Omayeletumbulo
25 Aa nao omayeletumbulo aSalomo, oo a shangwa* kovapiya vaHiskia, ohamba yaJuda:
2 Kalunga ota fimanekwa, eshi ha kaleke oshinima oshiholekwa
Nohamba otai fimanekwa, eshi hai konakona nawa oshinima.
3 Ngaashi eulu li li pombada elela, nedu la ya moule,
Omitima deehamba nado odinyenga okukonakona.
4 Wapaleka oshisilveri nawanawa,
Opo nee otashi ka yela filufilu.
5 Kufa omukolokoshi moipafi yohamba,
Opo nee olukalwapangelo layo otali ka pamekwa omolwouyuki.
6 Ino lifimanekifa koshipala shohamba,
Noino litula ponhele yovanenenhu,
7 Osheshi oshixwepo ngeenge tai ti kwoove, “Ila oku,”
Ponhele yokufifwa ohoni moipafi yovanamadina.
8 Ino endelela okuya komhangu,
Osheshi oto ka ninga po shike, ngeenge mukweni okwe ke ku fifa ohoni?
9 Kandulei po oupyakadi namukweni,
Ashike ino holola oshiholekwa shaye,*
10 Opo oo te ku pwilikine ehe ku fife ohoni,
Nehokololo lii,* olo wa tandaveleka, liha dimbulukiwe.
11 Eendjovo da popiwa pefimbo la wapala
Oda fa omaapela oshingoli e li moikwatelwa yoshisilveri.
12 Omupukululi omunaendunge oku li ngaashi outenda vomomatwi voshingoli
Nosho yo oinima yokufeweka yoshingoli shiwa elela kwaao te mu pwilikine.
13 Ngaashi outalala weandu pefimbo leteyo
Omutumwa omudiinini naye osho e li kwaao e mu tuma,
Molwaashi oha hafifa omwene waye.*
14 Ngaashi oilemo nomhepo oyo ihe na odula
Omunhu oo he litangele oshali oyo ina pewa* nandenande naye osho e li.
15 Ngeenge ou na elididimiko, oto dulu okutomha oo e na eenghonopangelo,
Nelaka litalala* otali dulu okuteya ekipa.
16 Ngeenge owa mono omaadi eenyiki, lya ashike oo wa pumbwa,
Osheshi ngeenge owa li mahapu, otashi dulika u a kunge ko.
17 Ino kala ho i unene keumbo lamukweni,
Opo ehe ku loloke, ndele te ku tondo.
18 Ngaashi odibo yomoita neongamukonda nosho yo oshikuti sha honga
Omunhu ou ta yandje oundombwedi woipupulu kombinga yamukwao naye osho e li.
19 Ngaashi eyoo la teka, ile omhadi ya lemana
Osha fa okulineekela omunhu ehe fi okulineekelwa* pefimbo loudjuu.
20 Ou ta imbile omutima wa nyika oluhodi omaimbilo
Okwa fa omunhu te lidula oshikutu pefimbo loutalala
Nokwa fa o-vinegar* ya tilwa komongwa.
21 Ngeenge omutondi woye* okwa fya ondjala, mu pa omungome a lye;
Ngeenge okwa fya enota, mu pa omeva a nwe,
22 Osheshi oto mu ongelele omakala a xwama komutwe waye,*
Na Jehova ote ke ku pa ondjabi.
23 Omhepo yokolundume otai eta odula yepoola,
Nolwaambo otali handukifa vamwe.
24 Oshixwepo okukala kombada yeumbo,
Shi dulife okukala meumbo limwe nomukulukadi oo e hole okutanguna.*
25 Onghundana iwa ya dja koshilongo shokokule
Oi li ngaashi omeva matalala komwenyo* wa notelwa.
26 Ngaashi ofifiya i na onhata nosho yo ondungu ya mbonyauka
Omuyuki oo he liyandje* komukolokoshi naye osho e li.
27 Kashiwa okulya omaadi eenyiki mahapu,
Nokashiwa okulikongela efimano.