Hesekiel
43 Opo nee okwa twala nge komuvelo, oo wa taalela koushilo. 2 Oko onda mona ko oshinge shaKalunga kaIsrael tashi di koushilo, nondaka yaye oya li ya fa epopomo lomeva taa endelele; nedu ola li la minikilwa koshinge shaye. 3 Osho nda mona osha li tashi monika sha fa emoniko, olo nda monene, eshi nda* li nde uya ndi hanaune po oshilando, nola li tali monika la fa osho nda monene popepi nomulonga Kebar; nonde linyongamena oshipala sha twa pedu.
4 Opo nee oshinge shaJehova osha ya motembeli* sha pitila momuvelo oo wa taalela koushilo. 5 Okudja opo, omhepo oya yambula nge po, noya twala nge momukala womeni, nonda mona kutya otembeli oya li ya yadifwa noshinge shaJehova. 6 Opo nee onda uda umwe ta popi naame okudja motembeli, nomulumenhu oo okwe uya, ndele ta fikama polwamba lange. 7 Okwa tya kwaame:
“Omona womunhu, ei onhele yolukalwapangelo lange nosho yo onhele yoififinwa yeemhadi dange, omo handi ka kala mokati kovanhu vaIsrael fiyo alushe. Eumbo laIsrael itali ka nyateka vali edina lange liyapuki, lo nosho yo eehamba dalo, omolwokuhaela kwalo pamhepo nomolwoimhu yeehamba davo pefyo lavo. 8 Eshi va tula oshivelo shavo popepi noshivelo shange nosho yo oshikulo shavo shoposhivelo popepi noshikulo shange shoposhivelo, pe na ashike ekuma pokati kange navo, ova nyateka edina lange liyapuki noinima itondifa oyo va ninga, onghee onde va hanauna po mehandu lange. 9 Nava tule kokule naame okuhaela kwavo kwopamhepo nosho yo oimhu yeehamba davo, nohandi ka kala mokati kavo fiyo alushe.
10 “Ashike ove, omona womunhu, yelifila eumbo laIsrael kombinga yotembeli, opo va kale ve udite va fifwa ohoni omolwomanyono avo, nove na okukonakona omudutilo wayo.* 11 Ngeenge ova fi ohoni omolwaashishe osho va ninga, ou na oku va shiivifila omudutilo wotembeli, elongekido layo, oivelo yayo yokudja mo nosho yo oivelo yayo yokuuya mo. Va ulikila omudutilo wayo aushe nosho yo eenghedimhango dayo, omudutilo wayo neemhango dayo, ndele to i shange moipafi yavo, opo va diinine omudutilo wayo aushe nokuwanifa po eenghedimhango dayo. 12 Ei oyo omhango yotembeli. Oshitukulwa ashishe, osho sha dingilila oxulo yomhunda, oshiyapuki elela. Tala! Ei oyo omhango yotembeli.
13 “Aa omavalulo oaltari, eshi ya yelekwa momaludimbo (koludimbo keshe okwa wedwa omutamo weke).* Oshitako shayo oludimbo limwe, nounene wayo oludimbo limwe. Oi na eengaba da dingilila omungenge, oo u fike peke la xwaananekwa* mounene. Oshitako shoaltari opo shi fike opo. 14 Okudja pedu koshitako fiyo okomungenge wopedu, oo wa dingonoka oaltari, omaludimbo avali, nounene womungenge oludimbo limwe. Okudja komungenge munini, oo we i dingonoka, fiyo okomungenge wa kula, oo we i dingonoka, omaludimbo ane, nounene wayo oludimbo limwe. 15 Oaltari yomundilo oi na oule wopombada womaludimbo ane, nokombada yoaltari yomundilo oku na omaluvinga ane a taalela pombada. 16 Oaltari yomundilo oya li i na eembinga nhee di fike pamwe, oule womukokomoko womaludimbo 12, nounene womaludimbo 12. 17 Eembinga nhee domungenge, oo we i dingilila, odi na oule womukokomoko womaludimbo 14 nosho yo ounene womaludimbo 14; neengaba odo da dingilila odi na etata loludimbo, noshitako shalo oludimbo limwe keembinga adishe.
“Neetalapa dayo oda taalela koushilo.”
18 Opo nee okwa tya kwaame, “Omona womunhu, eshi osho Omwene Omunamapangelo aeshe, Jehova, ta ti: ‘Olo olo ewiliko li na okushikulwa, eshi oaltari tai tungwa, opo omaxwikiloyambo aeshe a yambwe, nohonde i shaminwe kuyo.’
19 “‘Ou na okuyandja ondumetana yomoufita i li etimbayambo kovapristeri Ovalevi vomoludalo laSadok, ovo have uya okuyakula nge,’ Omwene Omunamapangelo aeshe, Jehova, osho ta ti. 20 ‘Ou na okukufa ohonde yayo imwe, noku i tula komaluvinga ane oaltari, meehuke nhee domungenge, oo we i dingilila, nosho yo ongaba, oyo ye i dingilila, opo i kosholwe komatimba noku i kwatakanifa. 21 Opo nee kufa ondumetana, oyo i li etimbayambo, opo u i xwikile ponhele oyo ya hoololwa yotembeli, kondje yonhele iyapuki. 22 Mefiku etivali, oto ka yandja oshikombo shoshindume sha koshoka shi li etimbayambo; notava ka koshola oaltari komatimba ngaashi ashike ve i koshola komatimba nondumetana.’
23 “‘Ngeenge wa mane oku i koshola komatimba, ou na okuyamba ondumetana ya koshoka yomoufita nosho yo odi yondume ya koshoka ya dja moufita. 24 Ou na oku i yandja kuJehova, novapristeri ove na okuunda omongwa kuyo, noku i yamba i li exwikiloyambo alishe kuJehova. 25 Oule womafiku aheyali, ou na okuyamba oshikombo shoshindume shi li etimbayambo efiku keshe nosho yo ondumetana yomoufita nodi yondume yomoufita; ou na okuyamba oinamwenyo ihe na oshipo.* 26 Ove na okukwatakanifa oaltari oule womafiku aheyali, nove na oku i koshola, noku i longekida i longifwe. 27 Ngeenge omafiku a pu ko, mefiku etihetatu nosho yo konima yaasho, ovapristeri otava ka yambela omaxwikiloyambo aeshe eni* nosho yo omayambo oukumwe koaltari; nohandi ka kala nde mu hokwa,’ Omwene Omunamapangelo aeshe, Jehova, osho ta ti.”