Hesekiel
24 Ondjovo yaJehova oye uya vali kwaame momudo omutimuwoi, momwedi omutimulongo, mefiku etimulongo lomwedi, tai ti: 2 “Omona womunhu, shanga efiku* eli, efiku olo tuu eli. Ohamba yaBabilon oya hovela okuponokela Jerusalem mefiku olo tuu eli. 3 Ndele to popi eyeletumbulo* li na sha neumbo linashibofa, ndele to popi kombinga yalo to ti:
“‘Eshi osho Omwene Omunamapangelo aeshe, Jehova, ta ti:
“Tula po ombiya yokutelekela;* i tula pediko nokutula mo omeva.
4 Tula mo oinhimbu yombelela muyo, oinhimbu aishe iwa,
Oshilama noshooko; i yadeka nomakipa mawa elela.
5 Kufa odi ya hoololekeka moufita, ndele to tula oikuni koshi yombiya.
Fulukifa oinhimbu, ndele to telekele mo omakipa.”’
6 “Onghee hano, eshi osho Omwene Omunamapangelo aeshe, Jehova, ta ti:
‘Woo oshilando shetiko lohonde, ombiya yokutelekela i na olushu, omo olushu inali kufwa mo!
I yeleka to kufa mo oshinhimbu noshinhimbu; inamu i umbila oihoololifo.
7 Osheshi ohonde yasho oi li musho; okwe i tilashi kemanya kuhe na sha.
Ine i tila kedu, opo i uvikwe nondwi.
8 Opo ndi tukule onya yange, ndi handuke,
Onda tula ohonde yaye kemanya tali vema, lihe na sha,
Opo iha tuvikwe.’
9 “Onghee hano, eshi osho Omwene Omunamapangelo aeshe, Jehova, ta ti:
‘Woo oshilando shetiko lohonde!
Ohandi ka ongela onduba yoikuni.
10 Ongela oikuni nokutema omundilo,
Fulukifa ombelela nawanawa, to tileshi omunghoka, nokweefa omakipa a lungwine.
11 Tula ombiya ihe na sha pomakala i pupyale,
Opo oshivela shayo shi pupyale nokutilyana.
Ekako layo otali ka hengumukila muyo, nolushu layo otali ka pya po.
12 Oshinyemateka noshilolola,
Osheshi olushu lihapu itali di mo.
I kupula momundilo nolushu layo!’
13 “‘Ekako loye ola etifwa kelihumbato loye litondifa. Onda kendabala oku ku koshola, ashike kwa li to dulu okuyela kekako loye. Ito ka kala wa koshoka, fiyo osheshi ehandu lange la lota. 14 Ame mwene, Jehova, onde shi popya. Otashi ka ningwa shili. Itandi ke lialuluka, ile ndi ude olukeno, ile ndi lipe oushima. Otave ke ku tokola she likolelela keendjila doye nokoilonga yoye,’ Omwene Omunamapangelo aeshe, Jehova, osho ta ti.”
15 Nondjovo yaJehova oye uya vali kwaame tai ti: 16 “Omona womunhu, ohandi ka kufa po pwoove omuholike woye mepakumo leisho. Ku na okunyika oluhodi;* noku na okulila, ile okuxukula omahodi. 17 Kemena momutima, noino kufa ombinga meenghedindjikilile di na sha nokulila oonakufya. Manga elapi loye lokulimanga komutwe nokudjala eenghaku doye. Ku na okuuvika eendjedi doye dokomulungu wopombada,* noino lya omungome oo wa etelwa kuvamwe.”*
18 Nonda popya novanhu ongula, nomukulukadi wange okwa fya konguloshi. Onghee ongula onda ninga ngaashi ashike nda lombwelwa. 19 Ovanhu ova li tava ti kwaame: “Mbela ito tu lombwele kutya oinima oyo to ningi oi na shike nafye?” 20 Onde va nyamukula handi ti: “Ondjovo yaJehova oye uya kwaame tai ti, 21 ‘Lombwela eumbo laIsrael to ti: “Eshi osho Omwene Omunamapangelo aeshe, Jehova, ta ti, ‘Ondi li pokunyateka onhele yange iyapuki, odjo yetumbalo leni linene, oshinima osho mu na ohokwe musho nosho yo oshinima osho mu hole nomitima deni.* Ovana veni ovamati nosho yo oukadona, ovo mwa fiya po, otava ka fya keongamukonda. 22 Opo nee otamu ka ninga ngaashi osho nda ningile. Itamu ka uvika eendjedi deni dopomulungu wopombada, noitamu ka lya omungome, oo mwa etelwa kuvamwe. 23 Omalapi eni okulimanga komutwe otaa ka kala komitwe deni, neenghaku deni okeemhadi deni. Itamu ka nyika oluhodi, ile mu lile. Ponhele yaasho, otamu ka mona oixuna* omolwomapuko eni, notamu ka kemenafana. 24 Hesekiel okwa ninga edidiliko leni. Ngaashi ashike a ninga, nanye osho tamu ka ninga. Ngeenge osha ningwa, omu na oku ka shiiva kutya aame Omwene Omunamapangelo aeshe, Jehova.’”’”
25 “Ndele ove, omona womunhu, mefiku olo handi ke va kufa ohotekuma yavo, oshinima shiwa shehafo lavo, oshinima osho ve hole, nomahalo omitima* davo, pamwe novanamati vavo novanakadona vavo, 26 otashi ke ku lopotelwa kwaao a ya onhapo. 27 Mefiku olo, oto ka makula okanya koye, nokupopya naao a ya onhapo, noito ka kala vali wa fita ondaka. Oto ka ninga edidiliko kuvo, nove na oku ka shiiva kutya aame Jehova.”