Omapsalme

115 Ino yandja efimano kufye, Omwene Jehova, ino yandja efimano kufye,*

Ashike yandja efimano kedina loye

Omolwohole yoye i na oudiinini nosho yo oudiinini woye.

 3 Kalunga ketu oku li meulu;

Oha longo keshe osho a hala.

 4 Oikalunga yavo oya longwa moisilveri nomoingoli,

Oilonga yomake ovanhu.

 5 Oi na omakanya, ashike ihai popi;

Oi na omesho, ashike ihai mono ko;

 6 Oi na omatwi, ashike ihai udu ko;

Oi na omayulu, ashike ihai udu edimba lasha;

 7 Oi na omake, ashike ihai dulu okukwata sha;

Oi na eemhadi, ashike ihai ende;

Mominino dayo ihamu di ewi lasha.

 8 Ovanhu ovo ve i ninga otava ka kala ngaashi yo,

Nosho yo aveshe ovo ve lineekela muyo.

 9 Akutu Israel, lineekela muJehova;

Oye ekwafo lavo noshikelelifo shavo.

10 Eumbo laAron ove, lineekela muJehova;

Oye ekwafo lavo noshikelelifo shavo.

11 Nye ovo hamu tila Jehova, lineekeleni muJehova;

Oye ekwafo lavo noshikelelifo shavo.

12 Jehova ohe tu dimbuluka, note ke tu nangeka noupuna;

Ota ka nangeka noupuna eumbo laIsrael;

Ota ka nangeka noupuna eumbo laAron.

13 Ota ka nangeka noupuna ovo hava tila Jehova,

Ovo vanini nosho yo ovo vanene.

14 Jehova ote ke mu hapupalifa,

Nye noludalo* leni.

15 Nangekweni noupuna kuJehova,

Omushiti weulu nedu.

16 Eulu olaJehova,

Ashike edu okwe li pa ovana vovanhu.

17 Ovafi ihava tange Jah;

Nakeshe ou ha i melimweneneno lefyo.*

18 Ashike fye ohatu ka tanga Jah,

Okudja paife nofiyo alushe.