa oinakuwanifwa nandenande oule womudo umwe, noku na okukala meumbo a hafife omukulukadi waye.

6 “Kape na oo e na okukufa ko oshini shokukweyela, ile emanya lasho lokombada i li eshilipaleko lokushunifa omukuli,* kungaho owa kwata ko omunhu nomwenyo* e li eshilipaleko.

7 “Ngeenge omunhu okwa kwata po ombabyona umwe* womovamwaxe Ovaisrael, ndele ta ungaunga naye nai noku mu landifa po, oo e mu kwata po ombabyona oku na okufya.

8 “Ngeenge opa holoka oudu woshilundu,* lungameni mu ninge ashishe osho Ovalevi ovo ve li ovapristeri tave mu lombwele. Lungameni mu ninge filufilu ashishe osho nde va lombwela. 9 Dimbulukeni osho Jehova, Kalunga keni, a ningila Miriam, eshi mwa li mondjila tamu di muEgipiti.

10 “Ngeenge owa pe mukweni omukuli woshinima sholudi keshe, ku na okuya meumbo laye u ke mu kufe osho ta yandje shi li eshilipaleko. 11 Ou na okufikama pondje, nomunhu oo wa pa omukuli oku na okweeta pondje osho ta yandje shi li eshilipaleko. 12 Ngeenge omunhu oo oku na omhumbwe, ku na oku ka nangala noshinima osho e ku pa shi li eshilipaleko. 13 Ou na oku mu shunifila filufilu osho e ku pa shi li eshilipaleko diva ngeenge etango la ningine, opo nee ota ka nangala noshikutu shaye, note ke ku nangeka noupuna; kungaho, Jehova, Kalunga keni, ote ke ku tala ko u li omuyuki omolwoshinima osho wa ninga.

14 “Ino kengelela omunailonga oo e na omhumbwe nokwa hepa, kutya nee oumwe womovamwaxo, ile omunailongo oo e li medu leni, meni loilando* yeni. 15 Ou na oku mu pa ondjabi yaye efiku olo ofimbo etango inali ningina, molwaashi oku na omhumbwe, nonghalamwenyo yaye oye likolelela kondjabi yaye. Ngeenge hasho, ote ke ku kuwila kuJehova noto ka kala u na etimba.

16 “Ovashamane kave na okudipawa omolwoshinima osho ovana va ninga, nounona kave na okudipawa omolwoshinima osho ooxe va ninga. Omunhu oku na ashike okudipawa omolwenyono laye mwene.

17 “Inamu pengifa etokolo lovanailongo, ile lounona ovo vehe na ooxe,* noinamu kufa ko oikutu yovafiyekadi i li eshilipaleko lokushunifa omukuli.* 18 Dimbulukeni kutya nanye omwa li ovapika medu laEgipiti, na Jehova, Kalunga keni, okwe mu xupifa, eshi mwa li mo. Nomolwaasho handi mu lombwele mu ninge ngaha.

19 “Ngeenge tamu teya oikunomwa yeni momapya eni, ndele tamu dimbwa oshipandi shimwe mepya, inamu shuna mu ke shi tale mo, omu na oku shi efa shi ninge shovanailongo, shounona ovo vehe na ooxe noshovafiyekadi, opo Jehova, Kalunga keni, a nangeke noupuna ashishe osho tamu ningi.

20 “Ngeenge omwa likola omiti deni deemono, inamu shuna ko vali mu ka likole koitai yado. Eemono odo da xupa ko otadi ningi dovanailongo, dounona ovo vehe na ooxe nosho yo dovafiyekadi.

21 “Ngeenge omwa likola omandjebele moikunino yeni yomandjebele, inamu shuna mo vali mu ka likole oo a xupa mo. Omandjebele oo a xupa mo oku na okuninga ovanailongo, ounona ovo vehe na ooxe nosho yo ovafiyekadi. 22 Dimbulukeni kutya omwa li ovapika medu laEgipiti. Nomolwaasho handi mu lombwele mu ninge ngaha.