Samuel wotete
30 Eshi David novakwaita vaye va ya kuSiklag mefiku etitatu, Ovaamalek ova li va dingilila kolukadi* nosho yo Siklag, nova li va ponokela Siklag nove shi xwika po nomundilo. 2 Ova li va kwata ko ovakainhu novanhu aveshe ovo va li mo, okudja kwaau munini fiyo okwaau munene. Inava dipaa po nande oumwe, ashike ova ya navo. 3 Eshi David novakwaita vaye ve uya moshilando, ova hanga sha xwikwa po, novakulukadi vavo, ovanamati vavo novanakadona vavo ova iwa navo ve li eenghwate. 4 Onghee David novakwaita vaye ova hovela okulila mokule, fiyo osheshi va li vehe na vali eenghono dokulila. 5 Ovakulukadi vavali vaDavid navo ova iwa navo ve li eenghwate, Ahinoam wokuJisreel naAbigail, omufiyekadi waNabal, Omukarmel. 6 David okwa li a wililwa po neenghono, molwaashi ovakwaita ova li tava popi kutya ova hala oku mu dipaa nomamanya, osheshi ovalumenhu aveshe* ova li va handuka neenghono, eshi ovanamati novanakadona vavo va iwa navo. Ashike David okwa li a konga ekwafo kuJehova Kalunga kaye, nokwa pamekwa.
7 David okwa lombwela omupristeri Abjatar, omonamati waAhimelek, a ti: “Alikana, etele nge okatetahema.” Opo nee Abjatar okwa twala okatetahema kuDavid. 8 David okwa pula Jehova a ti: “Nandi shikule ngoo ovo va ponokela moshilando? Mbela ohandi ke va hanga ngoo?” Okwe mu nyamukula a ti: “Inda u ke va shikule, osheshi oto ke va hanga, noto ka xupifa ovo va kwatwa ko.”
9 Diva David okwa fikama pamwe novalumenhu 600, ovo va li pamwe naye, ndele tava i fiyo okefilu* laBesor, oko kwa li kwa fyaala ovalumenhu vamwe. 10 David nosho yo ovalumenhu 400 ova twikila okutaataa ovanyeki, ashike ovalumenhu 200, ovo va li va loloka unene nokutauluka efilu laBesor, ova fyaala po.
11 Ova hanga omulumenhu Omuegipiti kondje yoshilando, ndele tave mu twala kuDavid. Ove mu pa oikulya a lye nosho yo omeva okunwa, 12 nokapambu koshikuki sheenghwiyu da tyanghaulwa nosho yo oikuki ivali yomandjebele a kukutikwa. Konima eshi a lya, okwa mona vali eenghono,* osheshi ina lya sha, ile a nwe sha oule womafiku atatu. 13 David okwe mu pula a ti: “Ove omupiya walyelye, nowa dja peni?” Okwa nyamukula ta ti: “Ame Omuegipiti, omupiya womulumenhu Omuamalek, ashike omwene wange okwa fiya nge po, molwaashi onda li handi vele oule womafiku atatu a ka pita. 14 Otwa li twa dingilila kolukadi* lOvakereti nosho yo oshitukulwa shaJuda nokolukadi* laKaleb, na Siklag otwe shi xwika po.” 15 Opo nee David okwa tya kuye: “Oto dulu okutwala nge kovaponokeli ovo?” Okwa nyamukula a ti: “Ngeenge owa anene nge medina laKalunga kutya ito ka dipaa nge, noito ka yandja nge komwene wange, ohandi ku twala ko kuvo.”
16 Opo nee okwe mu twala oko va li ve lihanena moshilongo ashishe, tava li notava nu nokutyapula omolwoixuulwa,* oyo va kufa kedu lOvafilisti nokedu lOvajuda. 17 Onghee David okwa hovela oku va dipaa okudja ongula inene fiyo okonguloshi yefiku la shikula ko, nokape na omunhu a dula okufaduka po, kakele kovalumenhu 400, ovo va faduka po va londa keengamelo. 18 David okwa li a nyeka ko oinima aishe oyo ya li ya kufwa po kOvaamalek nokwa xupifa ovakulukadi vaye vavali. 19 Moinima yavo aishe inamu kana nande oshimwe. Ova xupifa ovanamati vavo novanakadona vavo noixuulwa, na David okwa nyeka ko oinima aishe oyo va li va kufa ko. 20 David okwa kufa ko yo eedi, oikombo neengobe dOvaamalek, odo va li va pitifa komesho yoimuna yavo. Ova ti: “Ei oixuulwa yaDavid.”
21 Opo nee David okwe uya povalumenhu 200, ovo inava dula okuya pamwe naye omolweloloko, nova li va fyaala pefilu laBesor, ndele tave uya okushakeneka David nosho yo ovanhu ovo va li pamwe naye. Eshi David a ehena popepi novalumenhu ovo, okwe va pula kutya ove li po ngahelipi. 22 Ashike ovalumenhu aveshe ovakolokoshi, novatangalali, ovo va li mokati kavo nova li va ya pamwe naDavid, ova ti: “Molwaashi inava ya pamwe nafye, itatu ke va pa nandenande oixuulwa oyo twa kufa ko, ashike keshe umwe ota dulu okukufa po omukulukadi waye novanamati vaye, ndele tava i.” 23 David okwa ti: “Inamu ninga ngaho, ovamwatate, molwaashi oinima ei tu na otwe i pewa kuJehova. Okwe tu amena, nokwa yandja momake etu ovo va li ve tu ponokela. 24 Olyelye ta ka twa kumwe nanye moshinima osho? Aveshe ovo va ile molwoodi, ile ovo va fyaala peendongelwa otava mono shi fike pamwe. Aveshe otava ka mona shi fike pamwe.” 25 Okudja efiku olo, osho David a popya osha ninga eufomhango nomhango muIsrael fiyo okunena eli.
26 Eshi David a alukila kuSiklag, oixuulwa imwe okwe i tumina ovakulunhu vaJuda, ovo va li ookaume kaye, ndele ta ti: “Ei oshali* ya dja moixuulwa yovatondi vaJehova.” 27 Okwe i tumina kwaavo ve li muBetel, kwaavo ve li muRamot shaNegeb,* kwaavo ve li muJattir, 28 kwaavo ve li muAroer, kwaavo ve li muSifmot, kwaavo ve li muEstemoa, 29 kwaavo ve li muRakal, kwaavo ve li moilando yOvajerahmeel, kwaavo ve li moilando yOvakeni, 30 kwaavo ve li muHorma, kwaavo ve li muBorasan, kwaavo ve li muAtak, 31 kwaavo ve li muHebron nokeenhele akushe oko David novakwaita vaye hava kala.