Omapsalme
Eimbilo laDavid.
141 Omwene Jehova, ohandi ku ifana.
Ila diva u kwafele nge.
Yandja elitulemo, eshi handi ku ifana.
2 Eilikano lange nali kale la fa oitwimifo ya longekidwa komesho yoye,
Omake ange a yeluka ongaashi eendjayambo dokonguloshi.
3 Omwene Jehova, tula omukeleli kokanya kange,
Tula omunangeli poshivelo shomilungu dange.
4 Ino efa omutima wange u kwatwe keamo lokuhola osho shii,
U kufe ombinga moilonga yowii pamwe novakolokoshi;
Ino efa ndi lye nandenande oitendele yavo.
5 Ngeenge omuyuki okwa denge nge, ota ka kala a fa ta ulike ohole i na oudiinini;
Ngeenge okwa pe nge outekuduliko, otashi ka kala sha fa nda tilwa omaadi komutwe wange,
Oo omutwe wange uhe na efiku u a anye.
Eilikano lange otali ka twikila, nokuli nomokati komaupyakadi avo.
6 Nonande ovatokoli vavo ova undulwa ko koxulo yomamanya,
Ovanhu otava ka yandja elitulemo keendjovo dange, osheshi oda wapala.
7 Ngaashi ashike ngeenge umwe ta pulula edu, ndele edu tali lihane,
Omakipa etu nao osho haa hanaukile ngaho mokanya kOmbila.*
8 Ashike omesho ange okwa tala kwoove, Omwene Omunamapangelo aeshe, Jehova.
Onda konga eameno mwoove.
Ino efa nge ndi fye.*
9 Amene nge komayoo eemwiyo odo va tela nge,
Komalulo ovalongi vowii.
10 Ovakolokoshi aveshe otava ka wila meenete davo vene,
Ofimbo handi piti po ndi li meameno.