Hesekiel

11 Nomhepo oya yelula nge po, ndele tai twala nge koshivelo shokoushilo weumbo laJehova, oshivelo osho sha taalela koushilo. Komuvelo woshivelo oko, onda mona ko ovalumenhu 25, nomokati kavo omwa li Jaasania, omonamati waAssur, naPelatia, omonamati waBenaia, omalenga oshiwana. 2 Opo nee Okwa tya kwaame: “Omona womunhu, ava ovo ovalumenhu ovo hava ningi eemhangela dowii nohava yandje omayele mai* moshilando eshi. 3 Otava ti, ‘Mbela eli halo efimbo lokutunga omaumbo? Oshilando* osho ombiya yokutelekela,* nafye ombelela.’

4 “Onghee xunganeka shi na sha navo. Omona womunhu, xunganeka.”

5 Opo nee omhepo yaJehova oye uya kombada yange, ndele ta* ti kwaame: “Tya, ‘Eshi osho Jehova ta ti: “Osho mwa popya oshi li mondjila, nye eumbo laIsrael, nondi shi shii osho tamu diladila.* 6 Omwa dipaifa vahapu moshilando eshi, nomwa yadifa oimhu momapandavanda asho.”’” 7 “Onghee eshi osho Omwene Omunamapangelo aeshe, Jehova, ta ti: ‘Oimhu, oyo mwa halakanifila moshilando, oyo ombelela, noshilando osho ombiya yokutelekela. Ashike nye otamu ka kufwa mo muyo.’”

8 “‘Omwa kala mwa tila eongamukonda, ndele ohandi ke mu etela eongamukonda,’ Omwene Omunamapangelo aeshe, Jehova, osho ta ti. 9 ‘Ohandi ke mu kufa mo muye, nohandi ke mu yandja meke lovanailongo noku mu tokola. 10 Otamu ka fya keongamukonda. Ohandi ke mu tokolela peengaba daIsrael, nomu na oku ka shiiva kutya aame Jehova. 11 Oshilando itashi ka kala ombiya yeni yokutelekela, noitamu ka ninga ombelela, oyo i li mo; ohandi ke mu tokolela peengaba daIsrael, 12 nomu na oku ka shiiva kutya aame Jehova. Osheshi inamu enda metwokumwe nomaufomhango ange, noinamu wanifa po omatokolo ange, ashike omwa katuka metwokumwe nomatokolo oiwana oyo ye mu dingilila.’”

13 Diva konima eshi nda xunganeka, Pelatia, omonamati waBenaia, okwa fya, nonde linyongamena pedu nokulila mokule, handi ti: “Akutu shili! Omwene Omunamapangelo aeshe, Jehova! Mbela oto ka hanauna po oshixupe shaIsrael?”

14 Ondjovo yaJehova oye uya vali kwaame tai ti: 15 “Omona womunhu, ovamwaxo, ovo vomovamwaxo ovo ve na oufemba wokulandulula ko oinima, pamwe neumbo alishe laIsrael, ova lombwelwa kovakalimo vomuJerusalem kutya, ‘Kaleni kokule naJehova. Edu oletu; otwe li pewa li li efyuululo.’ 16 Onghee tya, ‘Eshi osho Omwene Omunamapangelo aeshe, Jehova, ta ti: “Nonande onde va kufa mo mokati koiwana, nonde va halakanifila mokati koilando, moule wokafimbo ohandi ka ninga onhele yavo iyapuki moilando omo va ya.”’

17 “Onghee tya, ‘Eshi osho Omwene Omunamapangelo aeshe, Jehova, ta ti: “Ohandi ke mu ongela mo yo mokati kovanhu noku mu ongela okudja moilongo omo mwa halakanifilwa, nohandi ke mu pa edu laIsrael. 18 Notava ka shuna oko, nokukufa mo musho oinima aishe yamo itondifa nosho yo oilonga aishe itondifa. 19 Nohandi ke va pa omutima wa hangana,* ndele handi ka tula muvo omhepo ipe; nohandi ka kufa momalutu avo omutima wemanya noku va pa omutima wombelela,* 20 opo va dule okweenda meenghedimhango dange nokudiinina omatokolo ange nokudulika kuo. Opo nee otava ka ninga ovanhu vange, nohandi ka kala Kalunga kavo.”’

21 “‘“Ndele shi na sha naavo omitima davo tadi twikile moinima yavo itondifa nosho yo moilonga yavo itondifa, ohandi ka eta oilanduliko yeenghatu davo kombada yomitwe davo,” Omwene Omunamapangelo aeshe, Jehova, osho ta ti.’”

22 Ovakerubi ova yelula omavava avo, nomalola okwa li e li popepi navo, noshinge shaKalunga kaIsrael osha li pombada yavo. 23 Opo nee oshinge shaJehova osha yeluka okudja moshilando, ndele tashi kanghama kombada yomhunda koushilo woshilando. 24 Opo nee omhepo oya yelula nge po, okupitila memoniko lomhepo yaKalunga, ndele tai twala nge keenghwate odo di li muKaldea. Opo nee emoniko, olo nda li nda mona, ola dja po pwaame. 25 Nonda hovela okulombwela eenghwate oinima aishe oyo Jehova a ulikila nge.