Eehamba dotete
15 Momudo omuti-18 wepangelo lohamba Jerobeam, Abiam, omonamati waNebat, okwa ninga ohamba yaJuda. 2 Okwa pangela muJerusalem eedula nhatu. Ina oMaaka, omutekulu waAbishalom. 3 Okwa nyona omanyono a fa axe, oo e mu tetekela, noka li ha longele Jehova, Kalunga kaye, nomutima aushe,* ngaashi xekulululwa David. 4 Ashike omolwaDavid, Jehova, Kalunga kaye, okwe mu pa olamba muJerusalem, eshi a nangeka po omonamati waye, nokukaleka po Jerusalem. 5 Osheshi David okwa longa osho sha yuka momesho aJehova, nokwa dulika kwaashishe osho e mu lombwela mokukalamwenyo kwaye akushe, kakele koshinima osho shi na sha naUria, Omuheti. 6 Mokukalamwenyo kwaRehabeam akushe, pokati kaye naJerobeam opa kala alushe oita.
7 Ondjokonona aishe yaAbiam, ashishe osho a ninga, mbela inai shangwa membo londjokonona yopefimbo leehamba daJuda? Pokati kaAbiam naJerobeam opa li yo oita. 8 Opo nee Abiam okwa nangekwa pooxekulululwa, nove mu paka mOshilando shaDavid. Omonamati waye, Asa, okwa ninga ohamba ponhele yaye.
9 Momudo omuti-20 wepangelo lohamba yaIsrael, Jerobeam, Asa okwa hovela okupangela Juda. 10 Okwa pangela muJerusalem oule weedula 41. Inakulu oMaaka, omutekulu waAbishalom. 11 Asa okwa ninga osho sha yuka momesho aJehova, ngaashi xekulululwa David. 12 Moshilongo okwa taataa mo omashenge* omotembeli, nokwa kufa mo oikalunga aishe itondifa* oyo ya ningwa kooxekulululwa. 13 Okwa kufa nokuli inakulu, Maaka, ondodo yaye, e li ohambakainhu, molwaashi okwa ninga oshikalunga shitondifa, opo opala iyapuki* i longelwe. Asa okwa teta po oshikalunga shitondifa shainakulu, ndele te shi xwikile mEfilu laKidron. 14 Ashike eenhele dokoikulundudu kada li da hanaunwa po. Kakele kaasho, Asa okwa longela Jehova nomutima aushe* okukalamwenyo* kwaye akushe. 15 Okwa eta meumbo laJehova oinima oyo ye naxe va yapula, oshisilveri, oshingoli noilongifo i lili noku lili.
16 Pokati kaAsa naBaasha, ohamba yaIsrael, opa kala oita. 17 Onghee Baasha, ohamba yaIsrael, okwe uya okulwifa Juda nokwa hovela okutunga* Rama, opo a kelele keshe umwe oo ta di mo, ile te uya* kuAsa, ohamba yaJuda. 18 Opo nee Asa okwa kufa oshisilveri noshingoli ashishe osho sha li sha xupa meemhungulilo deumbo laJehova nosho yo meemhungulilo deumbo* lohamba, ndele te i yandje kovapiya vaye. Ohamba Asa oye va tuma kuBenhadad, omonamati waTabrimmon, omonamati waHesion, ohamba yaSiria, oo a li ha di muDamaskus, a ti: 19 “Ope na eudafanotwokumwe* pokati ketu naave nosho yo pokati katate naxo. Ohandi ku tumine oshali yoshisilveri noshingoli. Ila u teye po eudafanotwokumwe* leni naBaasha, ohamba yaIsrael, opo a dje po pwaame.” 20 Benhadad okwa pwilikina kohamba Asa, nokwa tuma eendjai domatangakwaita aye di ka ponokele oilando yaIsrael, ndele tadi hanauna po Ijon, Dan, Abel-bet-maaka, Kinneret ashishe nedu alishe laNaftali. 21 Eshi Baasha e shi uda, okwa efa po diva okutunga* Rama, ndele ta twikile okukala muTirsa. 22 Ohamba Asa oya ifana Ovajuda aveshe, ndele tava kufa omamanya noiti yomuRama, oyo Baasha a li ta tungifa nayo, ndele ohamba Asa te i tungifa* Geba muBenjamin nosho yo Mispa.
23 Ondjokonona aishe yaAsa, eenghono daye adishe, ashishe osho a ninga, noilando oyo a tunga,* mbela inai shangwa membo londjokonona yopefimbo leehamba daJuda? Ndele eshi a kulupa, okwa kala ta ehama eemhadi. 24 Opo nee Asa okwa nangekwa pooxekulululwa, nokwa pakwa puvo mOshilando shaDavid, xekulululwa. Omonamati waye, Josafat, okwa ninga ohamba ponhele yaye.
25 Nadab, omonamati waJerobeam, okwa ninga ohamba yaIsrael momudo omutivali wepangelo laAsa, ohamba yaJuda, nokwa pangela Israel oule weedula mbali. 26 Okwa twikila okulonga osho shii momesho aJehova, a enda mondjila yaxe nokwa ningifa Israel shi nyone. 27 Baasha, omonamati waAhia, womepata laIsaskar, okwa pangela omhangela e ke mu ponokele, na Baasha okwe mu dipaela muGibbeton, osho sha li shOvafilisti, ofimbo Nadab naIsrael ashishe va li va kondeka Gibbeton. 28 Onghee Baasha okwe mu dipaa momudo omutitatu wepangelo laAsa, ohamba yaJuda, ndele ta ningi ohamba ponhele yaye. 29 Diva eshi a ninga ohamba, okwa dipaa epata alishe laJerobeam. Ina fiya nande omunhu umwe womepata laJerobeam e na omwenyo; okwe va dipaifa metwokumwe nondjovo yaJehova oyo a popya okupitila momupiya waye, Ahia, Omusilo. 30 Osho osha ningwa, molwaashi Jerobeam okwa nyona, nokwa ningifa Israel shi nyone, nomolwaasho kwa li a handukifa unene Jehova, Kalunga kaIsrael. 31 Ondjokonona aishe yaNadab, ashishe osho a ninga, mbela inai shangwa membo londjokonona yopefimbo leehamba daIsrael? 32 Pokati kaAsa nohamba yaIsrael, Baasha, opa kala alushe oita.
33 Momudo omutitatu wepangelo laAsa, ohamba yaJuda, Baasha, omonamati waAhia, okwa li muTirsa, eshi a ninga ohamba yaIsrael ashishe, nokwa pangela oule weedula 24. 34 Ashike okwa twikila okulonga osho shii momesho aJehova, a enda mondjila yaJerobeam nokwa ningifa Israel shi nyone.