Omafimbo omativali
16 Momudo omuti-36 wepangelo laAsa, Baasha, ohamba yaIsrael, okwe uya okulwifa Juda nokwa hovela okutunga* Rama, opo a kelele keshe umwe oo ta di mo, ile te uya* kuAsa, ohamba yaJuda. 2 Opo nee Asa okwa kufa oshisilveri noshingoli meemhungulilo domeumbo laJehova nomeumbo* lohamba, ndele te i tumine Benhadad, ohamba yaSiria, oo a li ha di muDamaskus, a ti: 3 “Ope na eudafanotwokumwe* pokati ketu naave nosho yo pokati katate naxo. Ohandi ku tumine oshisilveri noshingoli. Ila u teye po eudafanotwokumwe* leni naBaasha, ohamba yaIsrael, opo a dje po pwaame.”
4 Benhadad okwa pwilikina kohamba Asa, nokwa tuma eendjai domatangakwaita aye di ka lwife oilando yaIsrael, ndele tadi hanauna po Ijon, Dan, Abel-maim neenhele adishe dokutuvikila domoilando yaNaftali. 5 Eshi Baasha e shi uda, okwa efa po diva okutunga* Rama, nokwa fiya po oilonga yaye. 6 Ohamba Asa oya kufa Ovajuda aveshe, ndele tava kufa omamanya noiti yomuRama, oyo Baasha a li a tungifa nayo, nokwe i tungifa* Geba nosho yo Mispa.
7 Pefimbo opo, Hanani, omumonikokule, okwe uya kuAsa, ohamba yaJuda, ndele ta ti kuye: “Molwaashi owe lineekela* mohamba yaSiria, ndele ino lineekela* muJehova, Kalunga koye, etangakwaita laSiria ola dja mo meke loye. 8 Hamba Ovaetiopia nOvalibia kava li etangakwaita linene, li na omatemba novalondinghambe vahapu? Ndele molwaashi owa li we lineekela muJehova, okwe va yandja momake oye. 9 Omesho aJehova otaa tale kombada yedu alishe, opo a ulike eenghono daye mokukwafela ovo ovadiinini kuye. Ino katuka pandunge moshinima eshi; okudja paife oto ka kala to lwifwa.”
10 Ashike Asa okwa li a handukila omumonikokule, ndele te mu tula modolongo,* molwaashi okwa li e mu udifa nai neenghono omolwoshinima osho. Pefimbo opo tuu opo, Asa okwa hovela okuungaunga nai novanhu vamwe. 11 Ondjokonona yaAsa, okudja pehovelo fiyo opexulilo, oya shangwa mEmbo lEehamba daJuda nodaIsrael.
12 Momudo omuti-39 wepangelo laye, Asa okwa kwatwa koudu weemhadi, nokwa li ta vele neenghono; nokuli naashi a li ta vele, ina konga ekwafo kuJehova, ndele okovahakuli. 13 Opo nee Asa okwa nangekwa pooxekulululwa; okwa fya momudo omuti-41 wepangelo laye. 14 Onghee ove mu paka mombila yondilo, oyo e lihokela mOshilando shaDavid, nove mu nangeka kolutala, olo la vaekwa omaadi o-balsam nosho yo oihemba yomaludi e lili noku lili ya lumbakanifwa mumwe nomaadi edimba liwa. Natango, ova shakala ediko linene, opo ve mu fimaneke.*