Ovatokolipangeli
13 Ovaisrael ova li natango va longa osho shii momesho aJehova, na Jehova okwa li e va yandja momake Ovafilisti oule weedula 40.
2 Lwanima, opa li omulumenhu womuSora womepata lOvadan, edina laye oManoa. Omukulukadi waye okwa li ongadji noka li e na ounona. 3 Mokweendela ko kwefimbo, omweengeli waJehova okwe ke lihololela omukainhu oo, ndele ta ti kuye: “Tala, ove ongadji noku na ounona. Ashike oto ka ninga oufimba, ndele to dala okaana okamati. 4 Lungama uha nwe omaviinyu, ile oshikolwifa keshe, noino lya oshinima keshe inashi koshoka. 5 Tala, oto ka ninga oufimba, ndele to dala okaana okamati, nomomutwe wako inamu enda okambi, molwaashi okaana oko otaka ka kala Omunasiri waKalunga okudja pedalo,* notaka ka kwatela komesho mokuxupifa Ovaisrael momake Ovafilisti.”
6 Opo nee omukainhu okwa ya, ndele ta lombwele omushamane waye, ta ti: “Omupiya waKalunga kashili okwe uya kwaame, neholokepo laye ola li la fa lomweengeli waKalunga kashili, eholokepo laye ola li likumwifi. Inandi mu pula apa a dja, noina lombwela nge edina laye. 7 Ndele okwa lombwela nge, ta ti: ‘Tala, oto ka ninga oufimba, ndele to dala okaana okamati. Ino nwa omaviinyu, ile oshikolwifa keshe, noino lya oshinima keshe inashi koshoka, molwaashi okaana oko otaka kala Omunasiri waKalunga okudja pedalo* fiyo osheshi taka ka fya.’”
8 Manoa okwa indila Jehova, a ti: “Jehova, dimine nge po. Alikana, tuma vali omupiya waKalunga kashili, oo wa tumine e tu shiivifile nghee hatu ka tekula okaana oko taka ka dalwa.” 9 Onghee Kalunga kashili okwa pwilikina kuManoa, nomweengeli waKalunga kashili okwe uya vali komukainhu ofimbo e li omutumba pondje. Ka li e li nomushamane waye, Manoa. 10 Omukainhu okwa ya diva, ndele ta lombwele omushamane waye, ta ti: “Tala, omulumenhu winya e uyile kwaame efiku linya okwe uya vali kwaame.”
11 Opo nee Manoa okwa fikama, ndele ta i nomukulukadi waye. Okwe uya pomulumenhu oo, ndele ta ti kuye: “Oove omulumenhu oo a popile nomukulukadi wange?” Omulumenhu oo okwa tya: “Heeno, aame.” 12 Manoa okwa tya: “Eendjovo doye nadi wanifwe! Onghalamwenyo yokaana oko otai ka kala ya tya ngahelipi, notaka ka longa oilonga ilipi?” 13 Omweengeli waJehova okwa lombwela Manoa, ta ti: “Omukulukadi woye na diinine ashishe osho nde mu lombwela. 14 Ina lya oshinima keshe sha longwa moiimati yomundjebele, ina nwa omaviinyu, ile oshikolwifa keshe, noina lya oshinima keshe inashi koshoka. Na diinine ashishe osho nde mu lombwela.”
15 Manoa okwa lombwela omweengeli waJehova, a ti: “Alikana, ino ya, opo tu ku longekidile okakombo.” 16 Ashike omweengeli waJehova okwa lombwela Manoa, a ti: “Ngeenge onda kala po, itandi li oikulya yeni. Ashike ngeenge omwa hala okuyandja exwikiloyambo kuJehova, li yambeni.” Manoa ka li e shi shii kutya omulumenhu oo omweengeli waJehova. 17 Opo nee Manoa okwa pula omweengeli waJehova, a ti: “Oove lyelye, opo tu ku fimaneke, ngeenge eendjovo doye da wanifwa?” 18 Ndele omweengeli waJehova okwe mu pula, ta ti: “Omolwashike to pula nge edina lange? Oli kumwifi neenghono.”
19 Onghee Manoa okwa kufa okakombo neendjayambo, ndele te i yambele Jehova kemanya. Okwa* li ta ningi oshinima shikumwifi, ofimbo Manoa nomukulukadi waye vali tava tale. 20 Eshi omundilo wa li tau di koaltari wa finda keulu, omweengeli waJehova okwa ya mewangadjo e li momundilo oo wa dja koaltari, ofimbo Manoa nomukulukadi waye va li tava tale. Opo nee ove linyongamena diva pedu. 21 Omweengeli waJehova ine lihololela vali Manoa nomukulukadi waye. Opo nee Manoa okwa dimbuluka kutya okwa li omweengeli waJehova. 22 Manoa okwa lombwela omukulukadi waye, a ti: “Otu na okufya filufilu, molwaashi otwa mona Kalunga.” 23 Ashike omukulukadi waye okwa tya kuye: “Ngeno Jehova okwa li a hala oku tu dipaa, ngeno ina tambula ko exwikiloyambo neendjayambo odo da dja momake etu, noine tu ulikila oinima aishe oyo noku tu lombwela oinima aishe oyo.”
24 Lwanima, omukainhu oo okwa ka dala okaana okamati, ndele te ka luku Simson, naashi a kula, Jehova okwa twikila oku mu nangeka noupuna. 25 Mokweendela ko kwefimbo, omhepo yaJehova oya hovela okulonga muye, eshi a li muMahane-dan, pokati kaSora naEstaol.